Yesaya 11 - Wunta Mempori

Tumbano i Isai anu ta hawe

¹ Asa tumba ta meluarako inso a ntu'ono i Isai, ka asa tumba ta tuwu inso a mpu'uno.

² Penaa-Do i Ue ta mo'ia ndi onae, penaa ponto'ori anu mentee ka ponto'ori, penaa pande mosongka ka roso, penaa tumo'orio ka doitoako Ira i Ue;

³ oo, pino'undeakono onaemo doitoako Ira Ue. Onae nahi ta mobitara montonda pongkitano mata ke momputusi montonda porongeno biri.

⁴ Sine onae ta bitara ira mia molema a moleoa, ka ta momputusi temoiko a mia anu tepokonsii a wita andio; tolino ta tumunduhiakono pauno kana montunduhiako tuko, saru pepuuri inso a ngangano ta mompepate mia mosa'o gauno.

⁵ Menteea ta gagi peboo ntongano, ka petenunu ta kongko tetanggo a ntongano.

⁶ Serigala ta mo'ia saru bimba ka nggapu langkai meboti-boti ta mepombole i horino ana bembe. Anano sapi ka anano singa ira mongkaa meronga-ronga, ka asa nana'ote kodei ta wawa ira.

⁷ Sapi ka berua ira meronga mongkaa ewo, anado ira mepombole meronga-ronga, ka singa ta mongkaa seami kana sapi.

⁸ Nana'ote anu mo'uo ta mepali-palindo umpeda aano ule me'ipo ka nana'ote anu pinotoe ta weroo kaeno a nsenono ule mo'ito.

⁹ Nahina anu ta moweweu mosa'o ke anu mosa'o peleluno a luwuno torukuno-Ku anu mempori, hangano asa wawontolino bukeako ponto'ori ndi Ondae i Ue, kana montutuwi tahi malua.

¹⁰ I tempo atuu tumba inso a mpu'uno i Isai ta mentade gagi banderado tongku; onae ira me'ungkeo sukuno tongku ka po'iangano ta gagi maramba.

To Isaraeli anu da tuwu ira mpekule 11:11-16

¹¹ Tempo atuu Ondae i Ue Ira tumandeo mbo'u kae-Do tumolosi ira bawaa-Do anu da mentuwu anu mpo'ia i Asuri ka Masiri, i Patirosi, Etiopia ka Elami, i Sineari, Hamati ka a luwuno togo i Tahi Tongano.

¹² Onae ta wuatakono asa bandera tiado tongku ka pumpu ira to Isaraeli anu mentinadi, ka ta pumpu ira to Yehuda anu ntesiarawo inso a opaa siuno tolino.

¹³ Pinemosino i Eparai ta telalo, ondae anu mpokoma'isoo Yehuda ira metampula. Eparai nahi ta mosiriakono mbo'u Yehuda, ka Yehuda nahi ta mokoma'isoo mbo'u Eparai.

¹⁴ Sine ondae ira mepaso'ulu i sumooano oleo lumaloo oweano torukuno Pelisiti, ondae meronga-ronga momuru ira tongku i sabaano oleo; Edomi ka Moabi ta gagi rontuano kaedo, ka to Amoni ira mpetuundu ndi ondae.

¹⁵ Ondae i Ue Ira mokomo'areo kolono Masiri ka tumandeo kae-Do a ngkoro Eparata saru tekuda anu mompokomo'ai. Dotunduhio tepeha gagi opitu korono wela mo'are, ranta mia mpokontelalo mpesandala.

¹⁶ Te'ipua ta hina sala langkai tiado bawaa-Do anu da mentuwu anu mpo'ia i Asuri, kana anu hinaomo tiado to Isaraeli i ndi'ipua, i tempono dompeluarako inso i wita Masiri.