Yesaya 10 - Wunta Mempori

¹ Memasola ira ntu'u anu metantuio luwuno pompakosi anu nahi moleo ka meweweuo luwuno pomputusi anu lambaha,

² nahi dompoweeako ira moleoa a mia molema, me'alao tiado mia marasai i olodo bawaa-Ku, ka dome'alao anu ta tiado tuwua beine, ka mpomuru ira nana'ote nahina amado!

³ Hapake anu komiu meweweuo a oleo pohukua, ka a oleo matea anu hawe inso a olaiano? Ndi semake komiu mpelulu mpepetulungi, ka isuake imebintao pompolimiu?

⁴ Nahi komiu mpokompoweweu hapa-hapa, sangkadio mo'ia i olodo mia mentinawa, ke mate i olodo mia mempinepate! Maupo gagiomo luwuno andio, tekuda-Do i Ue napi morini, ka kae-Do da tetaangako.

Pohuku a pompelangka-langkaino Asuri

⁵ Masolaomo ntu'u Asiuri, ponsepino tekuda-Ku anu kaeno uminio tuko tekuda-Ku!

⁶ A tongku anu humapu Aku Kutenao, a bawaa pontiiano tekuda-Ku Kuparentao ka iporontu ka mompomuru, ka ilolanda ira kana rege a nsala.

⁷ Sine onaeno nahi pontoo kanatuu ka tinoono aroano komba kanatuu, hangano tinoono aroano onaemo moropu ka mokotampulao komba tedei tongku.

⁸ Ipotae, ”Kombake tadulako sorodaduku atuu luwuno mokole?

⁹ Kombake Kalino rinawo-rawo kana Karakemisi, Hamati kana Aripadi, ke Samaria kana Damasi?

¹⁰ Kana'umpe kusapoiako iramo kaeku poparentaa buke lahumoa, anu hinao lalu hadio tinaha sekonopo Yerusale ka Samaria,

¹¹ kombake aku weweuo mbo'u i Yerusale ka a luwuno tinaha pelahumoaano, kana anu kuweweuomo i Samaria ka a luwuno lahomoano?”

¹² Sine tempono Dopoko'umariomo i Ue luwuno anggaa-Do i torukuno Sioni ka i Yerusale, Ira humukuo laba mpauno mokole Asiuri anu nahi behe tenangi mpau ka peleluno mompelangka-langkai.

¹³ Hangano motaeomo, ”Saru rosono kaeku kuweweuomo ka saru pandeku mosongka, hangano ongkue molino pinewowoloku; ku'oniniomo luwuno tida olono tongku, ka momuruo arataa pepatindado, saru roso kupotii iramo mia anu mpentoro a ngkadera poparentaa.

¹⁴ Kana mompete'umala senono manu-manu, kupongko'alaakonomo kaeku pompolino luwuno tongku, ka kana mopumpu su'uluino anu binintano ineno, kurakuomo asa wawontolino, ka nahina maupo te'asa anu mowile panino, mongangao tungkuno ke mompio-pio.”

¹⁵ Ta gagike uase mompelangka-langkai a mia montuehi, ke garagadi mompelangka-langkai a mia mogaragadi? Kana-kana tarasulu lumeluo mia anu uminio, ka kana-kana tuko tumandeo anu wawao anu komba keu.

¹⁶ Onaemo pu'uno, Ondae i Ue, Ueno luwuakoano, Ira weweuo sorodadudo anu moroso gagi morungku ntu'u hangano haki, gagi euno marambano onae tinunu ka ipingko kana hangano tensilano api.

¹⁷ Mewineno Isaraeli ta gagi api, ka Anu Tedoa Mempori, Ondae Ue Alano, gagi langano api. Ira sumongko ka pingko ikaano ewo ka rui meronga a oleo anu mengkena.

¹⁸ Tekosino tobuno i Asuri ka lere wua ngkeuno Ira mokopingkoo, inso a ngkeuno hawe a sampano, ranta ka igagi kana mia anu mahaki anu tedoa marasai.

¹⁹ Toreano keu a ntobuno tamokoa tedei, maupo asa nana'ote ipolio burio hadiono.

To Isaraeli anu da tuwu ta kinadudui 10:20-27a

²⁰ Sine i tempo atuu to Isaraeli anu da mentuwu ka mia anu da mentuwu i olodo inuleno i Yako, nahi ira mpoperorohi mbo'u a tongku anu numangi ira, sine ira mpoperorohi ndi Ondae i Ue, Anu Tedoa Mempori, Ue Alado to Isaraeli, a laro petenunuado.

²¹ Aasa anu datuwu ta mekule, aasa anu datuwu inuleno i Yako, ndi Ondae Ue Ala anu moroso.

²² Hangano maupo tongkumu, hei Isaraeli, kana one a ntahi hadiono, sine butu anu da tuwu ta mekule. Matea pinakosiomo, anu luluaako moleoa.

²³ Mentee ntu'u, matea anu umarimo Dopakosio i Ue, Ueno luwuakoano, manasa ta pinokogagi i asa wawontolino.

²⁴ Onaemo pu'uno, kanandiomo pau-Do i Ue, Ueno luwuakoano, ”Hei bawaa-Ku anu mpo'ia i Sioni, siimo doitoakono i Asuri anu tumunduhiakomu tarasuluno puu mpopakambi ka anu uma'eakomu tukono kana anu wineweuno i Masiri i ndi'ipua.

²⁵ Hangano nahi ta tehine mbo'u tekuda-Ku ndi omue tamomenaa-naa, ka tekuda-Ku ta weweu ira nterawo-rawo.

²⁶ Ondae Ueno luwuakoano Ira monsepiako ponsepi ndi ondae, kana Dosepi ira to Midia i torukuno watu Orebi, ka tumandeo tuko-Do a wawo ntahi kana anu wineweu-Do i Masiri i ndi'ipua.

^27a I tempo atuu tinembi anu domempinopotembiako a oweado ta tinadi, ka pasanga anu ninaa a banga we'udo ta pinudu.”

To Asuri mposapoi 10:27b-34

^27b To Asuri mpe'umbaako iramo inso i Rimoni

²⁸ ka sumapoio Ayati; onae lumako telalo i Migironi, ka mo'atora pepatinda i Mikimasi.

²⁹ Domelaloomo pesakia ka mpewongi i Geba. Palilino Rama mpondidi-ndidi, anu mpo'ia i Gibea-Saulu mpolai.

³⁰ Imperaalimo temeroku, hei ana beineno Galimi! Pekokoongakonomo, hei Laisia! Sangkiomo, hei Anatoti!

³¹ Anu mpo'ia i Madamena mpolai, palilino Gebimi mpolai mpeliahako.

³² Oleo andio i Asuri da menaa-naa i Nobi, mopo'io-ioo kaeno te'aro a ntorukuno ana beine Sioni, pongku Yerusale.

³³ Kitao, Ondae i Ue, Ueno luwuakoano Ira tumoto'iakono roso anu mongkokodoito luwuno sampano keu anu tuwu ondau ta tinuehi, ka anu telanso ta pinoko'owowa.

³⁴ Tobu mongura ta tinuehiako uase, ka Libano saru luwuno keuno anu tedoa langkai ta tedonta.