Yesaya 1 - Wunta Mempori

TIANO AMBA-AMBANO LAMORO 1–39 PINAU ANU TA GAGI MONGKONA YEHUDA KA YERUSALE LAMORO 1–12 Puu mpau

¹ Pongkitano i Yesaya anano i Amosi mongkona Yehuda ka Yerusale anu ikitaomo tempono poparentaano i Usia, i Yotami, i Ahasi ka i Hisikia, luwuno mokoledo to Yehuda.

Potuntu a nto Isaraeli 1:2-9

² Rongeomo, hei langi, ka ta'oomo biri, hei tolino, hangano Ondae i Ue mepau, ”Ongkue mokolangkai ira nana'ote ka mekakaako ira, sine me'ewa ira ndi Ongkue.

³ Sapi tumo'orio ueno, sine to Isaraeli naahi; kalide tumo'orio dulano ueno, sine bawaa-Ku naahi.”

⁴ Masola ntu'u tongku anu tehala, bawaa anu bukeako sala, inuledo mia anu melolambaha, mia anu mpoweweu mokoburu! Domebinta Ira i Ue, tumata Ira Anu Tedoa Mempori, Ue Alado to Isaraeli, ka mpewolili mpebungkui Ira.

⁵ Tembio ka imebehe mentinunduhi mbo'u, omiu anu tekense mpebungkui Ira? Ulu mahaki luwu ka luwuno aroa molema ka telusa.

⁶ Inso a mpelengkaru hawe a ulu nahina anu madoo: kaamba ka lamba ka mobela sarai, nahi pinokomorina ka nahi winalu ka nahi pinonaako lana.

⁷ Witamu gagi boni-boni, kotamu pingko tinunu. I arono matamu mia hawe mpomuruo witamu, boni-boni, domesongkoo mia mehawe.

⁸ Ana beine Sioni tebinta asa-asano kana laika a lere anggoro, kana bansule a lere nsuai, kana kota anu tekadu.

⁹ Ande-andeno Ondae Ueno luwuakoano nahi Dopobinta ndi ontae mia mentekadudui, ontae ilawu kana Sodomo, ka gagi mengkena kana Gumora.

Pesomba mentee 1:10-20

¹⁰ Rongeomo pau-Do i Ue, hei luwuno petewawano Sodomo! Ta'oomo birimiu a pompaguru-Do Ue Alato, hei palilino Gumora!

¹¹ ”Hapa tuduno ndi Ongkue pesombamu anu ntehohadio?” Pau-Do i Ue; ”Kute'osaakonomo luwuno pesomba tinunu kana bimba lakino ka tabano ana nsapi anu mewalo. Reano sapi ka anano bembe-bimba lakino nahi Kupe'eheo.

¹² Tempono ime'aiwa i aro-Ku, isemake anu tumuntuo atuu inso ndi omiu, ranta ka imelolandao kintala-Ku?

¹³ Siimo mbo'u impowawa pesomba anu nahina pengkonaano, pesomba dupa onaemo Kumokoburuakono. Porame-ramea wula wo'ohu ka saba ke luwuno tepotowoa nahi Kupolio kumitao tepumpua langkai tinondaako wineweu mosa'o.

¹⁴ Porame-ramea wula wo'ohu ka luwuno oleo langkaimiu Ku'o'aliaakono. Luwuno atuu gagi tembia-Ku, mokendo Akumo tumembio.

¹⁵ Tempono imentineo kaemiu, Aku wolilio rupa-Ku tendeano maupo temararu impekakai, nahi Aku merorongeakono, hangano kaemiu bukeako rea.

¹⁶ Imewo'ohiomo, impokomorinaomo koroimiu, ime'olaiakono luwuno wineweumiu anu mosa'o inso i arono mata-Ku. Impenaa-naamo mpoweweu mosa'o,

¹⁷ impepagurumo mpoweweu moiko; teahakonomo moleoa, pabawai iramo mia lambaha; weeako iramo tiado nana'ote nahina amado, teahakonomo kara-karado tuwu beine!

¹⁸ Aiwamo, moikoomo tompekara-kara! Pau-Do i Ue. Tewala halamu motaha kana kirimisi, ta gagi mopute kana seru baku; tewala motaha kana kasumba, ta gagi mopute kana wulu bimba.

¹⁹ Tewala mebehe komiu mpetenunu, komiu mpongkaa hasili moiko inso a wita andio.

²⁰ Sine tewala mpe'ewa komiu, ta kumaa komiu ponai.” Mentee ntu'u, Ondae i Ue anu pauo.

Pohuku tiano Yerusale 1:21-31

²¹ Adoo, kota anu i ndi'ipua metenunu kanandio-andio gagiomo belesu! Hieno buke moleoa, menteea mo'ia i larono, sine kanandio-andio bukeako puu pompepate.

²² Salakamu gagiomo ta'i labu ka aramu mesalo uwoi.

²³ Luwuno petewawamu ondaemo anu me'ewa ka ntepo'asa saru puu mponako. Inehedo luwu mpontarima pompowee nahi pototono ka inehedo mpo'ala anu komba tiado. Nahi dompe'alaako a ntiado nana'ote nahina amado, ka kara-karado tuwu beine nahi hawe ndi ondae.

²⁴ Ondaemo pu'uno, kanadiomo pau-Do i Ue, Ondae Ueno luwuakoano, Anu Tedoa Moroso, Puu Pongkaduduido to Isaraeli; ”Petangkoro, Aku motiio tekuda-Ku a luwuno iwali-Ku, ka mombalo a luwuno iwali-Ku.

²⁵ Aku mewolili umewaiakomu kae-Ku; Aku mokomangkiloo salakamu, ka tumadio luwuno rege inso ndi omue.

²⁶ Aku mokule ira puu mpobitaramu kana i ndi'ipua, ka luwuno puu pompatudu kana se'eluno. Umarino atuu omue konineeako kota moleoa, kota anu metenunu.”

²⁷ Sioni ta pinokobebasi molalo moleoa ka luwuno miano anu tepidi molalo menteea.

²⁸ Sine mia anu umewa ka mia tehala ta rinopu meronga, mia anu binta Ira i Ue ta pingko moliu.

²⁹ Mentee ntu'u, komiu mpohawe mokoko'ii hangano luwuno keu pesombaa anu ino'aroamiu; ka komiu mpohawe pontataa hangano lere bungano pinesombai anu bininikimiu.

³⁰ Hangano omiu ta kana keu langkai anu leweno moleu, ka kana lere nahina uwoi.

³¹ Anu moroso gagi kana ewo mokari, inanggano gagi kana bunga api; oruano ta mo'ai meronga ka nahina anu mokompepateo.