Yeremia 9 - Wunta Mempori

¹ Ande-andeno uluku insoano uwoi, ka mataku sirikino uwoi mata, meene wongi aku mengesei ira mia anu mempinepate inso i olodo ana beineno tongkuku!

² Ande-andeno ongkue hinao po'iangaku i pada one peratoado mia anu tekonai a laro pelempaa, asalakono aku bintao tongkuku ka meliahako inso ndi ondae! Hangano luwudo mpososabo, gerombolado mia mpopopo'oo.

³ Ondae melongkuo elodo kana pana; komba menteea sine pegaupi anu me'a'e i wita atuu. ”Mentee ntu'u, ondae mpelungka inso a wineweu mosa'o lumako a wineweu mosa'o, sine nahi domento'ori Aku”, pau-Do i Ue.

⁴ Laluopo sompo mia metangkoro a walino. Maupo isema pepaekompomu si pe'ala-alao, hangano sompo pepaekompo onaemo puu pompopo'oo, ka sompo wali-wali melempa ngkoraane ngkoramai mpompau anu nahi mentee.

⁵ Anu asa mia mopo'oo anu susua, ka nahina maupo te'asa mia mepau mentee; domempokoleleoomo elodo mepau megaupi; ondae mpokomokendoo koroido mpoweweu anu saala.

⁶ Pompokonsiia i wawono pompokonsiia, pompopo'oo i wawono pompopo'oo! Nahi domebehe mento'ori Aku, kanandiomo pau-Do i Ue.

⁷ Onaemo pu'uno, kanandiomo pau-Do Ueno luwuakoano, ”Menteeano, Aku mokolonoo ka umarahako ira, hangano hapa mbo'u anu Aku mokoweweuo a ana beinedo bawaa-Ku?

⁸ Elodo onaemo ana mpana anu mompepate, pauno ngangado onaemo pe'akala; ondae mpepau rodoa saru walido, sine i laro aroado mpontoo mentowokio.

⁹ Nde kana'umpe nahi Aku humuku ira hangano luwuno andio?, kanandiomo pau-Do i Ue. Nde kana'umpe nahi Aku moweweu pombaloa a tongku kanandio?

¹⁰ Pengesemo ka peraalikimo hangano luwuno torukuno, ka ponsabangimo hangano ewo i pada one, hangano luwuno londaomo ranta nahina mia telaloio, ka nami teronge mbo'u suarano pinotuwu; moiko manu-manu i laromeene maupo kondehora susuano, luwuno mpolai iramo ka moliu.

¹¹ Aku weweuo Yerusale gagi howuno anu terawo, pewuniado serigala; Luwuno kotano Yehuda Aku weweuo boni-boni, nahina mbo'u palilino.”

Pepokodoito tekalea ka pontadia

¹² Isemake mia anu tedoa pande mosongka, ranta ka ipokonto'orio mongkona andio ka anu tumarimaomo pau inso a nganga-Do i Ue, ranta ka ipokopauo? Hapa pu'uno ka itebobarasa wita andio, londa kana pada one ranta nahina mia anu telaloio?

¹³ Mepau Iramo i Ue, ”Ondae mebintao Songka-Ku anu Kuweeako iramo i arodo, ka nahi pinerorongeako pau-Ku ke mentondao.

¹⁴ Tendeano, domentondao moteano aroado ka mentonda ira Baala kana anu domempaguruako ira uempu'udo.

¹⁵ Onaemo pu'uno kanandiomo pau-Do Ueno luwuakoano, Ue Alado to Isaraeli: Menteeano, Aku weweuo tongku andio mpongkaa rasu mopa'i ka mpo'inu uwoi merasu.

¹⁶ Aku sumiarawo ira i olodo luwuno tongku anu nahi domento'orio ke maupo uempu'udo. Aku mo'oliwi ponai lumampui ira ranta ka Kupingko ira.

¹⁷ Pekokoongakono! Poboi iramo beine mposabangi, ka dome'aiwa, ka pontenamo mia a luwuno beine anu pande mosongka, ka dome'aiwa!” Kanandiomo pau-Do Ueno luwuakoano.

¹⁸ Asalakono ka dompotuturako ka mposabangia kita, ka inte'i'iti uwoi matato, ka ileento a ngkuli matato!

¹⁹ Hangano teronge ponsabangi inso i Sioni: Mentee ntu'u, memate kitamo! Omami tedoa mempinokoko'ii! Asalakono kami mebintao wita andio, hangano luwuno raha po'iangamami pinobangkuomo.

²⁰ Onaemo ka imerongeo pau-Do i Ue, hei luwuno beine, po'ineeomo ka itarimao birimiu pau inso a nganga-Do; paguruako iramo ponsabangi anamiu beine, ka penani ponsabangi, singge mia a wali-walino:

²¹ ”Matea me'oloako a luwuno pentangoato, mpewinso i larono luwuno benteto. Ondae mokotampula ira nana'ote inso a nsala, luwuno mangalitau inso i tanalapa;

²² Pauomo, ’Kanandiomo pau-Do i Ue: wata ngkoroido mia matumbole kana ta'i a lere, kana tonggino gandu i bungkudo mia mensowi nahina anu pumpu ira.’”

Mo'unde hangano tumo'ori Ira Ue Ala

²³ Kanandiomo pau-Do i Ue, ”Mia pande mosongka ka si po'undeakono pandeno mosongka, mia moroso ka si po'undeakono rosono, mia kaea ka si po'undeakono kaeano.

²⁴ Sine isema ineheno mo'unde, laluopo ipo'undeakono mongkona andio: nine onae mokonto'orio ka tumo'ori Aku, nine Ongkuemo Ue anu mopokitao pompehohawa, moleoa ka menteea i tolino; mentee ntu'u, luwuno atuu inehe-Ku, kanandiomo pau-Do i Ue.”

²⁵ ”Kitao, tempono ta hawe, kanandiomo pau-Do i Ue, Aku humuku ira mia anu mentinindi iramo tinotopi kuli anuno:

²⁶ to Masiri, to Yehuda, to Edomi, inuleno i Amoni, to Moabi ka luwuno mia anu kumeruo wuuno a wiwi uluno, mia anu mpo'ia i pada one, hangano luwuno tongku atuu menteeano nahi dompetindi ka maupo luwuno suku Isaraeli nahi tinindi aroado.”