Yeremia 7 - Wunta Mempori

Pontutuluno i Yeremia mongkona Raha Mempori 7:1-15

¹ Pau anu hawe ndi Yeremia inso ndi Ondae i Ue, kanandio,

² ”Pentademo a mpewowa langkaino Raha-Do i Ue, pebooliakonomo i ra'ai pau andio ka potae: Rongeomo pau-Do i Ue, hei luwumiu to Yehuda anu mpewinso telalo a luwuno pewowa langkai andio komiu mpenggolontu mpesombai Ira i Ue!

³ Kanandiomo pau-Do Ueno luwuakoano, Ue Alado to Isaraeli: Pokomoikoomo pelelumu ka wineweumu, asalakono Aku mo'inee komiu mpo'ia a mpo'ianga andio.

⁴ Si mpe'ala-alao luwuno pau mpegaupi andio: ndio raha-Do i Ue, raha-Do i Ue, raha-Do i Ue!

⁵ Tewala mentee ntu'u impokomoikoo pelelumiu ka mentee ntu'u imeweweuo moleoa a mpe'asa miamiu,

⁶ tewala nahi imempokonsii ira mia mehawe, nana'ote nahina amano ka tuwu beine, nahi mpo'uwu reano mia anu nahina salano a mpo'ianga andio, ka nahi mpetonda a mpinesombai susua, anu sumolangi komiu,

⁷ asalakono Aku koa mo'inee komiu mpo'ia a mpo'ianga andio, ka wita anu Kuweeako iramo uempu'umiu, inso i ndi'ipua ranta nahina tampulaano.

⁸ Sine, menteeano impe'ala-ala ira pau mpegaupi anu nahi mentudu.

⁹ Nde kana'umpe umarimiu mponako, mpompepate, mpososabo ka mpesumpa mpegaupi, mpontunu pesomba a Baala ka mpotonda pinesombai susua anu nahi imento'orio,

¹⁰ ka i'amba me'aiwa mpentade i aro-Ku a raha andio, anu nineeako montonda nee-Ku, saru mpotae: ’Ntekadudui kita, ka impokompoweweu mbo'u luwuno wineweu mokoburu andio!’

¹¹ Nde raha andio, anu nineeako montonda nee-Ku, gagiomo po'iangado puu mporontu a matamiu? Menteeano Ongkue isa'a kumitaomo, kanandiomo pau-Do i Ue.

¹² Onaemo pu'uno lakomo a mpo'ianga-Ku i Sioni, isua i ndi'ipua Kuweweuo po'iangano nee-Ku, ka kitaomo hapa anu Kuweweuomo ndi onae hangano poweweudo mosa'o bawaa-Ku Isaraeli!

¹³ Kanandio-andio omiu meweweuomo mbo'u luwuno wineweu atuu, kanandiomo pau-Do i Ue. Omiu nahi behe merongeo, maupo Kupepau mpiha ndi omiu, ka nahi behe mesangki, maupo Kupebooli ndi omiu.

¹⁴ Onaemo pu'uno, a raha andio, anu nineeako montonda nee-Ku ka anu pinerorohimiu, ka a mpo'ianga, anu Kuweeakomiumo ka a uempu'umiu, Aku weweuo kana anu Kuweweuomo ndi Silo.

¹⁵ Aku metadiakomiu inso i aro-Ku, mengkena kana luwuno inuleno i Eparai, pepaekompomu atuu, Kupetadiakonomo.”

Pompopoto'oria a anu mpesombaio Mokole beine Suruga 7:16-20

¹⁶ ”Omue isa'a, siimo pekakaiako ira tongku andio, ka si mansa po'emamu saru pekakai tiado, ka si dadai Aku, hangano nahi Aku merorongeakomu.

¹⁷ Nahi ukitaoke hapa anu wineweudo a luwuno kotano Yehuda ka luwuno sala i Yerusale?

¹⁸ Nana'ote mpobini keu ponahu, luwuno ama mpopokomelanga api ka luwuno beine mposalo tarigu weweuado kukisi pesomba tiano mokole beine suruga, ka mia mpopesombaako pesomba tinawa a mpinesombai susua saru tinoodo mpokomahakia-Kune aroa-Ku.

¹⁹ Nde Ongkueke pinokomahakido, kanandiomo pau-Do i Ue, kombake tendeano koroido ondaedo, ranta ka domegagi mokoko'ii?

²⁰ Onaemo pu'uno kanandiomo pau-Do Ue Ala: Menteeano, tekuda-Ku ka mokulano aroa-Ku Aku motiio a mpo'ianga andio, a mia, pinotuwu, mperupa-rupa keu a mpada, ka a hasilino wita. Tekuda atuu ta tensila ka nahi pinokompepate.”

Pompopoto'oria a tongku anu motea aroa 7:21-28

²¹ Kanandiomo pau-Do Ueno luwuakoano, Ue Alado to Isaraeli, ”Tiangiomo koa pesomba tinunumu a mpesomba sinumbelemu ka kaanomo bauno!

²² Mentee ntu'u, nahi Kupepau ke mompowee parenta a uempu'umiu mongkona pesomba tinunu ka pesomba sinumbele tempono Kuwawa ira mpeluarako inso i wita Masiri.

²³ Butu koa onae ndio anu Kuparentaako iramo: Perorongeakonomo pau-Ku, asalakono Aku gagi Ue Alamiu ka omiu gagi bawaa-Ku, ka tondaomo luwuno sala anu Kuparentaakomiu, ka imoiko tumuwumiu!

²⁴ Sine nahi domebehe mperorongeakono ke menta'oo birido, tendeano mentondao luwuno tinoo ka moteano aroado anu mosa'o, ka ondae mpopokitao bungkudo ka komba arodo.

²⁵ Mompu'u tempo dompeluarako uempu'umiu inso i wita Masiri hawe oleo andio, Kutena ira mpiha luwuno nabi ndi omiu, luwuno tetenaa-Ku, oleo me'eu oleo, motilalo mpiha.

²⁶ Sine, nahi domebehe mperorongea-Kune ke mpo'aroo birido. Tendeano motea palowe'udo, mpoweweu lalu mosa'o sekonopo uempu'udo.

²⁷ Maupo upohaweako ira luwuno pau andio, nahi ira mperorongeakomu, ka maupo upebooliako ira, nahi ira mesangkiko.

²⁸ Onaemo pu'uno, pauako iramo: Ndiomo tongku anu nahi behe merorongeakono pau-Do i Ue, Ue Alado, ka nahi dobehe mpontarima pohuku! Moleono aroado pingkoomo, tepahihiomo inso a ngangado.”

Pompesombaia lahumoa ta tinadi 7:29–8:3

²⁹ Keruomo wuu a ulumu ka tadiomo! Ponsabangimo a luwuno pongku londa, hangano nami Dotarimao i Ue ka tumadio inule anu kona tekuda-Do!

³⁰ Mentee ntu'u, to Yehuda mpoweweu iramo hapa anu mosa'o a pongkita-Ku, kanandiomo pau-Do i Ue. Domenaaomo luwuno lahumoado anu mokoburu a raha anu nineeako montonda nee-Ku, ira mengkokoburutio.

³¹ Mpowangu iramo luwuno po'ianga pompesombaia meneeako Topeti i Lembono Beni-Hinomi pontunuado anado tama ka beine. Mongkona atuu nahi Kuhori meparentaako ka nahi hori hina a laro aroa-Ku.

³² Hangano atuu, menteeano, tempono ta hawe, kanandiomo pau-Do i Ue, nine mia nahi ta pauo mbo'u ”Topeti” ka ”Lembono Beni-Hinomi”, tendeano ”Lembono Ponsumbelea.” Ira mpokaburu wata ngkoroi i Topeti hangano makura po'ianga,

³³ maupo wata ngkoroido tongku andio gagi kaangado manu-manu i laro meene saru luwuno kondehora a wita motu'i nahina anu monsosanggoli.

³⁴ A luwuno kotano Yehuda ka luwuno sala i Yerusale Aku mokompena-naao suara mawongkoa ka po'undea, suarano umbungkori tama ka umbungkoroi beine, hangano wita atuu ta gagi anu terawoa.