Yeremia 6 - Wunta Mempori

Masolaa anu ta umaluo Yerusale ka Yehuda 6:1-26

¹ Pontuturakomo pelimba, hei luwuno to Benami, inso i tonga-tongano Yerusale! Puuriomo tawuwua i Tekoa, ka wuatakonomo ahu gagi petondoni i wawono Beti-Keremi! Hangano masolaa momporaomo inso i utara, asa masolaa langkai.

² Nde ana beine i Sioni mengkenake kana pada anu lalu pinekokono,

³ Luwuno puu mpopakambi mehawe ndi onae saru bawaano pinotuwudo. Domempasao luwuno kemado melimbuo, singge mia kumaano tiano.

⁴ ”Patindaomo peteaa umewaio; aiwamo tomelako mposapoi tempono ntonga oleo!” ”Memasola kitamo, hangano moriniomo oleo, eo-eo ngkiniwia olaiomo!”

⁵ ”Aiwamo tomelako mposapoi tempono wongi ka tomerawo-rawoo benteno!”

⁶ Hangano kanandiomo pau-Do Ueno luwuakoano, ”Tuehi iramo keuno ka howuomo wita gagi rereno Yerusale! Onaemo kota anu asalakono hinuku! Butu pompokonsiia mpena i larono!

⁷ Kana mata uwoi mowaao uwoi molinono, kanatuumo kota atuu saru wineweu mosa'o. Pompokonsiia ka pobobarasaia teronge i larono, marasai ka mobela wela tengkita i aro-Ku.

⁸ Tarimaomo pohuku, hei Yerusale, ka si Kubintako, ka si Kuweweuko boni-boni, gagi wita anu nahina palilino!”

⁹ Kanandiomo pau-Do Ueno luwuakoano, ”Po'ineeomo anu da tebinta inso a nto Isaraeli ka ipingko inopu kana teweweuno keu anggoro. Walimo tandeo kaemu kana anu mo'opu anggoro a luwuno rangkano.”

¹⁰ Ndi semake asalakono aku mepau ka mompowee pepopoto'ori, ka dobehe mporonge? Mentee ntu'u, birino tetutuwi, nahi domporonge! Mentee ntu'u, pau-Do Ue gagi po'unde-unde, nahi dompe'eheo!

¹¹ Ongkue mbo'u bukeako pontekudaako-Do i Ue, mokendo akumo meteao. ”Uwuomo atuu a wawo nana'ote kodei a nsala, ka a wawo pepumpuado mangalitau mperonga-ronga. Mentee ntu'u, moiko tama maupo beine ta rinako, mia mota'u mbo'u ka anu tende ntinuwu.

¹² Luwuno rahado ta pineweengako a mia susua, leredo mbo'u ka kombiado. Mentee ntu'u, Aku tumandeo kae-Ku a mpalilino wita andio,” kanandiomo pau-Do i Ue.

¹³ ”Hangano, inso anu lalu kodei hawe anu lalu langkai i olodo, luwuno mpo'ungke me'uraa, moiko nabi maupo sando mpesomba luwuno mpompopo'oo.

¹⁴ Ondae mpopakuli mobelado bawaa-Ku kana-kana mobela kodei, dompotae: Rodoa! Rodoa!, kahinaano nahina rodoa.

¹⁵ Bakanaano ondae memokoko'ii, hangano ondae mpoweweu hapa anu mokoburu. Sine maupo tedei nahina mokoko'iido ka nahi domponto'ori mokoko'ii. Onaemo pu'uno ira ntebangku i olodo mia anu ntebangku; ira ntebangkuako tetidu i tempono Kuhuku ira, pau-Do i Ue.”

¹⁶ Kanandiomo pau-Do i Ue, ”Pentademo a luwuno sala ka kitaomo, pesikenoakonomo luwuno sala inso a tempo se'eluno, isua hinao sala anu moiko, tondaomo atuu, ka komiu mpohawe rodoano sumangamiu. Sine dompotae: Nahi kimebehe mentondao!

¹⁷ Kupotoro iramo anu dumagai komiu, pau-Ku: Pekokoongakonomo unino tawuwua! Sine dompotae: Nahi kimebehe mpekokoongakono!

¹⁸ Onaemo pu'uno rongeomo, hei luwuno tongku, ka to'oriomo, hei bawaa, hapa anu ta gagi ndi ondae!

¹⁹ Rongeomo, hei tolino! Mentee ntu'u Aku mompotii masolaa a tongku andio, gagi poko'ariano inso a luwuno tinoodo, hangano nahi dompekokoongakono pau-Ku ka domentarimao pompaguru-Ku.

²⁰ Hapake tuduno ndi Ongkue impowawa dupa inso i Sieba ka towu anu moiko inso i wita anu olai? Nahi Kupekono ira pesomba tinunumiu ka luwuno pesomba sinumbelemiu nahi pokonsanaa Aku.

²¹ Onaemo pu'uno kanandiomo pau-Do i Ue: Mentee ntu'u, Aku monaa watu tetidua i arodo tongku andio, ka dontebangku tetiduako onaeno; moiko luwuno ama maupo luwuno nana'ote, saru mbo'u pehori raha ka walino, luwudo ira memate.”

²² Kanandiomo pau-Do i Ue, ”Mentee ntu'u, asa tongku ta aiwa inso i wita utara, asa tongku anu langkai ira mpelelu me'aiwa inso i tompano tolino.

²³ Ondae mpopake pana ka kansai; ondae melambaha ka nahi dompompehohawa. Suarado kana u'uruno tahi, ondae mpesawi a ngara, te'atora kana mia lumako metea, umewaiko, hei ana beine Sioni!”

²⁴ Kimerongeomo leleno, kaemami molemaomo. Masukaraa kumungku kami, mpompemahaki kana beine anu me'ana.

²⁵ ”Si peluarako a mpada, ke melempa a nsala, hangano hinao iwali meponai, ka pompokodoito isuamo koa!”

²⁶ Hei ana beineno tongkuku, pokonaomo sawu po'inombo, ka pelundi-lundimo a pampawu! Pompemasusamo kana mompemasusaako ana asa-asano, saru ponsabangi anu mo'o'au! Hangano nahi kinookoo ta hawe pompepate sumapoi kita.

I Yeremia gagi puu pomparesa bawaa 6:27-30

²⁷ Kupotorokomo i olodo bawaa-Ku gagi puu pomparesa, gagi puu podagai omue asalakono poposoo, ka paresao leludo.

²⁸ Luwudo lano wela me'ewa, mpelempa ngkoraane-ngkoramai mpotetewehi mia susua; ondae kana mala ka labu. Luwudo mpelelu mosa'o!

²⁹ Balo pompuuri pinuriomo, sine anu meluarako inso a api butu tima mo'ito. Nahina tuduno pompokolono iwineweu mpiha, mia memosa'o gaudo nahi teponsia.

³⁰ Ondae pinau salaka nahi tinarima, hangano nami Dotarima ira i Ue!