Yeremia 51 - Wunta Mempori

Luwuno tongku inoluako umewaio Babeli 51:1-33

¹ Mepau Iramo i Ue, ”Menteeano, Aku lumeluo ndi Babeli, a mpalilino witado to Kasidimi, asa roso poropu.

² Aku tumena ira puu mpoduku melako i Babeli anu ta dumukuo ka anu ta rumoahi morinao witano, hangano domengkaduo inso a luwuno siuno a oleo masolaa.

³ Asalakono puu mpepana motosio panano a mia anu mompotosi ka a mia anu melemba labu! Si mpehohawa ira mangalitauno, ropu iramo luwuno sorodaduno!

⁴ Mia anu mempinepate ta matumbole i witado to Kasidimi ka anu mapari mobelano a luwuno pesalaano,

⁵ sekono Isaraeli ka Yehuda nahi Dobintao Ue Alano, Ue Alano luwuakoano gagi tuwu beine, hangano witado to Kasidimi atuu bukeako sala ndi Ondae Anu Tedoa Mempori, Ue Alado to Isaraeli.

⁶ Polaimo inso i tonga-tongano Babeli, asalakono sompo mia kumaduduio penaano, ka si merinopu hangano salado! Hangano onaemo andio tempo pombaloa-Do i Ue; Ira mompowee pohuku ndi onae.

⁷ Babeli horio gagi piala wulaa a ngkae-Do i Ue anu mokomolanguo asa wawontolino. Luwuno tongku mpo'inu anggorono, onaemo pu'uno luwuno tongku gagi mpekombe.

⁸ Mepobingko Babeli tedonta ka terawo-rawo. Sabangiomo onae! Alaomo balasee pakulino mobelano, bara'ura ta koa tompa!

⁹ Kami mpokotompao Babeli, sine nahi ta tompa. Bintaomo onae, aiwamo tompekule singge mia lumako i witano! Mentee ntu'u, pohukua haweomo i langi, tehaweomo a nseru!

¹⁰ Doweweuomo i Ue mengkaa luwuno menteeto; aiwamo tomentutuluo i Sioni wineweu-Do Ue, Ue Alato!

¹¹ Pokomontasoomo ana mpana, patinda iramo kanta! Doleluomo i Ue rosodo luwuno mokoledo to Midia, hangano tinoo-Do a nto Babeli onaemo ira rumopuo: onaemo pombalo-Do i Ue, pombalo hangano raha mempori-Do!

¹² Tandeako iramo bandera luwuno rere watuno Babeli, pokorosoomo podagaia! Naa iramo puu mpodagai, patindaomo pontowokia! Hangano, Dosongkaomo i Ue ka weweuo mbo'u hapa anu pinau-Do te'aro a mpalilino Babeli.

¹³ Hei omue anu mo'ia umpeda uwoi anu hadio ntu'u, anu hadio ntu'u a laro ngkaea, tompaano tumuwumu haweomo, tidano tumuwumu haweomo!

¹⁴ Ondae Ueno luwuakoano mesumpa Iramo a nee-Do Ondae-Do: Maupo Kuweweuko bukeako mia kana kosume, sine mia ta mebooliako pohio ponangiamu.

¹⁵ Ondaemo i Ue anu mokogagiakono roso-Do tolino, saru ponto'ori-Do tumeahakono wawontolino, ka saru molinono pompewowolo-Do wileo langi.

¹⁶ Tewala Dopoporongeo suara-Do, u'uruomo uwoi i langi. Ondae wuatakono gawu inso i tompano tolino, mepansariako koliki tumondao usa, ka wawao angi meluarako inso a mponaapa-Do.

¹⁷ Sompo mia mengkaa benge-benge, nahina ponto'orino, ka sompo anu pande mo'angga wulaa gagi mokoko'ii hangano tinaha wineweuno. Hangano tinaha tinawa butu pompopo'oo, nahina penaa i larono.

¹⁸ Luwuno atuu nahina pengkonaano, inangga anu gagi pompasinggiri, ka ta tampula i tempo pohukuano.

¹⁹ Komba kanatuu Ondae anu gagi Tiano i Yako, hangano Ondaemo anu weweuo luwuakoano, ka Isaraeli onaemo sukuno mia-Do; Ondae Ueno luwuakoano onaemo nee-Do!

²⁰ Omuemo palu langkai-Ku, parewa mpetea: Saru omue Aku merawo-rawo ira tongku, saru omue Aku rumopu ira poparentaa,

²¹ saru omue Aku merawo-rawoo ngara ka anu mesawikio, saru omue Aku merawo-rawoo kareta ka anu me'ulaio,

²² saru omue Aku merawo-rawoo tama ka beine, saru omue Aku merawo-rawoo mia mota'u ka mia mongura, saru omue Aku merawo-rawoo mangalitau ka ana beine,

²³ saru omue Aku merawo-rawoo puu mpopakambi ka bawaano bimbano, saru omue Aku merawo-rawoo puu mpelere ka sapi pompadekono, saru omue Aku merawo-rawo ira petewawano wita pinabawaino ka anu mempabawa!

²⁴ Aku mombalo ndi Babeli ka a luwuno palilino witado to kasidimi hangano luwuno mosa'oa anu domeweweuomo ndi Sioni, i arono matamu, kanandiomo pau-Do i Ue.

²⁵ Menteeano, Aku gagi ewaimu, hei torukuno poropu, kanandiomo pau-Do i Ue, anu rumopuo asa wawontolino! Aku tumandeo kae-Ku ndi omue, lumundiko inso a pongku watu, ka weweuko gagi torukuno api anu mateomo.

²⁶ Mia nahi ta umalao watu siuno ke watu pondasi inso ndi omue, sine omue kogagi po'ianga anu boni-boni nahina tampulaano, kanandiomo pau-Do i Ue.

²⁷ Tande iramo bandera i tolino, puuriomo tawuwua i olodo luwuno tongku, patinda iramo tongku umewaio Babeli, tena iramo poparentaa umewaio: Arara, Mini ka Asikenasi! Potoroomo asa mia tadulako umewaio, wawa iramo ngara kana bawaano kosume!

²⁸ Patinda iramo tongku umewaio, luwuno mokoledo to Midia saru luwuno petewawano wita pinabawaino ka luwuno anu mempabawa, saru mbo'u wita anu i totono pabawano!

²⁹ Tolino lelu ka mondidi-ndidi, hangano tinoo-Do i Ue te'aro i Babeli kontongaano inangga, ta wineweu wita Babeli gagi londa nahina palili.

³⁰ Luwuno sorodaduno Babeli mpenaa-naa iramo mpetea, ondae mpo'ia mpiha a luwuno bente pekorahakoa. Mosiado tampulaomo, ondae megagi kana beine. Luwuno po'iangado sinongkoomo, luwuno lansono pewowado tepuduomo!

³¹ Tinena anu asa molai tepohaweakono anu susua, puu mpowawa lele anu asa tepohaweakono anu susua, ka ipaleleo ndi mokole i Babeli, nine kotano pinongko'alaomo inso a luwuno siuno,

³² luwuno pesakiakoa pinentorokiomo, luwuno epe pekorahakoa sinongkoomo, ka luwuno sorodadu medoito.

³³ Hangano kanandiomo pau-Do Ueno luwuakoano, Ue Alado to Isaraeli: Ana beineno Babeli kana ponsesaa tempono ilinolanda! Nahi tehine mbo'u ta hawe tempono sumowi.

Babeli hinuku hangano imokoburuakono Isaraeli 51:34-44

³⁴ Ongkue kinaa, irawoo i Nebukanesa, mokole i Babeli, iweweuo kana mangko mooa. Onae tumele aku kana ule naga, onae umihiiakono kompono kaangaku anu mo'ahi, ka i'amba lumua aku.

³⁵ Po'ineeomo pontunduhi ndi ongkue ka pe'etuku umaluo Babeli, potaedo palilino Sioni, po'ineeomo reaku ka i'alu ira palilino witado to Kasidimi, potaeno Yerusale.

³⁶ Onaemo pu'uno, kanandiomo pau-Do i Ue: Menteeano, Aku kumorahakono kara-karamu, ka moweweuakomu pombaloa: Aku mokomo'areo tahino ka weweuo mata uwoino mo'are;

³⁷ Babeli ta gagi howuno anu terawo, pewuniado serigala, asa anu mongkokongiri ka ipomisuakono, hangano nahina palili.

³⁸ Ondae mperonga-ronga mpengaoli kana singa mongura, bamburu kana anano singa.

³⁹ Tempono inehedo haweakoomo ntu'u, Aku mompatindaako ira inua, weweu ira memolangu, onaemo ka dotedoa memawongko ka do'amba ntekoturi mpiha, nahi dompewangu mbo'u, kanandiomo pau-Do i Ue.

⁴⁰ Aku mobangku ira ka domensinumbele kana anano bembe, kana luwuno bimba lakino ka bembe lakino.

⁴¹ Sesaki tedoa pinau, ka wita inunde-unde i asa wawontolino pinentoroki! Babeli tedoaomo gagi mongkokongiria i olodo luwuno tongku!

⁴² Tahi mewuatakoomo sumampuo Babeli, luwuno bombano anu u'uru isampuomo.

⁴³ Luwuno kotano gagiomo po'ianga londa, gagi wita anu motu'i ka pada malua, wita anu nahi po'iangario maupo isema ka maupo te'asa mia nahi telaloio.

⁴⁴ Aku humukuo Pinesombai Bela i Babeli, ka lumuarakono inso a ngangano hapa anu tineleno. Luwuno tongku nahi ira mewaa mbo'u ndi onae; rere watuno mbo'u Babeli tehoaomo.

Dandi tepotolaano Isaraeli inso i Babeli 51:45-58

⁴⁵ Peluarakomo inso i tonga-tongano, hei bawaa-Ku! Asalakono sompo mia kumaduduio penaano inso a ntekuda-Do i Ue anu tensila atuu!

⁴⁶ Si mondende aroamu ka doito hangano lele anu teronge i wita andio: tewala ta'u andio hawe lele andio, ka ta'u tudano lele atuu, tewala gagi pontunduhia i wita andio ka anu mempabawa umewaio anu mempabawa.

⁴⁷ Onaemo pu'uno menteeano, tempono ta hawe, Aku humuku ira tinahano Babeli. Luwuno witano ta gagi mokoko'ii ka luwuno miano anu pinepate ta matumbole i tonga-tongano.

⁴⁸ Langi ka tolino saru luwuno anu kongko i larono ira mpebooli memawongko mongkona Babeli, tempono anu mponsolangi mehawe ndi onae inso i utara, kanandiomo pau-Do i Ue.

⁴⁹ Babeli ta tedonta hangano to Isaraeli mempinepate mengkena kana tedontado mia anu mempinepate i asa wawontolino hangano Babeli.

⁵⁰ Omiu anu mentola inso a mponai, imelakomo, si butu mpentade! Pewowolo Iramo i Ue inso olai ka po'ineeomo Yerusale ka ipe'umbaako mbo'u a laro mpinewowolomiu.

⁵¹ Omami memokoko'ii, hangano mporonge kamimo pontetewehi, mokoko'iia mokoburutio rupamami, hangano dompewinsokiomo mia mehawe luwuno po'ianga mempori a Raha-Do i Ue.

⁵² Onaemo pu'uno menteeano, tempono ta hawe, kanandiomo pau-Do i Ue, nine Aku humuku ira tinaha lahumoano, ka luwuno witado mia anu mentinobo ta meraali.

⁵³ Maupo mewuatako i langi Babeli ka weweuo mantandeno benteno nahi pinokorangkuhi, a parenta-Ku ira mehawe ndi onae anu mponsolangi, kanandiomo pau-Do i Ue.

⁵⁴ Rongeo! Peraali inso i Babeli ka terawoa langkai inso i witado to Kasidimi!

⁵⁵ Hangano, Ondae i Ue sumolangio Babeli ka mokompenaa-naao suarano anu langkai. Maupo luwuno bombano umu'uru kana uwoi anu langkai ka moluarako unino u'uru,

⁵⁶ sine i Babeli ta hawe anu monsolangi. Luwuno sorodaduno ira merinako ka luwuno panado ta pinudu, hangano Ondae i Ue onaemo Ue Ala anu mombalo, manasaomo Ira moweweu pombaloa!

⁵⁷ Aku weweu ira memolangu mia pinemota'uno, luwuno miano anu pande mosongka, luwuno bupatino, anu mempabawa, ka luwuno sorodaduno, ranta ka dontekoturi nahina tampulaano, ka nahi ira mpewangu mbo'u, kanandiomo pau-Do Mokole, Ueno luwuakoano nee-Do.

⁵⁸ Kanandiomo pau-Do Ueno luwuakoano: Luwuno rere watuno Babeli anu mokapa ta pinokomerete, ka luwuno pewowa langkaino anu mantande ta sinongko. Luwuno tongku mpe'iseiako anu nahina tuduno ka luwuno suku tongku tiano api, ka ondae nahina rosodo.”

Pontadia wunta pinau anu ta gagi mongkona terawono Babeli 51:59-64

⁵⁹ Pe'oliwi anu iweeakono Nabi Yeremia ndi Seraia anano i Neria anano i Mahasea, tempono i Seraia lumako meronga i Sedekia, mokole i Yehuda, i Babeli a nta'u ko'opaa poparentaano. I Seraia onaemo petewawa sombori langkanae.

⁶⁰ Iburiomo i Yeremia a laro asa wunta luwuno masolaa anu ta umaluo Babeli, luwuno pau anu binuri mongkona Babeli.

⁶¹ Motae i Yeremia ndi Seraia, ”Tempono uhawe i Babeli, pete'umalao ka upokobasao luwuno pau andio.

⁶² Ka i'amba pepaumo: Ondae i Ue, mepau Komiumo mongkona po'ianga andio nine Komiu mokotampulao, ranta nahina mbo'u anu mo'ia i larono, moiko mia maupo pinotuwu, ka po'ianga andio ta gagi boni-boni nahina tampulaano!

⁶³ Tewala umarikomo basao wunta andio, tanggoomo asa watu ndi onae, ka u'amba metadiakono i tonga-tongano Koro Eparata

⁶⁴ ka potaemo: Kanandiomo Babeli ta pinotondu ka nahi ta me'umbaako mbo'u, hangano masolaa anu Kupotiio ndi onae; nahina rosodo.” Hawe i ndi'ai luwuno pauno i Yeremia.