Yeremia 50 - Wunta Mempori

Mongkona Babeli

¹ Pau anu pinohawe-Do i Ue molalo Nabi Yeremia mongkona Babeli, witado to Kasidimi,

² ”Pauomo i olodo luwuno tongku ka paleleomo, wuatako iramo bandera ka paleleomo, si wunio, pauomo: Babeli pinongko'alaomo, Pinesombai Bela pinokoko'ii, i Merodaki tededengke! Luwuno tinahano pinokoko'ii, luwuno lahumoano ntededengke!

³ Hangano, asa tongku lumako sumapoio inso i utara, weweuo witano gagi boni-boni; nahina mbo'u anu mo'ia i larono, moiko mia maupo kondehora, luwuno melako mpolai.

⁴ I tempo atuu, kanandiomo pau-Do i Ue, to Isaraeli ira mehawe, mperonga to Yehuda; ira mpelempa saru mpengese ka umungke Ira i Ue, Ue Alado.

⁵ Ondae mpesikenoakono sala lumako i Sioni, i ra'aimo te'aroano rupado. Ondae me'aiwa ka tepo'asaako Ira i Ue, a laro mpedandia nahina tampulaano anu nahi ta kinolupe!

⁶ Bawaa-Ku kana ira bimba ntetadi; luwuno puu mpopakambido weweu ira ntesaa, weweu ira mpelakopi a luwuno torukuno. Ondae mpelempa inso a ntorukuno melako a pongku ka mengkolupeo po'ianga pepomboleado.

⁷ Isemamo koa anu tepohaweako ira, ikaa ira, ka luwuno iwalido mpotae: Nahi kimensala! Hangano mentehala iramo ndi Ondae i Ue, po'iangano menteea, Ondae i Ue, pomperorohiado uempu'udo!

⁸ Impolaimo inso i tonga-tongano Babeli, inso i witado to Kasidimi! Peluarakomo! Gagimo kana luwuno bembe lakino anu gagi petewawa a bawaano!

⁹ Hangano menteeano, Ongkue lumeluo ka mokotesingkao te'aro i Babeli asa tepumpuado tongku langkai inso i utara. Ondae mpo'atora baresi ira me'ewaio, insomo i ra'ai kota atuu ta pinongko'ala. Luwuno panado kana sorodadu anu pande ntu'u, anu nahi hori mekule saru kae mooa.

¹⁰ Witado to Kasidimi ta gagi rontua, luwuno anu rumontuo ta tende aroano, kanandiomo pau-Do i Ue.

¹¹ Maupo impo'unde ka memawongko ntu'u, hei mia anu mporontu pine'ue-Ku, Maupo impelonso-lonso kana ana nsapi a ntonga mpada, ka mpekiili kana ngara lakino,

¹² sine, inemiu tedoa memokoko'ii, beine anu mpe'anaakomiu ntekoko'ii! Kitao, onae ta gagi anu pokotompa inso a luwuno tongku, gagi pada one, wita motu'i, pada malua!

¹³ Hangano tekuda-Do i Ue wita atuu nahi ta pino'iangi mbo'u, luwuno ta gagi boni-boni. Sompo mia anu lumaloo Babeli ta tekokodoho ka momisu hangano luwuno petunduhi anu pinemahakino.

¹⁴ Atoraomo baresimu sumapoio Babeli inso a luwuno siuno, hei luwuno puu pompana! Potolaomo pana te'aro ndi onae, si pesosalao ana mpana, hangano onae tehala ndi Ondae i Ue!

¹⁵ Peboolimo sapoio inso a luwuno siuno! Onae metenangiomo, luwuno benteno ntebangkuomo, luwuno rere watudo tehoaomo! Mentee ntu'u, onaemo pombalo-Do i Ue! Weweuomo pombaloa ndi onae, weweuomo ndi onae kana anu umari wineweuno!

¹⁶ Pokotampulaomo anu morawo inso i Babeli ka anu sumowi i tempono konsowia! Ka iteliahako inso a mponai poropu andio, sompo mia ta mekule a tongkuno, sompo mia ta molai lumako i witano.

¹⁷ I Isaraeli kana bimba anu tesiarawo, domensaario singa. Amba-ambano mokoledo to Asuri kumaano, ka poko'ariano kanandio-andio i Nebukanesa, mokole i Babeli, kumarasi ira wukuno.

¹⁸ Onaemo pu'uno, kanandiomo pau-Do Ueno luwuakoano, Ue Alado to Isaraeli: Menteeano, Aku humukuo mokole i Babeli ka witano, kana Kuhukuomo mokoledo to Asuri.

¹⁹ Sine, Aku mokuleo i Isaraeli i tonga mpada, ka ipongkaa ewo i Karameli ka i Basani, ka imowohi i wawo mentorukuno Eparai ka i Gileadi.

²⁰ I tempo atuu, kanandiomo pau-Do i Ue, mia ta mo'ungke salano i Isaraeli sine nahi pohawe, ka halano i Yehuda sine nahi pohawe, hangano Aku umoniniako ira halado mia anu Kupo'inee ira mentuwu.

²¹ Imelakomo mensapoio wita Merataimi, ka mensapoio palilino Pekodi! Pepate ira ka ropu iramo, kanandiomo pau-Do i Ue, weweuomo kana ntu'u anu Kupeparentaako!

²² Rurunduno peteaa i wita atuu, terawo-rawoa langkai gagiomo!

²³ Tedoa tepuro ka terawo paluno asa wawontolino! Babeli gagiomo tedoa mongkokongiria i olodo luwuno tongku!

²⁴ Aku monta'oakomu pompete'umala, ka omue kona oho, hei Babeli, nahi upokonto'orio. Omue hinawe ka kona rako mbo'u, hangano u'ewai Iramo i Ue.

²⁵ Do'ungkahiomo i Ue ponaapa parewa mpetea-Do ka lumuarako ira parewa mpetea bamburu-Do, hangano hinao anu asalakono Ira umanggao Ue Alano luwuakoano i witado to Kasidimi.

²⁶ Sapoiomo inso a luwuno lakoa, ungkahi iramo si'eno, howuomo ihino kana hinowu ka ropuomo, si hina anu da tuwu!

²⁷ Pepate ira luwu sapino, po'ineeomo dompetii a mposumbelea! Memasola iramo, hangano tempono haweomo, tempo domehinuku!

²⁸ Rongeo! Luwuno anu Mpolai ka mia anu mentola inso i wita Babeli aiwa mempauo i Sioni mongkona pombalo-Do i Ue, Ue Alato, pombaloa hangano Raha Mempori-Do.

²⁹ Wawa iramo puu pompana umewaio Babeli, luwuno anu mompadii pana! Impekemamo mengkaduo, ka si hina anu tola! Pombalomo ndi onae menunu saru wineweuno, weweuomo ndi onae kana anu wineweuno! Hangano onae mompelangka-langkai ndi Ondae i Ue, ndi Ondae Anu Tedoa Mempori, Ue Alado to Isaraeli.

³⁰ Onaemo pu'uno, luwuno mangalitauno ira memate a luwuno tanalapano, ka luwuno sorodaduno ira memate i tempo atuu, kanandiomo pau-Do i Ue.

³¹ Menteeano, Aku gagi ewaimu, hei omue anu mompelangka-langkai, kanandiomo pau-Do Ueno luwuakoano, hangano haweomo tempomu, tempono Aku humukuko.

³² Mia anu mompelangka-langkai atuu ta tetidu tedonta ka nahina anu tumandeo. A luwuno kotano Aku molangao api anu ta kumaano luwuno anu a mpetengi-tengino.

³³ Kanandiomo pau-Do Ueno luwuakoano: To Isaraeli tepokonsii meronga saru to Yehuda. Luwuno mia anu mentawa ira kongko tumaha ira, nahi dobehe mpotola ira.

³⁴ Sine Puu Pontolosido moroso, Ondae Ueno luwuakoano nee-Do. Manasa Ira tumeahakono kara-karado, ka Dopoweeakono rodoa i tolino, sine tewukaa a mpalilino Babeli.

³⁵ Ponai ta umalu ira to Kasidimi, kanandiomo pau-Do i Ue, umalu ira palilino Babeli, umalu ira mia pinemota'uno ka luwuno miano anu mponto'ori mentee!

³⁶ Ponai umalu ira mia mompau nahi manasa ta gagi, ka mengkaaomo mebenge-benge ira! Ponai umalu ira sorodaduno, onaemo ka domedoito!

³⁷ Ponai umaluo ngara ka karetano, umalu ira sorodadu mentinambo anu i tonga-tongano, onaemo ka domegagi kana beine! Ponai umaluo ponaapa arataano, onaemo ka dompomuruo mia!

³⁸ Ponai umaluo luwuno uwoino, onaemo ka imo'are! Hangano wita atuu witano luwuno tinaha, ondae mpelelu kana mia mekombe a luwuno lahumoa!

³⁹ Onaemo pu'uno luwuno kondehora pada one saru dahu a ntobu ira mpo'ia i ra'ai, kanatuu koa mbo'u manu-manu unta ira mpo'ia i larono. Wita atuu kanatuumo mpiha nahina mbo'u mo'iangario ka nahi ta pino'iangario mbo'u mapa'api-api inule.

⁴⁰ Kana i ndi'ipua i tempono Ondae Ue Ala wowangunsuleo Sodomo ka Gumora saru luwuno kota pehori-horino, pau-Do i Ue, kanatuumo nahi ta hina mbo'u mia anu rodo i ra'ai ka maupo te'asa anano mia nahi ta mo'ia mbo'u i larono.

⁴¹ Kitao, asa tongku ta aiwa inso i utara, asa tongku anu langkai. Hadio mokole ira mpelelu me'aiwa inso i tompano tolino.

⁴² Ondae mpompake pana ka kansai; ondae melambaha ka nahi domponto'ori mpompehohawa. Suarado kana u'uruno tahi, ondae mpesawi a ngara, te'atora kana mia lumako metea, umewaiko, hei ana beine Babeli!

⁴³ Irongeomo mokole i Babeli mongkona ondae, kaeno gagiomo molema, ipabawaio ma'isoa, mompemahaki kana beine anu me'ana.

⁴⁴ Menteeano, kana singa meluarako inso a ntobu mongurano Koro Yarade sumapoio pada pompakambia, kanatuumo Aku weweu ira mpepobingko mpolai inso i wita atuu ka mpotoroo onae anu bininiki-Ku. Hangano isemake anu kana Ongkue? Isemake anu mosia tumuntu Aku? Isemake puu mpopakambi anu polio umaropi Aku?

⁴⁵ Onaemo pu'uno rongeomo pomputusi anu Do'alaomo i Ue tiano Babeli ka luwuno tinoo anu Doweweuomo tiano witado to Kasidimi: Menteeano, maupo anu lalu molema i olodo bawaano bimba ta rinende. Menteeano, pada pompakambiado ta mongkokongiriako ira.

⁴⁶ Tolino ta lelu hangano lele nine Babeli pinongko'alaomo; ponsabangido ta teronge i olodo luwuno tongku!”