Yeremia 49 - Wunta Mempori

Mongkona inuleno i Amoni 49:1-6

¹ Mongkona inuleno i Amoni. Kanandiomo pau-Do i Ue, ”Nahinake anano i Isaraeli, nahinake eu ngkoroino? Tembio i Milikomi ka ipe'umbuo Gadi, ka tongkuno mpo'iangario luwuno kotano?

² Onaemo pu'uno, menteeano, tempono ta hawe, kanandiomo pau-Do i Ue, nine Aku moporongeo pohio peteaa ndi Raba inuleno i Amoni. Kota atuu ta gagi howuno anu terawo anu londa, ka luwuno kota kodeino ta sinongko. Isaraeli ta me'ue ira mia anu i ndi'ipua me'ueo, pau-Do i Ue.

³ Ponsabangimo, hei Hesiboni, hangano anu momperawo-rawo lumakoomo monsapoi, impeboolimo, hei ana beineno i Raba, pokonaomo sawu po'inombo, impo'inombomo, impelempamo telimbu saru mobela sinoreki, hangano i Milikomi ta lumako a pontadia meronga luwuno sando mpesomba ka mia pinemota'uno.

⁴ Omue tedoa mompelangka-langkaiako luwuno wita lembomu, lembomu anu mewalo, hei ana beine anu mebungkui Ira i Ue, anu momperorohi arataano ka motae: Isema anu mosia aiwa sumapoi aku?

⁵ Menteeano, Aku mompotii doitoa ndi omue kanandiomo pau-Do Ue Alano luwuakoano, inso a luwuno po'ianga a mpetengi-tengimu, komiu mempineweengako, singge mia a nte'aroano, ka nahina anu pumpu ira mia anu mpelakopi atuu.

⁶ Sine, umarino atuu Aku momuleo teweweuno i Amoni atuu, kanandiomo pau-Do i Ue.”

Mongkona Edomi

⁷ Mongkona Edomi. Kanandiomo pau-Do Ueno luwuakoano, ”Nahina mbo'uke ponto'ori mentee i Temani? Tetadiomoke pontimbanga inso a mia anu molino pinewowolodo, moboomoke ponto'orido anu mentee?

⁸ Pewolili ka polaimo, pewunimo a laro aa, hei palilino Dedani! Hangano, masolaa Aku motiio ndi Esau, i tempono Kuhukuo.

⁹ Tewala mehawe anu mpo'opu wua anggoro ndi omue, nahi ira mpobinta toreano po'opuado! Tewala mia monako hawe tempono wongi, ira mponsolangi tompa tinendedo!

¹⁰ Sine Kulolohiomo i Esau, Kuposabaomo luwuno po'ianga pewuniano, ranta nahi pokowunio mbo'u koroino. Inuleno memate iramo ka luwuno pepaekompono saru mbo'u luwuno pehori rahano nahina mbo'u.

¹¹ Binta iramo anamu nahina amado, Ongkuepo motuwu ira; po'inee iramo tuwu beinemu mpomperorohi ndi Ongkue!”

¹² Hangano kanandiomo pau-Do i Ue, ”Menteeano luwuno mia anu nahi pototono mo'inu ihino piala atuu i'inuo nahi inso i aroano, nde kana'umpe omue kotola inso a mpohuku? Omue nahi kotola inso a mpohuku, sine asalakono uminuo!

¹³ Hangano, mesumpa Akumo a nee-Ku, kanandiomo pau-Do i Ue, nine Bosora ta gagi boni-boni, tetewehia, terawo-rawo, ka totonaa, ka luwuno kotano ta gagi terawo-rawo nahina tampulaano.”

¹⁴ Kurongeomo lele inso ndi Ondae i Ue, asa mia tinena tinenaomo i tonga-tongano tongku, ”Pepumpumo, lakomo mponsapoi, rongamo mpetea!

¹⁵ Hangano menteeano, Kuweweuko kodei i olodo luwuno tongku, tinetewehi i olodo mia.

¹⁶ Pelelumu anu mompokodoito ka pompelangka-langkaino aroamu onaemo mopo'ooko, oo omue anu mo'ia a laro aano watu, anu mentoroki ira punsuno pongku! Maupo upoweweu senomu kana mantandeno senono manu-manu rajawali, Aku motiiko inso i ra'ai, kanandiomo pau-Do i Ue.

¹⁷ Edomi ta gagi boni-boni. Sompo mia anu lumaloo ta tekokodoho ka ta momisu hangano luwuno petunduhi anu pinemahakino.

¹⁸ Kana i tempono Sodomo ka Gumora saru luwuno kota pehorino Dowowangunsuleo, pau-Do i Ue, kanatuumo nahi ta hina mbo'u mia anu mo'ia mpiha i ra'ai ka maupo te'asa mia nahi ta hina mbo'u mia mo'ia i larono.

¹⁹ Menteeano, kana singa meluarako inso a ntobu mongurano Koro Yarade me'aiwa a mpada pompakambia, kanatuumo Aku weweu ira mpepobingko mpolai inso i wita atuu ka onae dompotoroo anu bininiki-Ku. Isemake puu mpopakambi anu polio umaropi Aku?

²⁰ Onaemo pu'uno rongeomo pomputusi anu Do'alaomo i Ue ndi Edomi ka luwuno tinoo anu Doweweuomo a mpalilino Temani: Menteeano, maupo anu lalu molema i olodo bawaano bimba ta rinende. Menteeano, pada pompakambiado ondaedo ta mongkokongiriako ira.

²¹ Tolino ta leelu hangano unino dontedonta; suara peboolido ta teronge i Tahi Teberau.

²² Menteeano, onae menee mompalari kana manu-manu rajawali, menae-nae ka wileo panino i wawono Bosora. Aroado pongkiarino Edomi i tempo atuu ta kana aroano beine anu mahaki me'ana.”

Mongkona Damasi

²³ Mongkona Damasi, ”Hamati ka Aripadi pinokoko'iiomo, hangano mporonge ira lele mosa'o; aroado mpondidi-ndidi medoito, kana tahi anu nahi pokorodo.

²⁴ Damasi gagi tepudu rosono, mewolili ta molai, danggarano mokodoitoo, ma'isoa ka mahaki me'ana pabawaio kana beine anu kontongaano me'ana.

²⁵ Mentee ntu'u, kota anu inunde-unde atuu binintaomo, kota ineheku!

²⁶ Onaemo pu'uno luwuno mia mongurano ira memate a luwuno tanalapano ka luwuno sorodaduno ira memate i tempo atuu, kanandiomo pau-Do Ueno luwuakoano.

²⁷ Aku molangao api a rere watuno Damasi, anu mokomo'aio luwuno benteno i Benihadadi.”

Mongkona luwuno suku tongku Ara 49:28-33

²⁸ Mongkona Kedari ka luwuno poparentaano Hasori anu ninangino i Nebukanesa, mokole i Babeli. Kanandiomo pau-Do i Ue, ”Lakomo sapoio Kedari, pepate iramo mia te'alaako i sabaano oleo!

²⁹ Po'ineeomo luwuno kema ka bawaano bimbado rinontu, luwuno mbo'u tenda ka luwuno pepatindado. Po'inee iramo untado winawa pinerongaako, ka po'ineeomo ndi ondae mia mpebooliako: Doitoa inso a luwuno lakoa!

³⁰ Pelulumo, tuturako polai, pewunimo a laro aa, hei palilino Hasori! Kanandiomo pau-Do i Ue. Hangano, i Nebukanesa, mokole i Babeli, mompotudaomo tinoo ndi omiu ka moweweu tinoono ndi omiu.

³¹ Imelakomo mensapoio tongku anu tuwu sanaa, anu mpo'ia merodo, kanandiomo pau-Do i Ue, ka anu nahina pewowa langkaino ke lansono, saru mo'ia asa-asano!

³² Luwuno untado ta gagi pomurua, ka pinotuwu anu hadio atuu gagi rontua! Aku sumiarawoo a luwuno mata angi ondae anu mengkeruo wuu a wiwino uludo. Inso a luwuno siuno Aku mompotii masolaa ndi ondae, kanandiomo pau-Do i Ue.

³³ Kota Hasori ta gagi pewuniado serigala, gagi po'ianga anu boni-boni nahina tampulaano; maupo te'asa mia nahi ta mo'ia mbo'u i ra'ai ka maupo te'asa mia nahi ta mo'ia mbo'u i larono.”

Mongkona Elami 49:34-39

³⁴ Pau-Do i Ue anu hawe ndi Nabi Yeremia mongkona Elami, a pompu'uano poparentaano i Sedekia, mokole i Yehuda:

³⁵ Kanandiomo pau-Do Ueno luwuakoano, ”Menteeano, Aku puduo panano Elami, po'iangano rosono.

³⁶ Aku mompotiiakono Elami opaa angi inso a opaa siuno langi ka sumiarawo ira a luwuno mata angi andio, ranta nahina tongku anu nahi domehaweio mia anu ntesiarawo inso i Elami.

³⁷ Aku weweuo Elami doito i arodo luwuno iwalino ka i arodo mia anu momporaakono penaano. Aku mompotii masolaa ndi onae, tekuda-Ku anu tensila, kanandiomo pau-Do i Ue. Aku tumenao ponai lumampui ira hawe ka Kupingko ira.

³⁸ Aku numaao poparentaa-Ku i Elami, ka Aku mokotampulao inso i ra'ai mokole ka luwuno mia pinemota'u, kanandiomo pau-Do i Ue.

³⁹ Sine, oleo lembuino Aku momuleo teweweuno Elami, kanandiomo pau-Do i Ue.”