Yeremia 48 - Wunta Mempori

Mongkona Moabi 48:1-47

¹ Mongkona Moabi. Kanandiomo pau-Do Ueno luwuakoano, Ue Alado to Isaraeli, ”Masolaomo ntu'u Nebo, hangano kota atuu rinawo-rawoomo! Kota Kiriataimi pinokoko'iiomo ka pinongko'ala! Kota bente atuu pinokoko'ii ka rinawo-rawo;

² tampulaomo marambano Moabi! I Hesiboni mia mpontooakono masolaano: Aiwa tompokotampulao gagi tongku! Omue mbo'u, hei Mademeni, kopinokongkomino, ilolampuiko ponai.

³ Rongeo! Pebooli inso i Horonaimi: Matea ka terawo-rawoa anu mongkokongiri!

⁴ Moabi terawo-rawoomo! Peboolido nana'oteno teronge meroku.

⁵ Mentee ntu'u, mia morake a mporakea Luhiti saru mengese. Mentee ntu'u, a nsala montindulu lumako i Horonaimi teronge pebooli mompemasusa hangano terawo-rawoa.

⁶ Pelulumo, kaduduiomo penaamu: gagimo kana kalide mo'ila i pada one!

⁷ Mentee ntu'u, hangano omue momperorohi a mpineko'aniakomu ka ponaapa arataamu, omue mbo'u kopinongko'ala; Kamosi ta lumako a laro pontadia, meronga luwuno sando mpesomba ka mia pinemota'uno.

⁸ Anu mponsolangi ira mehawe a sompo kota, nahina kota anu linalodo! Lembono ta terawo, wita motu'i ta tampula, kana anu pinau-Do i Ue.

⁹ Poweeakonomo panino i Moabi, ka ipenee meliahako; luwuno kotano ta gagi boni-boni, nahina mbo'u palili i larono.

¹⁰ Tetotonaaomo mia anu nahi weweuo anggaa-Do i Ue, ka tetotonaaomo mia anu nahi eheakono ponai-Do inso a mpo'uwua rea!

¹¹ Moabi tuwu sanaa mompu'u da imongura, onae tuwu rodo kana anggoro a wawo potonduano. Onae nahi tinawa inso a ngkusi anu asa a ngkusi anu susua, nahi hori mewinso a pontadia; onaemo pu'uno namino kongko mpiha ndi onae, ka woono nahi bali.

¹² Onaemo pu'uno, menteeano, tempono ta hawe, kanandiomo pau-Do i Ue, Aku tumena ira ndi onae puu mpo'angga anu ira mentawao, me'uwu ira kusino, ka mempeha ira take'ano.

¹³ Moabi ta gagi mokoko'ii hangano pinesombai Kamosi, kana suku Isaraeli gagi mokoko'ii hangano Beteli, pinerorohido.

¹⁴ Nde kana'umpe ka imemosia mpotae: Omami sorodadu, mia memoroso ka mosia a laro mpeteaa!

¹⁵ Anu ta rumawo-rawoo Moabi ka luwuno kotano melako iramo mpetea, luwuno mia mongura anu tebiniki mpetii iramo a mponsumbelea, kanandiomo pau-Do Mokole anu nee-Do Ueno luwuakoano.

¹⁶ Masolaano Moabi umpedaomo, urasa'ono tamo ronga hawe.

¹⁷ Sabangiomo, hei luwuno anu kongko a mpetengi-tengino, hei luwuno anu mento'orio neeno! Potaemo: Mentee ntu'u, tepuduomo pabawa anu iwawono ntu'u, tuko pompelangkai atuu!

¹⁸ Petiimo inso a marambamu ka pentoromo a wawo wita mokari, hei ana beine i Diboni anu tehineomo impo'ia! Hangano anu ta rumawo-rawoo Moabi lumakoomo sumapoiko, rumopuo luwuno kotamu anu mebente.

¹⁹ Pentademo a wiwi nsala ka paresaomo, hei palilino Aro'eri! Pesikenomo a mia anu mpolai ka anu tepotola, potaemo: Hapa anu gagiomo?

²⁰ Moabi pinokoko'iiomo, hangano onae rinawo-rawo! Ponsabangimo ka peboolimo, pauomo a ngkoro Amoni: Mentee ntu'u, Moabi terawo-rawoomo!

²¹ Pohukua me'aluomo i wita mantandeano, a luwuno kotano Holoni, Yahasi, Mepa'ati,

²² Diboni, Nebo, Beti-Dibalataimi,

²³ Kiriatami, Beti-Gamuli, Beti-Meoni,

²⁴ Kirioti, Bosora, ka luwuno kota i wita Moabi anu olai ka umpeda.

²⁵ Tepuduomo tandu rosono Moabi, ka tokia pabawano tepehaomo! Kanandiomo pau-Do i Ue.

²⁶ Weweuomo ka imolangu, hangano onae mompelangka-langkai ndi Ondae i Ue! Moabi ta melundi-lundi a laro kolua-luano, ka onae mbo'u gagi pengingisiado mia.

²⁷ Kombake hieno Isaraeli gagi mia tinawa ndi omiu? Nde hinawe i olodo mia mponakoke onae, onaemo ka ubitu-bitu ulu, sompo upepau mongkona onae?

²⁸ Binta iramo kota ka po'iamo a pongku watu, hei palilino Moabi! Gagimo kana manu-manu marapatii anu meseno a rere ngangano aa.

²⁹ Kimerongeomo mongkona pompe'anu-anuno, Moabi, anu tedoa mompe'anu-anu: pompelangka-langkaino, pompe'anu-anuno, konangi-nangino, ka pompe'uru-uruno.

³⁰ Kuto'orio tedoa pompelangka-langakino, kanandiomo pau-Do i Ue, pepauno nahi mentee, peleluno mbo'u nahi mentee.

³¹ Onaemo pu'uno, aku monsabangi tiano Moabi, mebooli tiano luwuno Moabi, ka meraali mongkona to Kire-Heresi!

³² Aku mengeseiko, laluaopo sekono mengeseio i Yaeseri, hei keu anggorono i Sibima! Luwuno sampa motutumu melele hawe a ntahi, meluehi hawe i Yaeseri. Anu momperawo-rawo tedontaomo dumunsio hasili tempo motu'i-tu'i ka opuano wua anggoromu.

³³ Po'undea ka pebooli mawongko tampulaomo inso a lere wua ngkeu kaanga ka wita Moabi. Kupoko'olaiomo anggoro inso a pomporo'ia; nahina mbo'u anu monsesa saru mebooli mawongko, pebooli mawongko nahi teronge mbo'u.

³⁴ Peboolino Hesiboni hawe i Eleale ka Yahasi; mia merongeo suarano inso i Soari hawe i Horonaimi ka Egelati-Selisia; hangano uwoino koro Nimirimi mbo'u mo'are.

³⁵ Pau-Do i Ue: Aku pingko ira to Moabi, anu mpopesombaako pesomba tinunu a mpo'ianga pompesombaia ka mpopesombaako pesomba mana mo'ahi a mpinesombaido.

³⁶ Onaemo pu'uno, aroaku mompemahakiakono Moabi kana siloli, aroaku mompemahakiako ira to Kire-Heresi kana siloli; hangano, arataa anu pinumpudo tampulaomo.

³⁷ Mentee ntu'u, sompo ulu kineru londa ka sompo danggo pinolei, a sompo kae hinawe pesorekia ka a sompo tonga pinokona sawu po'inombo.

³⁸ I wawono sompo mbumbungeno Moabi ka a luwuno tanalapa butu hinao po'inombo, hangano Kupehaomo Moabi kana parewa inso a wita pulu, ranta nahina mia anu ineheakono, kanandiomo pau-Do i Ue.

³⁹ Onae terawo-rawoomo ntu'u! Moabi meraaliki! Iwunio ntu'u rupano hangano mokoko'ii! Moabi gagiomo pengingisia ka mongkokongiriado luwuno anu kongko a mpetengi-tengino.

⁴⁰ Hangano kanandiomo pau-Do i Ue: Menteeano, onae menee mompalari kana manu-manu rajawali ka wileo panino i wawono Moabi.

⁴¹ Luwuno kota pinongko'ala, luwuno bente pekorahakoa rinontu. Aroado pongkiarino Moabi i tempo atuu ta kana aroano beine anu mahaki me'ana.

⁴² Moabi ta ropu kana tongku, hangano onae mompelangka-langkai ndi Ondae i Ue.

⁴³ Doitoa, aa pompete'umala, ka oho sumikoriko, hei palilino Moabi! Kanandiomo pau-Do i Ue.

⁴⁴ Anu molai inso a doitoa ta tedonta a laro aa pompete'umala, ka anu mewuatako inso a laro aa ta tepongko'ala a laro oho. Mentee ntu'u, luwuno atuu Kupotiio ndi Moabi a nta'u hukuado, kanandiomo pau-Do i Ue.

⁴⁵ A mpe'engoano Hesiboni anu mempolai mpenaa-naa, pingko rosodo; sine api meluarako inso i Hesiboni, langano api inso a langkanaeno i Sihoni, anu kumaano ka ipingko nipi-nipino Moabi ka taku uludo anu mporisui.

⁴⁶ Masolakomo, hei Moabi, omue mate, hei Pinesombaino Kamosi! Hangano, luwuno ana ntamamiu mewinawa iramo mentinawa ka luwuno anamiu beine gagi mia tinawa.

⁴⁷ Sine, lembuino Aku momuleo teweweuno Moabi, kanandiomo pau-Do i Ue.” Hawemo i ndi'ai pau pohuku ndi Moabi.