Yeremia 46 - Wunta Mempori

PINAU MONGKONA ANU TA GAGI A LUWUNO TONGKU SUSUA LAMORO 46–51 Pau-Do i Ue mongkona luwuno tongku

¹ Pau-Do i Ue anu hawe ndi nabi Yeremia mongkona luwuno tongku.

Mongkona Masiri

² Mongkona Masiri. Mongkona sorodaduno i Pirao Neko, mokoledo to Masiri, anu mpekema i wiwi ngkoro Eparata umpeda Karakemisi ka anu ninangino i Nebukanesa, mokole i Babeli, a nta'u ko'opaa poparentaano i Yoyaki anano i Yosia, mokole i Yehuda,

³ ”Patindaomo kanta langkai ka kanta kodei ka lakomo petea!

⁴ Patindaomo ngara, ka pesawimo, hei luwuno anu mpesawi! Alao po'iangamu saru pompake songko, pokomontasoo kansaimu, pakeo lemba labumu!

⁵ Tembio kukita ira medoito, mpewolili mposuka? Luwuno sorodadudo mentenangi, mpolai ntesiarawo, nahina mewolili; mongkokongiria inso a luwuno lakoa! Kanandiomo pau-Do i Ue.

⁶ Mia anu malempi nahi pokompolai, sorodadu nahi dompokotola; i utara, i wiwi ngkoro Eparatamo dontetidu ka ntebangku.

⁷ Isemake andio anu lulua kana koro Nili, kana luwuno korono uwoino mebunde?

⁸ Onaemo atuu Masiri, lulua kana Koro Nili, kana luwuno korono uwoino mebunde. Ipotae: Ineheku lulua tumutuwio tolino, mepateo kota ka palilino.

⁹ Imelakomo, hei luwuno ngara! Imelakomo, hei luwuno kareta! Imelakomo mpetea, hei luwuno sorodadu, hei omiu to Etiopia ka to Puti anu mpo'ini kanta, ka to Lidia anu mpo'ini ka mpodii pana!

¹⁰ Oleo atuu oleo-Do Ue Alano luwuakoano, oleo pombaloa, ka Dompombalo a luwuno iwali-Do. Ponai ta montele ranta mowohi, ka ta te'osa uminuo reado. Hangano Ondae Ue Alano luwuakoano moweweu ponsumbelea pesomba i wita utara, umpeda Koro Eparata.

¹¹ Lakomo i Gileadi po'ala balasee, hei ana beine, ana beinedo to Masiri! Omue nahina tuduno mompake hadio pakuli, nahi kotompa!

¹² Luwuno tongku merongeomo mongkona mokoko'iiamu, tolino bukeako peboolimu, hangano sorodadu anu asa tetidu a nsorodadu anu susua, orua ira tebangku meronga-ronga.”

¹³ Pau anu pinohawe-Do i Ue ndi Nabi Yeremia mongkona haweno i Nebukanesa, mokole i Babeli, ta numangio wita Masiri:

¹⁴ ”Pauomo i Masiri, ka paleleomo i Migidoli! Paleleomo i Memipisi ka i Tahapanahesi! Potaemo: Alaomo po'ianga ka pepatindamo, hangano ponai pingko ikaano anu i horimu!

¹⁵ Tembio ka ipolai Pinesombai Apisi, nahi polioke sapimu anu lakino atuu mekorahako? Mentee ntu'u, onae Dopokompetuunduomo i Ue!

¹⁶ Hadio i olomiu anu tetidu ka tebangku, dompotae asa mia a anu susua: Aiwamo tompekule a tongkuto, i wita hinaato, molaiakono ponai poropu!

¹⁷ Pauomo neeno i Pirao, mokole i Masiri: Puu mporisui anu mo'ineeo tempo telalo!

¹⁸ A nee-Ku anu tuwu, kanandiomo pau-Do Mokole anu nee-Do Ueno luwuakoano, ira hawe kana Torukuno Tabori i olono luwuno torukuno, kana Torukuno Karameli umpeda a ntahi.

¹⁹ Patindaomo parewamu kolumako a pontadia, hei ana beinedo to Masiri anu mpo'ia iramo i ra'ai! Hangano Memipisi ta gagi boni-boni, gagi terawo-rawo nahina palili.

²⁰ Masiri onaemo sapi mongura anu tekosi, sine asa lale uso inso i utara hawe sumapoio.

²¹ Luwuno mbo'u sorodadu mentinambo anu kongko ndi onae kana ira anano sapi mewalo; ondae mbo'u mpewolili ka mpolai mperonga-ronga. Nahi dompokompekorahako, hangano oleo masolaa umalu ira, tempono domehinuku.

²² Suarano kana pesiilino ule anu molai, tempono Babeli lumako saru sorodadu; ondae me'aiwa ndi onae mpowawa uase kana luwuno puu mpontuehi keu.

²³ Ondae mentuehio tobuno, kanandiomo pau-Do i Ue, maupo nahi pinokompewinsoki. Hangano, mehadio irapo sekono kosume, nahi pinokopau hadiono.

²⁴ Ana beinedo to Masiri pinokoko'ii, pineweengako a ngkaedo tongku inso i utara.”

²⁵ Ondae Ueno luwuakoano, Ue Alado to Isaraeli, mepau, ”Menteeano, Kupompotiiakono pohuku a mpinesombaido to Amoni inso i Tebe, ndi Pirao ka Masiri saru luwuno pinesombaido ka luwuno mokoledo, oo, Pirao saru luwuno mia anu mpe'ala-alao.

²⁶ Aku meweengako ira a ngkaedo mia anu momporaakono penaado, a ngkaeno i Nebukanesa, mokole i Babeli, ka luwuno pegawaino. Sine, umarino wita atuu ta pino'iangario kana i ndi'ipua, kanandiomo pau-Do i Ue.

²⁷ Ka omue, siimo doito, hei tetenaa-Ku Yako, siimo doito, hei Isaraeli! Hangano menteeano, Ongkue kumaduduiko inso a mpo'ianga olai ka inulemu inso a mpo'iangado mentinadi. I Yako ta mekule ka tuwu sanaa ka roodo, nahina mompokodoito.

²⁸ Omue siimo doito, hei tetenaa-Ku Yako, kanandiomo pau-Do i Ue, hangano Ongkue kumongkomiko: Aku pingko ira luwuno tongku anu i tonga-tongano omue Kusiarawoko, sine omue nahi Aku mokopingkoko. Aku tumunduhiko montonda songka, Nahi Aku mo'ineeko tola kanatuumo koa.”