Yeremia 43 - Wunta Mempori

I Yeremia dinadasi molai i Masiri 43:1-7

¹ Mansano umari i Yeremia pauo a luwuno palili luwuno pau-Do i Ue, Ue Alado, luwuno pau anu Dopetenaako i Ue, Ue Alado, ka ipinohawe ndi ondae,

² motaeomo i Asaria anano i Hosaia ka i Yohanani anano i Kareahi saru luwuno mia mpompelangka-langkai atuu ndi Yeremia, ”Omue megaupi! Ondae i Ue, Ue Alato nahi Dotenako ka upauo, ’Si melako i Masiri ka impo'ia gagi mia hawe i ra'ai.’

³ Manasa i Baruki anano i Neria anu mosingkiko umewai kami saru tinoo meweengako kami a ngkaedo to Kasidimi, ka dompepate kami ke mewawa kami a laro pontadia i Babeli.”

⁴ Kanatuumo i Yohanani anano i Kareahi, luwuno sorodadu langkai pangkano, ka luwuno palili nahi dobehe merongeo pau-Do i Ue ka dompo'ia i wita Yehuda.

⁵ Ka i'amba i Yohanani anano i Kareahi ka luwuno sorodadu langkai pangkano atuu pumpu ira luwuno to Yehuda anu da tebinta. Ondae andio onaemo luwuno mia anu mpekule iramo inso i olodo luwuno tongku, ba isua domensiniarawo, saru tinoo mpo'ia mpiha i wita Yehuda:

⁶ tama, beine, nana'ote, luwuno ana beineno mokole ka sompo mia anu ipeweengakonomo i Nebusaradani, petewawa sorodadu mpodagai mokole, ndi Gedalia anano i Ahikami anano i Sapani; saru mbo'u Nabi Yeremia ka i Baruki anano i Neria.

⁷ Ka do'amba melako i wita Masiri, hangano nahi dobehe merongeo pau-Do i Ue. Mehawe iramo i Tahapanahesi.

Pinauno i Yeremia anu ta gagi mongkona Masiri 43:8-13

⁸ Ka i'amba haweomo pau-Do i Ue ndi Yeremia i Tahapanahesi, kanandio,

⁹ ”Ala iramo watu langkai a ngkaemu ka wunio atuu a laro horo wita pulu umpeda pewowa mewinso a langkanaeno i Pirao i Tahapanahesi i arono matado to Yehuda atuu.

¹⁰ Ka u'amba pauako ira: Kanandiomo pau-Do Ueno luwuakoano, Ue Alado to Isaraeli: Menteeano, Ongkue montena mia tumotowoo i Nebukanesa, mokole i Babeli, tetenaa-Ku atuu. Aku numaao kadera poparentaano a luwuno watu anu Kutenaomo wunio andio, ka onae ta wileo umpeo tekosi langkaino potorono i wawono.

¹¹ Onae ta aiwa ka numangio wita Masiri: Anu tinantui ka imate, ta mate! Anu tinantui ka igagi mia tinawa, ta tinawa! Anu tinantui tiano ponai, ta umaluo ponai!

¹² Onae ta molangao api a luwuno raha pompesombaia pinesombaido to Masiri, tumunu ira ka wawa ira gagi mia tinawa. Onae ta mokomorinao wita Masiri kana asa mia puu mpopakambi mokomorinao sangkano inso a ngkutu-kutu, ka i'amba onae ta lumako inso i ra'ai rodo-rodo.

¹³ Onae ta merawo-rawo ira tugu pelahumoaano i Beti-Semesi i wita Masiri ka ta pingko isongkoo raha pompesombaia pinesombaido to Masiri atuu.”