Yeremia 42 - Wunta Mempori

I Yeremia mopoto'orio ka si dompolai i Masiri 42:1-22

¹ Ka i'amba mehawe iramo luwuno sorodadu langkai pangkano, i olodo i Yohanani anano i Kareahi ka i Asaria anano i Hosaia, saru luwuno palili, inso anu kodei hawe anu langkai.

² Dompotae ndi nabi Yeremia, ”Po'ineeomo po'emamami ka ihawe i aromu! Pekakaiakamimo ndi Ondae i Ue, Ue Alamu, tiado luwuno anu da mentuwu andio. Hangano, butumo koa omami anu mentuwu, tedeimo koa inso a mia anu hadio, kana anu ukitaakonomo matamu.

³ Po'ineeomo Ondae i Ue, Ue Alamu, pauakami pesalaa anu asalakono kami mentondao ka hapa anu asalakono kami meweweuo.”

⁴ Sumangki nabi Yeremia ndi ondae, ”Po'emamiu kurongeomo! Kitao, aku mekakai ndi Ondae i Ue, Ue Alamiu, menunu saru po'emamiu. Luwuno pau, anu winee-Do i Ue gagi sangkino, aku koa pauakomiu; maupo te'asa mpudu pau nahi aku monaa-naa ndi omiu!”

⁵ Dompotae ndi Yeremia, ”Po'ineeomo Ondae i Ue gagi sakosii anu mentee ka pine'ala-ala ndi omami, tewala nahi kimeweweuo montonda luwuno pau petena-Do i Ue, Ue Alamu, ka upohaweo ndi omami.

⁶ Moiko ke maupo mosa'o, kami mperorongeakono pau-Do i Ue, Ue Alato, anu ndi Ondae kimentenako, ka imoiko teweweumami tewala kimperorongeakono pau-Do i Ue, Ue Alato.”

⁷ Umarino hopulu oleo haweomo pau-Do i Ue ndi Yeremia.

⁸ Ka i'amba i Yeremia moboio i Yohanani anano i Kareahi ka luwuno sorodadu langkai pangkano anu perongano saru luwuno palili, inso anu kodei hawe anu langkai.

⁹ Motaeomo ndi ondae, ”Kanandiomo pau-Do i Ue, Ue Alado to Isaraeli anu ndi Ondae imentena aku mohaweo po'emamiu i aro-Do:

¹⁰ Tewala mpo'ia komiu mpiha i wita andio, Aku mowangu ka komba sumolangi komiu, weweu komiu tuwu ka nahi Aku buta komiu. Hangano, me'o'ole Aku mompotii masolaa ndi omiu.

¹¹ Si medoito ndi mokole i Babeli anu dinoitoakomiu atuu. Si medoito ndi onae, kanandiomo pau-Do i Ue, hangano Ongkue kumongkomi komiu ka intekadudui ka motola komiu inso a ngkaeno.

¹² Aku moweeakomiu pompehohawa, ranta ka ipehohawa komiu ka mo'inee komiu mpekule i witamiu.

¹³ Sine tewala nahi mebehe mperorongeakono pau-Do i Ue, Ue Alamiu, ka impotae, ’Nahi kimebehe mpo'ia i wita andio!’,

¹⁴ hangano pinewowolomiu, Naahi! Kami melako i wita Masiri, isua nahi kami mpompembasai peteaa, mporonge unino tawuwua, ke marasai mokoninggo; i ra'aimo kami mpo'ia!,

¹⁵ ka kanandio-andio imerongeomo pau-Do Ue Ala, hei to Yehuda anu da mentuwu: Kanandiomo pau-Do Ue Alano luwuakoano, Ue Alado to Isaraeli: Tewala mentee ntu'u komiu mpontoo melako i Masiri, ka lano melako komiu ka mpo'ia gagi mia hawe i ra'ai,

¹⁶ asalakono ponai anu dinoitoakomiu atuu ta umalu komiu i wita Masiri, ka mokoninggoa anu imedoitoakono atuu nahi ta otu-otuno tumotondari komiu i Masiri, hawe ka imemate i ra'ai.

¹⁷ Luwuno mia, anu montoo ta lumako i Masiri ta mo'ia gagi mia hawe i ra'ai, ta mate hangano ponai, mokoninggoa ka haki lele; maupo te'asa mia inso ndi ondae nahina anu mokotola inso a masolaa anu Kupotiio ndi ondae.

¹⁸ Mentee ntu'u, kanandiomo pau-Do Ueno luwuakoano, Ue Alado to Isaraeli: Kana te'uwuno tekuda-Ku ka mokulano mosa'ono aroa-Ku a mpalilino Yerusale, kanatuumo ta te'uwu mokulano mosa'ono aroa-Ku ndi omiu, tewala omiu melako i Masiri. Komiu megagi totonaa, mongkokongiria, pontotonaa ka mokoko'iia; nahi komiu mengkitao mbo'u po'ianga andio.

¹⁹ Ondae i Ue mepau Iramo ndi omiu, hei to Yehuda anu da mentuwu: Si melako i Masiri! Impenootio tementee, nine kupopoto'oriakomiu a oleo andio!

²⁰ Imempopo'ooomo koroimiu ka gagi masolaano penaamiu, tempono imentena aku ndi Ondae i Ue, Ue Alamiu, saru mpotae: Pekakaiakamimo ndi Ondae i Ue, Ue Alato, ka pauomo a menteeano ndi omami hapa anu pinau-Do i Ue, Ue Alato, ka kimeweweuo!

²¹ Sine, maupo kupauakomiu a oleo andio, nahi imperorongeakono pau-Do i Ue, Ue Alamiu, onaemo nahi mentondao luwuakoano anu Dopetenaako kupohaweo ndi omiu.

²² Onaemo pu'uno, penootiomo tementee, nine komiu memate hangano ponai, mokoninggoa ka haki lele a mpo'ianga anu kinekewoimiu komiu mpo'ia gagi mia hawe i ra'ai.”