Yeremia 40 - Wunta Mempori

I Yeremia binikio mo'ia saru i Gedalia 40:1-6

¹ Pau anu hawe ndi Yeremia inso ndi Ondae i Ue, umarino ipotolao i Nebusaradani inso i Rama, petewawa sorodadu podagai mokole. Onaemo anu montena mia umalao i Yeremia, anu pinonguako rante i olodo luwuno mia mentinadi inso i Yerusale ka Yehuda anu ira mewinawa a pontadia i Babeli.

² Tempono i'inala i Yeremia, petewawa sorodadu podagai mokole atuu motae ndi onae, ”Dopopoto'oriomo Ue Alamu, masolaa a mpo'ianga andio,

³ ka Dopokogagiomo. Doweweuomo i Ue hapa anu pinau-Do atuu, hangano ntehala komiumo ndi Ondae i Ue ka nahi mperorongeakono pau-Do, onaemo ka igagi mongkona andio ndi omiu.

⁴ Kanandio-andio, kitaomo oleo andio kupotolako inso a mponguno kaemu. Tewala upemoikoo tumonda aku lumako i Babeli, aiwamo! Aku koa mekakaakomu. Sine tewala nahi upemoikoo tumonda aku lumako i Babeli, siimo lako. Kitao, luwuno wita kongko i aromu: lakomo ba isuamo koa ukitao moiko ka mentee.”

⁵ Se'eluno i Yeremia napi pewolili lumako, motae mbo'u, ”Moiko upekule ndi Gedalia anano i Ahikami anano i Sapani anu dopotoroomo mokole i Babeli gagi anu pabawa a luwuno kotano Yehuda. Po'iamo saru onae i tonga-tongado palili, ke lakomo ba isua pinementeemu.” Petewawa sorodadu podagai mokole atuu moweeakono kaanga ka pompowee, ka i'amba motolao lumako.

⁶ Lumakoomo i Yeremia ndi Gedalia anano i Ahikami i Misipa, ka mo'ia saru onae i tongado palili anu da ntebinta i wita atuu.

Tempono i Gedalia gagi guberenuu ka pepateano

⁷ Luwuno tadulako sorodadu, anu da mekongko a mpada saru luwuno miado, merongeo nine mokole i Babeli motoroomo i Gedalia anano i Ahikami anano i Sapani gagi anu pabawa i wita atuu, saru mbo'u luwuno tama, beine ka nana'ote, luwuno mia mongkokolaro tuwudo i wita atuu, anu nahi domewinawa a pontadia i Babeli.

⁸ Melako iramo ntepohaweakono i Gedalia i Misipa. Ondae onaemo i Sumaila anano i Netania, i Yohana anano i Kareahi, i Seraia anano i Tanahumeti, luwuno anano i Epai to Netopa atuu, ka i Yesania, anado to Ma'aka, meronga saru luwuno miano.

⁹ I Gedalia anano i Ahikami anano i Sapani mesumpa ndi ondae ka a luwuno miado, ”Siimo imedoito mpetuundu a nto Kasidimi atuu. Impo'iamo i wita andio ka mpetuundumo ndi mokole i Babeli, asalakono ta moiko teweweumiu!

¹⁰ Ongkue rodo i Misipa ka kupentade i arodo to Kasidimi anu ira mehawe ndi ontae. Sekono omiu, pumpuomo koa wua anggoro, wua ngkeu kaanga ka lana, ka i'amba menaao a laro mponaapa, ka impo'iamo a luwuno kota anu pinabawaimiu.”

¹¹ Luwuno mbo'u to Yehuda, anu mekongko i Moabi i olodo inuleno i Amoni, i Edomi ka a luwuno wita susua, merongeo nine mokole i Babeli mo'inee iramo palili anu ntebinta mpo'ia i Yehuda ka motoroo i Gedalia anano i Ahikami anano i Sapani gagi anu pabawa ndi ondae.

¹² Onaemo ka dompekule luwu to Yehuda inso a luwuno po'ianga ba isua domensiniarawo, ka mpewinso i wita Yehuda ntepohaweakono i Gedalia i kota Misipa. Ondae mpopumpu hadio ntu'u wua anggoro ka wua ngkeu kaanga.

¹³ Asa tempo i Yohanani anano i Kareahi ka luwuno tadulako sorodadu anu da mekongko a mpada me'aiwa ntepohaweakono i Gedalia i kota Misipa.

¹⁴ Dompotae ndi onae, ”Nde uto'orio koake nine i Baalisi, mokoledo inuleno i Amoni, itenaomo i Sumaila anano i Netania mepateko?” Sine i Gedalia anano i Ahikami nahi pe'ala-ala ira.

¹⁵ Ka i'amba i Yohanani anano i Kareahi mepau mewuni-wuni ndi Gedalia i Misipa, ”Po'ineeomo ongkue lumako mepateo i Sumaila anano i Netania atuu nahina tumo'orio maupo isema. Tembio ka ta mepateko, ranta luwuno to Yehuda anu ntepumpu iramo melimbuko ntesiarawo mbo'u ka to Yehuda anu ntebinta atuu memate?”

¹⁶ Sine i Gedalia anano i Ahikami sumangkio i Yohanani anano i Kareahi, ”Si weweuo atuu! Hangano hapa anu pinaumu mongkona i Sumaila atuu pegaupi.”