Yeremia 4 - Wunta Mempori

¹ ”Tewala beheko mepokule, hei Isaraeli, kanandiomo pau-Do i Ue, Pepokulemo ndi Ongkue. Tewala beheko tumadi ira lahumoamu anu mokoburu inso i aro-Ku, siimo te'embi-embi!

² Tewala a laro mpetenunu, moleoa, ka menteea upesumpa: A nee-Do i Ue anu tuwu!, asalakono luwuno tongku ira merinonso ndi Ondae ka mpo'unde ndi Ondae.”

³ Hangano, kanandiomo pau-Do i Ue a nto Yehuda ka a mpalilino Yerusale: ”Impo'anggamo wita anu wo'ohu, ka si mporawo inii a olono ewo rui.

⁴ Tindiomo aroamu ndi Ondae i Ue, ka liahakonomo kulino anuno, hei to Yehuda ka palilino Yerusale, ka si tekuda-Ku montiu kana api, ka melanga nahi tepepate, hangano luwuno wineweumu anu mosa'o!”

Yehuda mohawe pompokodoito inso i utara 4:5-31

⁵ Paleleomo i Yehuda ka popoto'oriomo i Yerusale: Puuriomo tawuwua a wita, peboolimo temeroku ntu'u, ”Pepumpumo ka aiwamo tomelako a luwuno kota mebente!”

⁶ Tandeomo luwuno bandera te'aro i Sioni! Pontuturakomo mpelimba, si butu mpo'ia! Hangano Aku mompotii masolaa inso i utara ka terawoa anu langkai.

⁷ Singa me'umbaakoomo inso a ntonga ewo, anu ta rumopu ira tongku melungkaomo, meluarako inso a mpo'iangano ta weweuo witamu boni-boni; luwuno kotamu gagi howuno anu terawo nahina palilino.

⁸ Onaemo pu'uno pokonaomo sawu po'inombo, pengesemo ka ponsabangimo; hangano tekuda-Do i Ue anu tensila nahi ta menaa-naa inso ndi ontae.

⁹ ”I tempo atuu, kanandiomo pau-Do i Ue, mokole ka luwuno mia pinemota'u ta tetadi rosodo; luwuno sando mpesomba ira ngkondoro-ndoro ka luwuno nabi ira ntekokodoho,

¹⁰ saru mpotae: Oo, Ue Ala, mentee ntu'u, tedoa Komiumo mopo'oo tongku andio ka palilino Yerusale, motae: Rodoa ta kongko ndi omiu, kahinaano ponai mokodoitoo penaamami!”

¹¹ I tempo atuu ta pinau a tongku andio ka palilino Yerusale, ”Angi mokula inso a luwuno pongku londa i pada one mepuuri te'aro a ana beine bawaa-Ku; komba poduku ka komba pompokomorina,

¹² angi anu mokora atuu hawe inso i ra'ai a parenta-Ku. Kanandio-andio Ongkue isa'a mompotiiako ira pohuku.”

¹³ Kitao, onae mewuatako kana seru, luwuno karetano kana angi mokora, ngarano magasiopo sekono rajawali. Memasola kitamo, hangano mempinepate kita!

¹⁴ Pokomorinaomo aroamu inso a wineweu mosa'o, hei Yerusale, ka ukinadudui! Opiapo mbo'u tehineno ipo'ia i laro aroamu luwuno tinoomu anu mosa'o?

¹⁵ Rongeo, Mia paleleo inso i Dani, mopoto'orio masolaa inso i mentorukuno Eparai.

¹⁶ Popoto'oriako iramo luwuno tongku: Mentee ntu'u onae aiwa! Paleleomo i Yerusale, ”Luwuno anu mpongkadu me'aiwa inso i wita anu olai, mpoporongeo suarado a luwuno kotano Yehuda.

¹⁷ Kana mia anu modagai lere domelimbuo, hangano Yehuda umewaomo ndi Ongkue, kanandiomo pau-Do i Ue.

¹⁸ Pelelumu ka wineweumu pepu'uano ka i'aluko luwuno andio. Onaemo hukumu, mopa'i ntu'u, ranta dumuhuo atemu.”

¹⁹ Adoo, radaku, radaku! Ongkue memoluki mompemahaki! Adoo, rereno huleku! Huleku mondende, nahi kupokomomperodo, hangano kurongeo unino tawuwua, pohio mpetea.

²⁰ Terawo-rawo pinalele, luwuno wita bineta; kemaku mansa bineta, tendaku i larono asa mpiniro.

²¹ Opiapo mbo'u tehineno kukita ira bandera, ka rumongeo unino tawuwua atuu?

²² ”Mentee ntu'u, bawaa-Ku atuu mebenge-benge, nahi domento'ori Aku! Ondae onaemo nana'ote monge-monge, nahina tino'orido! Ondae pande mpoweweu mosa'o, sine nahi domponto'ori mpoweweu moiko.”

²³ Kukitao tolino, mengkaa napi hina tadeno ka nahi te'atora, ka mengkita i langi, nahina mewineno.

²⁴ Kukita ira torukuno, mengkaa tewembo; ka maupo luwuno pongku ntelelu.

²⁵ Kukitao, mengkaa nahina mia, ka luwuno manu-manu i laromeene mpenee iramo mpolai.

²⁶ Kukitao, mengkaa wita mewalo gagiomo pada one, ka luwuno kotano tekale-kaleomo i aro-Do i Ue, i arono tekuda-Do anu tensila.

²⁷ Hangano kanandiomo pau-Do i Ue, ”Luwuno wita andio ta gagi boni-boni, sine nahi Aku weweuo ka ipingko luwu.

²⁸ Hangano mongkona andio tolino ta mompemasusa, ka langi i wawono gagi wongi-wongi, hangano Kupauomo, Kuposongkaakonomo, nahi Aku me'o'oleakono ka nahi ta mepokule inso mongkona atuu.”

²⁹ Hangano peboolido sorodadu mpengara ka mpepana luwuno palilino kota mpolai. Mpewinso ira a laro ntonga ewo ka mpewuatako a luwuno pongku watu. Luwuno kota binintaomo ka nahina maupo te'asa mia mo'ia i larono.

³⁰ Omue, anu pinokotampula, hapake anu ta wineweumu, tembio ka upompokona sangka motaha ntu'u, rumamba-rambaakono peramba-ramba wulaa koroimu, hahiakono matamu pohahi mata? Nahina tuduno upokontekosio koroimu, luwuno kinekewoimu nahi domebehe ndi omue, tendeano dopontooakono penaamu.

³¹ Mentee ntu'u, kurongeo suara kana pompemahakino beine me'ana, pe'o'osuno kana suarano ine anu me'anaakono ana amba-ambano, suarano ana beine i Sioni anu ngaasa, anu padindio kaeno, ”Masola akumo, hangano telusa aku i arodo anu pompepate!”