Yeremia 39 - Wunta Mempori

Tedontano kota Yerusale

¹ Tempono Yerusale pinongko'ala, a nta'u ko'osio poparentaano i Sedekia, a wula kohopulu, haweomo i Nebukanesa, mokole i Babeli, saru luwuno sorodaduno ta kumaduo Yerusale.

² A nta'u kohopulu ka asa poparentaano i Sedekia, a wula ko'opaa, tanggala osio wula atuu, rere watuno kota atuu rinongka.

³ Mehawe iramo mia pinemota'uno mokole i Babeli atuu, ka do'amba mpo'ala po'ianga a mpewowa langkai i tongano. Ondae onaemo i Neregali-Sareseri, anu langkai potorono inso i Sini-Magiri, asa mia tadulako, ka i Nebusasibani, petewawa langkanae, ka luwuno petewawa sorodadu susuano inso ndi mokole i Babeli.

⁴ Kumita ira luwu, i Sedekia, mokoledo to Yehuda, saru luwuno sorodaduno mpolai. Domebintao kota tempono wongi melaloo sala bonde bungano mokole ka pewowa langkai olono orua rere watu, ka do'amba mpeluarako nte'aro i Araba-Yarade.

⁵ Sine, sorodadudo to Kasidimi melampuio ka mehaweo i Sedekia i lembono Yeriko. Domerakoo ka mewawao i kota Ribela i wita Hamati, ndi Nebukanesa, mokole i Babeli, anu modontai pohuku ndi onae.

⁶ Mokole i Babeli sumumbele ira anano i Sedekia i arono matano i kota Ribela. Mokole i Babeli sumumbele ira mbo'u luwuno anu langkai potorono i Yehuda.

⁷ Umarino atuu matano i Sedekia ipokomorawuo, ka i'amba ponguakono rante mala ka iwinawa i Babeli.

⁸ To Kasidimi rumopuo langkanaeno mokole ka rahado palili, ka do'amba mehoao luwuno rere watuno Yerusale.

⁹ Ka i'amba i Nebusaradani, petewawa sorodadu podagai mokole, wawa ira palili anu da mentuwu a pontadia i Babeli anu da mpo'ia i kota atuu ka luwuno mia anu mpe'alaako ndi ondae saru palili susuano anu da mentuwu.

¹⁰ Sine, asa ntia inso a mpalili, mia mongkokolaro tuwudo anu nahina hapa-hapado, ibinta ira i Nebusaradani, petewawa sorodadu podagai mokole i wita Yehuda. I tempo atuu ipoweeako ira mbo'u lere anggoro ka pelerea.

Parentano i Nebukanesa ka ipinotola i Yeremia 39:11-14

¹¹ I Nebukanesa, mokole i Babeli mompoweeomo parenta mongkona i Yeremia molalo ndi Nebusaradani, petewawa sorodadu podagai mokole, kanandio,

¹² ”Wawaomo ka pekakaakono. Si poweweu hapamo koa anu mosa'o ndi onae, tendeano weweuakono menunu saru po'emano ndi omue!”

¹³ Onaemo pu'uno i Nebusaradani, petewawa sorodadu podagai mokole, saru i Nebusasibani, petewawa langkanae, ka i Neregali-Sareseri, tadulako, ka luwuno anu langkai pangkano ndi mokole i Babeli, mpotena mia

¹⁴ ondae mpotena mia umalao i Yeremia inso a kintala podagaia, ka i'amba pineweengako ndi Gedalia anano i Ahikami anano i Sapani ka iwawao mekule i raha. Kanandiomo i Yeremia mo'ia i tonga-tongano palili.

Dandi ndi Ebedi-Meleki 39:15-18

¹⁵ Tempono i Yeremia da inuko a kintala podagaia, pau-Do i Ue hawe ndi onae, kanandio,

¹⁶ ”Lakomo ndi Ebedi-Meleki, to Etiopia atuu ka pauakonomo: Kanandiomo pau-Do Ueno luwuakoano, Ue Alado to Isaraeli: Mentee ntu'u, Aku mokogagio pau-Ku i kota andio a masolaa ka komba moikoano. Luwuno atuu ta gagi i arono matamu i tempo atuu.

¹⁷ Sine, Aku motolako i tempo atuu, kanandiomo pau-Do i Ue. Omue nahi kopineweengako a ngkaedo mia anu dinoitoakomu,

¹⁸ tendeano, manasa Aku motolako. Omue nahi kotebangkuako ponai; penaamu ta kinadudui, hangano omue mompe'ala-ala ndi Ongkue, kanandiomo pau-Do i Ue.”