Yeremia 38 - Wunta Mempori

I Ebedi-Meleki lumuarakono i Yeremia inso a nsumuru 38:1-13

¹ I Sepatia anano i Matani, i Gedalia anano i Pasuri, i Yukali anano i Selemia ka i Pasuri anano i Malakia rumongeo pau anu pinopowali-wali ipohaweo i Yeremia a luwuno palili,

² ”Kanandiomo pau-Do i Ue: Isema anu mo'ia a ngkota andio ta mateako ponai, mokoninggoa ka haki lele. Sine, isema anu lumako a nto Kasidimi, onae ta kongko tuwu. Penaano onaeno anu kinaduduino ka onae kongko tuwu.

³ Kanandiomo pau-Do i Ue: Kota andio ta manasa pineweengako a ngkaedo sorodaduno mokole i Babeli anu ta mongko'alao.”

⁴ Ka i'amba luwuno mia pinemota'u mpotae ndi mokole, ”Po'ineeomo mia andio ihinuku mate! Hangano, menteeano pau anu kanatuu onae mokomolusao rosodo sorodadu anu da mentuwu i kota andio ka rosodo palili. Mentee ntu'u, mia andio nahi po'ungkeaono manangaino tongku andio, tendeano masolaa.”

⁵ Sumangki mokole Sedekia, ”Moiko, onae a ngkaemiu! Hangano, mokole nahi pokompoweweu hapa-hapa umewaikomiu!”

⁶ Dome'alao i Yeremia ka domewinsoo a laro nsumuruno i Malikia, ana ntamano mokole, anu kongko a kintala podagaia atuu. Ondae mpotiiakono koloro i Yeremia. A nsumuru atuu nahina uwoi, butu rege, ka i Yeremia tensawo a laro rege atuu.

⁷ I Ebedi-Meleki, asa mia pegawai Etiopia anu mo'ia a langkanaeno mokole, rumongeo nine i Yeremia wininsoomo a laro nsumuru. Ka mokole tekonai mentoro a Mpewowa Langkai Benami,

⁸ meluarakoomo i Ebedi-Meleki inso a langkanaeno mokole, ka i'amba motae ndi mokole,

⁹ ”Oo ueku mokole, mia atuudo mpoweweu mosa'o a luwuno anu wineweudo ndi nabi Yeremia tendeano onae domewinsoo a laro nsumuru. Onae ta mate mokoninggo a mpo'ianga atuu hangano nahina mbo'u roti i kota.”

¹⁰ Ka i'amba mokole mompowee parenta ndi Ebedi-Meleki, to Etiopia atuu, ipotae, ”wawa iramo tolu pulu mia inso i ndi'ai ka tandeomo Nabi Yeremia inso a nsumuru atuu se'eluno napo imate!”

¹¹ I Ebedi-Meleki wawa ira mia atuudo ka lumako a langkanaeno mokole, a bolongko i totono a mponaapa arataa. Inso i ra'ai onae mo'ala sangka anu memosa'o ka nteberi-beri, ka i'amba motiiakono koloro ndi Yeremia a nsumuru atuu.

¹² Mebooliomo i Ebedi-Meleki, to Etiopia atuu, ndi Yeremia, ”Naaomo sangka anu memosa'o ka nteberi-beri atuu a ntoto kekemu gagi empehino koloro!” Iweweuomo i Yeremia kanatuu.

¹³ Ka do'amba mediiakono koloro i Yeremia ka mentandeo inso a nsumuru atuu. Kanatuumo i Yeremia mo'ia a kintala podagaia atuu.

Pepauado poko'ariano i Yeremia saru Mokole Sedekia 38:14-28

¹⁴ Mokole Sedekia montena mia wawao nabi Yeremia ndi onae a mpewowa ko'otolu a Raha-Do i Ue. Motae mokole ndi Yeremia, ”Hinao aku mesikenoakono ndi omue. Si powuni maupo hapa ndi ongkue!”

¹⁵ Sumangki i Yeremia ndi Sedekia, ”Tewala kupauakomiu, manasa komiu mepate aku, menteeke? Tewala kupoweeakomiu patudu, nahi komiu mbo'u rumonge aku!”

¹⁶ Ka i'amba mokole Sedekia mewuni-wuni mesumpa ndi Yeremia, kanandio, ”A nee-Do i Ue anu tuwu anu moweeakitamo penaa andio, nahi aku mepateko ka nahi aku meweengakomu a ngkaedo mia anu mpomporaakono penaamu.”

¹⁷ Motae i Yeremia ndi Sedekia, ”Kanandiomo pau-Do i Ue, Ue Alano luwuakoano, Ue Alado to Isaraeli: Tewala omue meluarako meweengakono koroimu a luwuno mia pinemota'uno mokole i Babeli, omue kongko tuwu, ka kota andio nahi ta sinongko; omue saru somborimu ta kongko tuwu.

¹⁸ Sine tewala omue nahi upeweengakono koroimu a luwuno mia pinemota'uno mokole i Babeli, kota andio ta pineweengako a ngkaedo to Kasidimi anu ta rumopuo ka omue nahi kotola inso a ngkaedo.”

¹⁹ Motaeomo mokole Sedekia ndi Yeremia, ”Doito aku a nto Yehuda anu mpe'alaako a nto Kasidimi atuu hangano bara'ura ira mpeweengakune a ngkaedo, ka domentunduhi aku.”

²⁰ Sumangki i Yeremia, ”Nahi ira mpeweengakomu. Rongeomo pau-Do i Ue mongkona hapa anu kupohaweo ndi omue, ka ta moiko teweweumu ka omue kongko tuwu.

²¹ Sine tewala nahi ubehe meweengakono koroimu, ndiomo pau anu pinokomengkaa-Do i Ue ndi ongkue:

²² Mentee ntu'u, luwuno beine anu da mpo'ia a langkanaeno mokoledo to Yehuda ta pineweengako a luwuno mia pinemota'uno mokole i Babeli. Luwuno beine atuu ira mpotae: Omue pinopo'oo, domenangiko sambe'emu. Karumu tensawo a laro rege, sine ondae mpewolili melako.

²³ Luwuno kombiamiu ka anamiu ta pineweengako a nto Kasidimi. Omuemu nahi kotola inso a ngkaedo, tendeano ta rumako komiu mokole i Babeli sekono kota andio ta rinopu.”

²⁴ Ka i'amba motae i Sedekia ndi Yeremia, ”Si hina mia anu tumo'orio pepaua andio, ka si umate.

²⁵ Tewala domerongeo mia pinemota'u nine mepau akumo saru omue, ka do'amba me'aiwa ndi omue ka mpotae, ’Pauakamimo hapa anu pinaumu ndi mokole ka hapa anu pinaudo mokole ndi omue. Si powuniakami, ka si kimpepateko’,

²⁶ asalakono ka upauako ira: Ongkue mohaweo po'emaku i arodo mokole, ka si kupinokule a rahano i Yonata ka kumate i ra'ai.”

²⁷ Luwuno mia pinemota'u atuu me'aiwa ira koa ntu'u mpesikeno ndi Yeremia ka ipauako ira luwuno pau mengkena kana anu iparentaakono mokole. Mpenaa-naa iramo mpesikeno ndi onae, hangano pepauado atuu lano nahina tumo'orio maupo isema.

²⁸ Kanatuumo i Yeremia mo'ia a kintala podagaia atuu hawe a oleo tempono ipinongko'ala Yerusale.