Yeremia 37 - Wunta Mempori

Mokole Sedekia mo'ema pontiso telalo ndi Yeremia 37:1-10

¹ I Sedekia ana ntamano i Yosia gagi mokole umeuo i Konia ana ntamano i Yoyakimi. I Nebukanesa, mokole i Babeli, pontoroo gagi mokole i wita Yehuda.

² Moiko onae ka luwuno pegawaino maupo palilino wita atuu, nahi domperorongeakono pau anu pinohawe-Do i Ue telalo ndi Nabi Yeremia.

³ I asa tempo Mokole Sedekia tumenao i Yukali anano i Selemia ka sando mpesomba Sepana anano i Ma'asea lumako ndi Yeremia mowawa pe'oliwi, ”Pekakaiakamimo ndi Ondae i Ue, Ue Alato!”

⁴ I tempo atuu i Yeremia da malua hawe ka ilako i tonga-tongado palili. Onae napi wininso a laro torungku.

⁵ Sorodaduno i Pirao mpeluarako iramo inso i Masiri. Rumongeo lele atuu, to Kasidimi anu mengkaduo Yerusale mpeliahako inso i Yerusale.

⁶ Ka i'amba haweomo pau-Do i Ue ndi Nabi Yeremia, kanandio,

⁷ ”Kanandiomo pau-Do i Ue, Ue Alado to Isaraeli: Ndi mokoledo to Yehuda, anu tumena komiu ndi Ongkue mpo'ema pontiso, asalakono impotae kanandio: Kitao, sorodaduno i Pirao anu mpeluarako iramo ira mpokowali komiu mpekule i witamiu, i Masiri.

⁸ Sine to Kasidimi ira wali me'aiwa mpeteaakono kota andio, dompoko'alao ka meropuo.

⁹ Kanandiomo pau-Do i Ue: Si megaupio koroimiu ka impotae: ’To Kasidimi atuudo melako iramo mpiha inso ndi ontae.’ Kahinaano komba ira melako mpiha!

¹⁰ Maupo ande-andeno imenangi ira luwu sorodadudo to Kasidimi anu umari mpeteaa komiu atuu, ka i'olodo butu tebinta mia anu mapari mobelado, asalakono singge mia ira mpewangu a ngkemano ka meropuo kota andio.”

I Yeremia tinorungku

¹¹ Tempono dompeliahako sorodadudo to Kasidimi atuu inso i Yerusale hangano sorodaduno i Pirao,

¹² meluarakoomo i Yeremia inso i Yerusale ka lumako i wita Benami ta umorusuo petiaa pusaka i olodo sukuno i ra'ai.

¹³ Sine tempono i hawe a Mpewowa Langkai Benami, petewawado puu mpodagai i ra'ai anu meneeako i Yeria anano i Selemia anano i Hanania rumakoo Nabi Yeremia saru motae, ”Omue kome'alaako a nto Kasidimi!”

¹⁴ Sumangki i Yeremia, ”Pegaupi atuu, komba aku me'alaako a nto Kasidimi!”, sine i Yeria nahi perioo. Kongkono rumakoo i Yeremia ka wawao me'aro a luwuno mia pinemota'u.

¹⁵ Luwuno mia pinemota'u andio gagi ntekuda ndi Yeremia. Domentunduhio ka mewinsoo a raha potorungkua, rahano i Yonata, puu mpoburi a poparentaa. Raha atuu pinokogagiomo torungku.

¹⁶ Kanatuumo teweweuno i Yeremia mewinso a nsumuru, bolongko torungku a ntoto wita. I Yeremia tehine ipo'ia i ra'ai.

I Yeremia melimba raha potorungkua 37:17-21

¹⁷ Asa tempo Mokole Sedekia montena mia umalao i Yeremia. Ka i'amba a langkanaeno mokole mewuni-wuni mesikeno ndi onae, ”Hinaoke pau inso ndi Ondae i Ue?” Sumangki i Yeremia, ”Hinao!” Ipotae mbo'u, ”Omue kopineweengako a ngkaeno mokole i Babeli!”

¹⁸ Ka i'amba i Yeremia motae ndi mokole Sedekia, ”Hapake hala anu wineweuku ndi omiu, a luwuno pegawaimiu ka tongku andio, ka imewinso aku a laro torungku?

¹⁹ Isua iramoke nabimiu anu mompau ta gagi ndi omiu nine mokole i Babeli nahi ta aiwa sumapoi komiu ka wita andio?

²⁰ Kanandio-andio, rongeomo, hei ueku mokole! Po'ineeomo po'emaku ka ihawe i aromiu: si pokule aku a rahano i Yonata, puu mpoburi a poparentaa atuu, aku mansa mate i ra'ai.”

²¹ Mokole Sedekia mompowee parenta, ka i'amba mia mentahao i Yeremia a kintala podagaia. Sompo oleo pineweeako asa roti bonggoli inso a nsala puu mpoweweu roti, ranta luwuno roti pingko i kota atuu. Kanatuumo i Yeremia mo'ia a kintala podagaia atuu.