Yeremia 36 - Wunta Mempori

Paluluno wunta itunuo Mokole Yoyakimi

¹ A nta'u ko'opaa poparentaano i Yoyakimi ana ntamano i Yosia, mokoledo to Yehuda, haweomo pau andio ndi Yeremia inso ndi Ondae i Ue, kanandio,

² ”Alaomo paluluno wunta ka buriomo i larono luwuno pau anu Kupauomo ndi omue mongkona Isaraeli, Yehuda ka luwuno tongku, mompu'u Kupepau ndi omue tempono i Yosia hawe tempo andio.

³ Tewala domerongeo suku Yehuda mongkona luwuno masolaa anu tinoo-Ku motiio ndi ondae, bara'ura ira singge ntepidi inso a mpeleludo anu mosa'o atuu, ranta ka Ku'oniniako ira sala ka halado.”

⁴ I Yeremia moboio i Baruki anano i Neria, ka i'amba i Baruki burio a laro paluluno wunta atuu, rumongeo inso a ngangano i Yeremia, luwuno pau anu pinau-Do i Ue ndi onae.

⁵ I Yeremia moweeakono parenta i Baruki, ”Ongkue nahi kupokolako a Raha-Do i Ue.

⁶ Gagi, a oleo puasa omuemo anu lumako basao inso a paluluno atuu pau-Do i Ue anu binurimu rumongeo inso a ngangaku i arodo mia hadio a Raha-Do i Ue. A luwuno to Yehuda anu me'aiwa inso a luwuno kotano asalakono ka ubasaako ira mbo'u.

⁷ Bara'ura ira mpohaweo po'emado i aro-Do i Ue ka ira singge ntepidi inso a mpeleludo anu mosa'o atuu, hangano mongkokongiriomo mosa'ono aroa ka tensilano tekuda anu pinokomengkaa-Do i Ue a tongku andio.”

⁸ I Baruki anano i Neria weweuo kona ntu'u kana anu iparentaakono Nabi Yeremia ka ibasao luwuno pau-Do i Ue inso a wunta atuu a Raha-Do i Ue.

⁹ Kanatuumo a nta'u ko'olima poparentaano i Yoyakimi ana ntamano i Yosia, mokoledo to Yehuda, a wula ko'osio, pinaleleomo puasa i aro-Do i Ue a luwuno palili i Yerusale ka a luwuno palili anu me'aiwa inso a luwuno kotano Yehuda melako i Yerusale.

¹⁰ I Baruki basao mbo'u i arodo luwuno palili pauno i Yeremia inso a wunta atuu a Raha-Do i Ue, a bolongkono i Gemaria, anano i Sapani, puu mpoburi poparentaa, a kintala i wawono i arono Pewowa Langkai Wo'ohu Raha-Do i Ue.

¹¹ Tempono i Mikaia anano i Gemaria anano i Sapani rumongeo luwuno pau-Do i Ue inso a wunta atuu,

¹² metiiomo onae lumako a langkanaeno mokole, a bolongkono puu mpoburi a poparentaa. I ra'ai mpentoro ira luwuno mia pinemota'u: I Elisama, puu mpoburi poparentaa, i Delaia mbo'u anano i Semaia, i Elinatani anano i Akibori, i Gemaria anano i Sapani, i Sedekia anano i Hanania ka luwuno mia pinemota'u susuano.

¹³ Ka i'amba i Mikaia pauako ira luwuno pau anu irongeomo, tempono i Baruki basao wunta atuu i arodo mia hadio.

¹⁴ Ka i'amba luwuno petewawa atuu mentenao i Yehudi anano i Netania anano i Selemia anano i Kusi lumako ndi Baruki mowawa pe'oliwi, ”Wawaomo paluluno anu umari ubasao i arodo mia hadio atuu ka aiwamo ramai!” I Baruki anano i Neria wawao mbo'u paluluno wunta atuu ka aiwa ndi ondae.

¹⁵ Mpotae iramo ndi onae, ”Tabeamiu ipentoromo ka ibasaomo atuu i aromami!” Ka i'amba i Baruki basao i arodo.

¹⁶ Rumongeo luwuno pau atuu, pada ira mambekita saru medoito ka do'amba mpotae ndi Baruki, ”Asalakono katoronga pauako ira mokole luwuno pau andio!”

¹⁷ Mpesikeno ira ndi Baruki, ”Pauakamimo, kana'umpe uburio luwuno pau andio, nde urongeo inso a ngangano?”

¹⁸ Sumangki i Baruki ndi ondae, ”Luwuno pau andio kurongeo inso a ngangano i Yeremia, ka kuburiakono tinta a wunta.”

¹⁹ Ka do'amba mpotae mia pinemota'u atuu ndi Baruki, ”Lakomo pewuni, omue ka i Yeremia! Si hina maupo te'asa mia tumo'orio ba isua ipo'ia.”

²⁰ Ka i'amba melako iramo mpe'aro ndi mokole a kintala, umarido menaao wunta pinalulu atuu a bolongkono i Elisama puu mpoburi a poparentaa. Luwuno pau atuu domempauakono mokole.

²¹ Mokole tumenao i Yehudi umalao wunta pinalulu atuu. I Yehudi umalao inso a bolongkono i Elisama, puu mpoburi a poparentaa ka i'amba basao i arodo mokole ka luwuno mia pinemota'u anu mpentade umpeda mokole.

²² Tempo atuu onaemo wula anu ko'osio. Mokole tekonai mentoro a raha tepotowoa tempo morini ka pompotuwua api melanga i arono.

²³ Sompo umari ibasao i Yehudi otolu opaa oloti, i mokole beri-beriakono piso porooni, ka i'amba metadiakono a laro pompotuwua api atuu, ranta luwuno wunta pinalulu atuu pingko mo'ai a pompotuwua api atuu.

²⁴ Moiko mokole maupo luwuno pegawaino anu rumongeo luwuno pau atuu nahi domedoito ka nahi domeberio sangkado.

²⁵ Tendeano i Elinata, i Delaia ka i Gemaria dumadaio mokole ka situnuo wunta pinalulu atuu, sine mokole nahi perorongeako ira.

²⁶ Posuleno, Mokole parentao i Yerameeli, ana ntamano, saru i Seraia anano i Asirieli ka i Selemia anano i Abideeli ka domerakoo i Baruki, puu mpoburi atuu ka nabi Yeremia, sine Ondae i Ue wuni ira.

²⁷ Umarino mokole tumunuo wunta pinalulu me'ihiako luwuno pau anu binurino i Baruki rumongeo inso a ngangano i Yeremia atuu, haweomo pau-Do i Ue ndi Yeremia, kanandio,

²⁸ ”Alaomo mbo'u wunta pinalulu susua ka buriomo i larono luwuno pau anu se'eluno kongko a wunta pinalulu amba-ambano, anu tinununo i Yoyakimi, mokoledo to Yehuda.

²⁹ Mongkona i Yoyakimi, mokoledo to Yehuda, asalakono pauo: Kanandiomo pau-Do i Ue: Utunuomo wunta pinalulu atuu saru motae: Tembio ka uburio i larono nine mokole i Babeli manasa ta aiwa rumopuo wita andio ka mokotampulao inso i larono mia ka pinotuwu?

³⁰ Onaemo pu'uno kanandiomo pau-Do i Ue mongkona i Yoyakimi, mokoledo to Yehuda: Nahina inso a inuleno anu ta mentoro a ngkadera poparentaano i Daudi. Wata ngkoroino ta tepasiako, ikonao mokula tempono meene ka morini tempono wongi.

³¹ Aku humukuo, inuleno ka luwuno atano hangano salado. Aku mompotii ndi ondae, a mpalilino Yerusale ka a nto Yehuda luwuno masolaa anu Kupokodoitoako ira ka nahi domebehe merongeo.”

³² Ka i'amba i Yeremia umalao wunta pinalulu susua ka iweeakono i Baruki anano i Neria, puu mpoburi atuu. I Baruki burio anu rinongeno inso a ngangano i Yeremia luwuno pau anu teburi i larono wunta anu itunuomo i Yoyakimi, mokoledo to Yehuda. Tendeano da tiniangiako hadio pau pengkenano.