Yeremia 35 - Wunta Mempori

Petenunudo to Rekabi gagi pandiri

¹ Pau inso ndi Ondae i Ue anu hawe ndi Yeremia i tempono i Yoyakimi, ana ntamano i Yosia, mokoledo to Yehuda, kanandio,

² ”Lakomo a nsukudo to Rekabi, pepaumo saru ondae ka wawa iramo a Raha-Do i Ue, a asa bolongko, ka i'amba poweeako iramo mpo'inu anggoro!”

³ Lumako akumo tumotowoo i Ya'asania anano i Yeremia anano i Habasinia saru luwuno pepaekompono ka luwuno anano, luwuno sukudo to Rekabi.

⁴ Kuwawa ira a Raha-Do i Ue, a laro bolongkodo anano i Hanani anano i Yigadalia, tetenaa-Do Ue Ala. Onaemo atuu bolongko anu i asambalino bolongkodo mia pinemota'u, i wawono bolongkono i Maaseia anano i Salumi, puu mpodagai pewowa.

⁵ I arodo miano suku Rekabi atuu kunaa ira piala buke anggoro ka hadio sangkiri, ka ku'amba motae ndi ondae, ”Tabeamiu impo'inumo anggoro!”

⁶ Sine, mesangki ira, ”nahi kimpo'inu anggoro, hangano i Yonadabi anano i Rekabi, uempu'umami, moweeakamimo parenta, kanandio, ’Omiu ke luwuno anamiu si hori mpo'inu anggoro;

⁷ si mpowangu raha, si mporawo inii; si mpoweweu ke hinao lere anggoromiu, tendeano omiu asalakono mpo'ia a luwuno kema asa ntinuwumiu, ka itehine imetuwu mpo'ia i wawo wita, po'iangamiu gagi mia mehawe!’

⁸ Kimentondao pauno i Yonadabi anano i Rekabi, uempu'umami a laro luwuno anu ipeparentaako ndi omami: ka si kimpo'inu anggoro asa ntinuwumami, onaemo omami, kombiamami, luwuno anamami tama ka beine;

⁹ ka si kimpowangu raha po'iangamami, nahina lere anggoro ke bonde saru inii,

¹⁰ tendeano omami mpo'ia a luwuno kema ka mpetenunu meweweuo kona ntu'u kana anu ipeparentaako i Yonadabi ndi omami, uempu'umami.

¹¹ Sine tempono i Nebukanesa, mokole i Babeli, aiwa sumapoio wita andio, mpotae kami: Aiwa tompolai melako i Yerusale, hangano sorodadudo to Kasidimi ka sorodadudo to Arami atuu! Kanatuumo kimpo'ia i Yerusale.”

¹² I tempo atuu haweomo pau-Do i Ue ndi Yeremia, kanandio,

¹³ ”Kanandiomo pau-Do Ueno luwuakoano, Ue Alado to Isaraeli: Lakomo ka pauako iramo to Yehuda ka a mpalilino Yerusale: Nahi imentarimaoke pontunduhi saru merorongeakono luwuno pau-Ku? Kanandiomo pau-Do i Ue.

¹⁴ Lano parentano i Yonadabi anano i Rekabi atuu da tinonda. Iparenta iramo inuleno, ka si dompo'inu anggoro, ka ranta kanandio-andio nahi dompo'inu, hangano ondae mperorongeakono parentado uempu'udo. Ongkue isa'a mepau ndi omiu, nahi otu-otu, sine nahi meronge Aku.

¹⁵ Nahi otu-otu Kutena ira tetenaa-Ku ndi omiu, luwuno nabi, mempauo: Impepokulemo singge mia inso a mpelelumiu anu mosa'o atuu, impokomoikoomo wineweumiu, si mpetonda a mpinesombai susua saru mpesomba ndi ondae, ka komiu koa mpo'ia mpiha i wita anu Kuweeakomiumo ka uempu'umiu. Sine nahi mebehe mpo'aroo birimiu ka nahi mebehe meronge Aku.

¹⁶ Mentee ntu'u, inuleno i Yonadabi anano i Rekabi mentondao parenta anu iweeako ira uempu'udo, sine tongku andio nahi behe meronge Aku!

¹⁷ Onaemo pu'uno kanandiomo pau-Do i Ue, Ue Alano luwuakoano, Ue Alado to Isaraeli, Menteeano, Aku mompotiiakono Yehuda ka luwuno palilino Yerusale luwuno masolaa anu Kupokodoitoako ira; hangano mepau Akumo ndi ondae, sine nahi domerongeo, ka mebooli Akumo ndi ondae, sine nahi domesangki.”

¹⁸ Mepauomo i Yeremia a nsukudo to Rekabi, ”Kanandiomo pau-Do Ueno luwuakoano, Ue Alado to Isaraeli: Hangano imerongeomo parentano i Yonadabi, uempu'umiu, mpe'ini a luwuno parentano ka imeweweuomo kona ntu'u kana anu iparentaa komiu,

¹⁹ ka kanandiomo pau-Do Ueno luwuakoano, Ue Alado to Isaraeli: Inuleno i Yonadabi anano i Rekabi nahi ta te'otu mompekakaako ndi Ongkue asa ntinuwu.”