Yeremia 31 - Wunta Mempori

Pedandia anu wo'ohu 31:1-40

¹ ”I tempo atuu, kanandiomo pau-Do i Ue, Aku gagi Ue Alado luwuno pepe'etuado to Isaraeli ka ondae gagi bawaa-Ku.

² Kanandiomo pau-Do i Ue: Tongku anu tola inso a mponai, ta mohawe pompehohawa i pada one! I Isaraeli melempa i ra'ai mo'ungke penaa-naaano!

³ Inso olai Ondae i Ue mepopokita ndi onae: Omue Kupehohawaakomu pompehohawa anu nahina tampulaano, onaemo pu'uno Kupotilaloakono pompehohawa-Ku ndi omue.

⁴ Aku wali wanguko, ka omue kowinangu, hei ana beine Isaraeli! Omue kowali rumamba-rambaakono rebana koroimu ka komesabaako a mpo'ense-enseado mia anu memawongko.

⁵ Omue kowali mompahoario luwuno lere anggoro a luwuno torukuno Samaria; luwuno anu mpompaho ira mempahoo ka mperapio hasilino.

⁶ Mentee ntu'u, ta hawe oleono nine luwuno anu mpodagai mpebooli i torukuno Eparai: Aiwamo tompewuatako i Sioni, ndi Ondae i Ue, Ue Alato!

⁷ Hangano, kanandiomo pau-Do i Ue: Peboo-boolimo mawongkoakono i Yako saru po'unde, memawongkomo mongkona petewawado luwuno tongku! Paleleomo, unde-undeomo ka pauomo: Ue Ikadudui iramo bawaa-Miu, to Isaraeli anu da tebinta!

⁸ Menteeano, Aku wawa ira inso i wita utara ka pumpu ira inso a luwuno tompano tolino; i olodo hinao mia morawu ka mia puungku, hinao beine mentia meronga beine me'ana; asa tepumpua langkai ira mpekule i ndi'ai.

⁹ Saru mpengese ira me'aiwa, saru mepepehohawa Aku wawa ira; Aku wawa ira a luwuno korono, a nsala anu merete, i ra'ai nahi ira ntetidu; hangano Ongkuemo amano i Isaraeli, ka i Eparai ana aka-Ku.

¹⁰ Rongeomo pau-Do i Ue, hei luwuno tongku, pauomo a luwuno wita i wiwi ntahi anu olai, potaemo: Ondae anu sumiarawo iramo to Isaraeli Ondae koa mbo'u wali pumpu ira, ka dumagai ira kana puu mpopakambi a bawaano bimbano!

¹¹ Hangano, Ondae i Ue Dopotolaomo i Yako, Dotolosiomo inso a ngkaeno mia anu morosoopo sekono onae.

¹² Ira me'aiwa mpeboo-booli a wawo pongku Sioni, rupado ta mewanta hangano moiko-Do i Ue, hangano gandu, anggoro ka lana, hangano bawaano ana bembe bimba ka sapi; tuwudo ta kana lere bunga anu inuwoi, nahi ira memarasai mbo'u.

¹³ I tempo atuu ana beine ta mo'unde mo'ense-ense, meronga luwuno mia mongura ka luwuno mia mota'u ira memawongko. Aku balio masusado gagi mawongko, Ira montarero ka weweu ira memawongko tola inso a pompemasusado.

¹⁴ Aku mokonte'osaako ira sando mpesombaamu hadio ntu'u, ka bawaa-Ku ira memowohiako moiko-Ku, kanandiomo pau-Do i Ue.

¹⁵ Kanandiomo pau-Do i Ue: Rongeo! I Rama teronge ponsabangi, pengese anu tedoa mompokomasusa aroa: I Raheli mengesei ira anano, onae nahi behe tinarero mongkona luwuno anano, hangano nami domekongko.

¹⁶ Kanandiomo pau-Do i Ue: Peteaoamo suarano pengesemu,, matamu siimo ipompo'iti uwoi mata, hangano hinao tambono pe'iseimu, kanandiomo pau-Do i Ue; ondae ira mpekule inso i witado iwali.

¹⁷ Da hinao pomperorohia a oleo lembuiamu, kanandiomo pau-Do i Ue: nana'ote ira mpekule i witado.

¹⁸ Kurongeomo mentee ntu'u i Eparai mengese, ’Itunduhi akumo, ka kutarimao petunduhi, kana ana nsapi anu nahi pinaguru. Iwawa akumo mekule ka ineheku mepokule, hangano Omiumo Ue, Ue Alaku.

¹⁹ Mentee ntu'u, umariku mepokule, me'o'ole aku, ka mansaku mokonto'orio, kutunduhio koroiku; mokoko'iiku tendeano tekoko'ii, hangano kutembio mokoko'iia tempo monguraku’.

²⁰ Kombake i Eparai ana pinehohawa, kombake onae ana anu inehe-eheako? Hangano sompo Kutekudaakono, wela Aku rumambeo; onaemo pu'uno aroa-Ku mondende hangano onae; maupo kana'umpe Aku mehohawao, kanandiomo pau-Do i Ue.

²¹ Pontade iramo pepopoto'orimu a nsala, pasa iramo pontondonimu sala! Pekokoongakono temoiko sala langkai, sala anu umariomo utondao! Pekulemo, hei ana beine Isaraeli, pekulemo a luwuno kotamu andio!

²² Opiapo mbo'u tehineno unanta-nanta, hei ana beine anu mebungkui Ira i Ue? Mentee ntu'u, Ondae i Ue mompokogagi asa anu wo'ohu i wita andio kana pelempano beine mongkopui tama.”

²³ Kanandiomo pau-Do Ueno luwuakoano, Ue Alado to Isaraeli, ”Mia ira mempauo mbo'u pau andio i wita Yehuda ka a luwuno kotano, tewala Kupomuleomo teweweudo: Po'ineeomo ka Doronsoko i Ue, hei po'iangano menteea, hei torukuno anu mempori!

²⁴ I ra'ai ta mo'ia Yehuda meronga luwuno kotano, luwuno puu mpelere ka mia anu mempelakopi saru bawaano pinotuwudo.

²⁵ Hangano Ongkue moweakono roso anu mokendo, ka sompo mia anu telusa Aku wali mokorosoo.”

²⁶ Onaemo pu'uno ka kupewangu ka mokonto'orio nine poturiku sanaa.

²⁷ ”Menteeano, tempono ta hawe, kanandiomo pau-Do i Ue, Aku mokohadioo inuleno mia ka pinotuwu a nsuku Isaraeli ka suku Yehuda.

²⁸ Mengkena kana Kupedagaiako ira Aku mobuta, mobangkuo, mohoa, mompepate ka monsolangi, kanatuu koa mbo'u Aku medagaiako ira Aku mowangu ka mompaho, kanandiomo pau-Do i Ue.

²⁹ I tempo atuu mia nahi ta motae mbo'u, ’Luwuno ama mpongkaa wua anu mo'olo, ka ngisido nana'ote gagi mongilu,’

³⁰ tendeano, ’Sompo mia ta mate hangano salano onaeno; sompo mia anu mongkaa wua anu mo'olo, ngisino onaeno gagi mongilu.’

³¹ Menteeano, ta hawe tempono, kanadiomo pau-Do i Ue, Aku mowutu pedandia wo'ohu saru suku Isaraeli ka suku Yehuda,

³² komba kana pedandia anu Kuwutuomo saru uempu'udo i tempono Ku'inio kaedo wawa ira mpeluarako inso i wita Masiri. Pedandia-Ku atuu domehapuomo, maupo Ongkue gagi uedo, kanandiomo pau-Do i Ue.

³³ Sine, kanandiomo pedandia anu Kuweweuo saru suku Isaraeli umarino tempo atuu, kanandiomo pau-Do i Ue: Aku numaao songka-Ku a laro nsumangado ka burio i laro aroado. Aku gagi Ue Alado ka ondae gagi bawaa-Ku.

³⁴ Siimo mbo'u mia paguruo pe'asa miano ke pepaekompono ka ipotae, ’To'ori Iramo i Ue!’ Hangano luwudo, langkai ka kodei, ira mento'ori Aku, kanandiomo pau-Do i Ue. Hangano Aku umoniniako ira salado ka nahi pinewowolo mbo'u halado.”

³⁵ Kanandiomo pau-Do i Ue anu mompowee oleo gagi mewine tempono meene, ka pompakosi wula ka anano wula gagi mewine tempono wongi, anu mokomarisuo tahi, ranta ka dompebunde bombano, Ondae Ueno luwuakoano nee-Do,

³⁶ ”Menteeano, kana luwuno pompakosi andio nahi ta melimba inso i aro-Ku, kanandiomo pau-Do i Ue, kanatuumo mbo'u inuleno i Isaraeli nahi ta menaa-naa gagi tongku i aro-Ku asa ntinuwu.

³⁷ Kanandiomo pau-Do i Ue: Menteeano, kana langi i wawono nahi pinokosongka ka luwuno empehino tolino nahi pinokoparesa, kanatuumo mbo'u Aku tumarimao luwuno inuleno i Isaraeli, hangano luwuno anu wineweudo, kanandiomo pau-Do i Ue.

³⁸ Menteeano, tempono ta hawe, kanandiomo pau-Do i Ue, nine kota atuu ta wali winangu tia-Do i Ue, inso a menara Hananeeli hawe a Mpewowa Langkai Siuno;

³⁹ ka i'amba koloro posongka atuu ta tepadindi mpiha hawe a pongku Garebi, ka i'amba melengkuako lumako i Goa.

⁴⁰ Luwuno lembono atuu, saru luwuno wata ngkoroi ka awuno pesombano, ka luwuno wita i wiwi ngkoro Kidironi hawe a nsiuno Pewowa Langkai Ngara te'aro i sabaano oleo, ta gagi mempori ndi Ondae i Ue, ka nahi ta rinawo-rawo ke pinobangku mbo'u ranta nahina tampulaano.”