Yeremia 30 - Wunta Mempori

Dandi pomuleno Isaraeli 30:1-24

¹ Pau anu hawe ndi Yeremia inso ndi Ondae i Ue, unino,

² ”Kanandiomo pau-Do i Ue, Ue Alado to Isaraeli: Buriomo luwuno pau anu Kupauomo ndi omue atuu i larono asa wunta.

³ Hangano, menteeano, tempono ta hawe, kanandiomo pau-Do i Ue, nine Aku momuleo teweweudo bawaa-Ku Isaraeli ka Yehuda, kanandiomo Dopepau i Ue. Aku mokule ira i wita anu Kuweeako iramo uempu'udo, ka ira mpe'ueo.”

⁴ Ndiomo pau anu Dopauomo i Ue mongkona Isaraeli ka Yehuda,

⁵ ”Mentee ntu'u, kanandiomo pau-Do i Ue: Kimerongeomo peraali doito, pondendea ka nahina sintuwu.

⁶ Pesikenoakonomo ka paresaomo, Nde menteeke tama me'ana? Tembio sompo tama Kukitao monaa kaeno a ntongano kana asa beine anu me'ana? Tembio sompo rupa bali momite?

⁷ Masolaomo, mongkokongiri ntu'u oleo atuu, nahina pengkenano! Onaemo tempo masusaano i Yako, sine inso ndi onae ta kinadudui.

⁸ A oleo atuu, kanandiomo pau-Do Ueno luwuakoano, Aku puduo pasanga inso a banga we'udo ka umotuhi ira koloro pongudo. Nahi ira mpo'angga mbo'u a mia mehawe.

⁹ Ira mpo'angga ndi Ondae i Ue, Ue Alado, ka ndi Daudi, mokoledo, anu Aku wanguako ira.

¹⁰ Ka omue, siimo doito, hei tetenaa-Ku Yako, kanandiomo pau-Do i Ue, siimo pondende, hei Isaraeli! Hangano menteeano, Ongkue kumaduduiko inso a mpo'ianga olai ka inulemu inso i wita tadiado. I Yako ta mekule ka tuwu rodo, ka nahina anu mompodengke.

¹¹ Hangano ongkue kumongkomiko, kanandiomo pau-Do i Ue, ka kumaduduiko: luwuno tongku anu i olodo Kupeweengakomu Aku pingko ira, sine omue andio nahi Aku pingkoko. Aku humukuko montonda songka, sine omue komba Kukitako nahina ntu'u salamu.

¹² Mentee ntu'u, kanandiomo pau-Do i Ue: Tedoa mapari mobelamu, mobelamu nahi ta tompa!

¹³ Nahina anu me'alaako a ntiamu, nahina pakulino moboomu, nahi kotompa!

¹⁴ Luwuno kinekewoimu mengkolupeko, nahi dompesikenoakomu mbo'u. Mentee ntu'u, Kutunduhiakomumo pontunduhi iwali, saru pohuku anu nahina pompehohawa, hangano salamu hadio, halamu anu langkai.

¹⁵ Tembioke ka upebooli hangano mobelamu, hangano pompemopoemu tedoa lansara? Hangano salamu hadio, halamu porokono hadio, ka luwuno andio Kuweweuomo ndi omue.

¹⁶ Sine luwuno mia anu tumeleko ta tinele, ka luwuno iwalimu ira mpewinso a laro pontawaa; mia anu merontuko ta gagi rinontu, ka luwuno mia anu mpomuruko Aku weweuo gagi pomurua.

¹⁷ Menteeano Aku mokotompako, Aku pakulio luwuno mobelamu, kanandiomo pau-Do i Ue, hangano omue pinauomo ’anu tinadi’, Sioni anu nahina umungkeo maupo te'asa mia.

¹⁸ Kanandiomo pau-Do i Ue: menteeano, Aku momuleo teweweudo kemano i Yako, ka mehohawao luwuno po'iangano, kota atuu ta wali winangu i wawono anu terawo-rawo, ka benteno atuu ta mentade a mpo'iangano amba-ambano.

¹⁹ Penani po'unde-unde ta mewuatako inso i olodo, saru mbo'u suarado mia anu memawongko. Aku weweu ira ntetiangi hadio ka nahi ira memakura mbo'u. Aku weweu ira mempinelangkai, ka nahi ira mentinetewehi mbo'u.

²⁰ Luwuno anado ta gagi kana i ndi'ipuaako, ka tepumpuado ta moroso i aro-Ku; Aku humukuo luwuno mia anu mokonsii ira.

²¹ Petewawado ta koa inso ndi ondaedo, ka anu pabawaako ira ta me'umbaako inso i tonga-tongado. Aku weweuo rumangkuhi Aku ka onae ta umpeda ndi Ongkue. Hangano, isemake anu mosia tuma'oo penaano ta umpeda ndi Ongkue? Kanandiomo pau-Do i Ue.

²² Ka komiu megagi bawaa-Ku, ka Ongkue gagi Ue Alamiu.”

²³ Kitaomo, angi mokora-Do i Ue, tensilano tekuda-Do, meluarakoomo; pewolilino angi lompiu umaluo uludo mia mosa'o gaudo.

²⁴ Tekuda-Do i Ue anu tensila atuu nahi ta temonto hawe ka Doweweuo ka mokogagio tinoono aroa-Do; a oleo pokotompa komiu mento'orio mongkona atuu.