Yeremia 3 - Wunta Mempori

Tepidia anu mo'onde-onde 3:1-5

¹ Pau-Do, ”Tewala asa mia teposuaakono kombiano, ka beine atuu bintao ka i'amba gagi kombiano mia susua, ta mepokuleke onae a beine atuu? Kombake wita atuu mente ntu'u tesosa'ariomo? Monsosabokomo saru hadio kinekewoi, ka komepokule ndi ongkue? Kanandiomo pau-Do i Ue.

² Pengkitamo ngkoraane a luwuno pongku londa ka kitaomo! A mpo'ianga isua nahi upinewowaliako? A luwuno wiwi nsala omue mentoro monsikori kinekewoimu, kana asa mia puu mporontu i pada one. Wita usosa'ariakonomo ponsosabomu ka saru wineweumu anu mosa'o.

³ Onaemo pu'uno pesiwuino usa te'onto ka usa a tampulaano tempo nahi hawe. Ra'imu ra'ino beine belesu, nahi uponto'ori mokoko'ii.

⁴ Kombake dasaraipo upoboi Aku: Amaku! Omuemo sambe'eku mompu'u kodei!

⁵ Nde Ira tekudake ranta nahina tampulaano ke monaa-naa aroa mosa'o mpiha? Kanandiomo paumu, sine omue moweweu mosa'o te'ipiamo koa upolio.”

To Isaraeli ka to Yehuda inoluako mpepokule ndi Ondae i Ue 3:6-13

⁶ Ondae i Ue mepau ndi ongkue i tempono mokole Yosia, ”Umariomoke ukitao hapa anu wineweuno i Isaraeli anu mehapuakono pompe'ala-alano atuu? Kombake onae mewuatako a sompo pongku anu kontasi-tasi ka lumako a ntoto sompo keu anu marombo ka mebelesu i ra'ai?

⁷ Pinewowolo-Ku: Umari weweuo luwuno andio, onae ta mepokule ndi Ongkue, sine nahi pepokule. Mongkona atuu ikitaomo i Yehuda, pepaekompono beine anu nahi petenunu.

⁸ Ikitao nine hangano ponsosabono Kupensuaakonomo i Isaraeli anu mehapuakono pompe'ala-alano atuu, ka moweeakono wunta teposuaa. Sine i Yehuda, pepaekompono beine anu nahi petenunu atuu, nahi doito, tendeano lumako mbo'u mebelesu.

⁹ Hangano moruanano mebelesu, isosa'ario wita. Onae monsosaboako mompesombai watu ka keu.

¹⁰ Umarino weweuo luwuno andio i Yehuda mbo'u, pepaekompono beine anu nahi petenunu atuu, mekule ndi Ongkue nahi moleo aroano, tendeano butu mo'onde-onde, kanandiomo pau-Do i Ue.”

¹¹ Ondae i Ue mepau mbo'u ndi ongkue, ”I Isaraeli anu mehapuakono pompe'ala-alano atuu mopokitao koroino menteeopo sekono i Yehuda anu nahi petenunu atuu.

¹² Lakomo ka pebooliakonomo luwuno pau andio i utara. Potaemo: Pepokulemo, hei Isaraeli anu mehapuakono pompe'ala-alano, kanandiomo pau-Do i Ue. Rupa-Ku nahi ta mo'oro ndi omiu, hangano Ongkue me'aroa; nahi Aku tekuda ranta nahina tampulaano, kanandiomo pau-Do i Ue.

¹³ Polomo koa akuiomo salamu, nine u'ewai Iramo i Ue, Ue Alamu. Utia-tiaomo pongkekewoimu a luwuno pinesombaido mia mehawe a ntoto sompo keu anu marombo, ka nahi perorongeakono pau-Ku, kanandiomo pau-Do i Ue.”

Pebooli mpepokule ndi Ondae i Ue 3:14–4:4

¹⁴ Impepokulemo, hei nana'ote anu mehapuakono pompe'ala-alano, kanandiomo pau-Do i Ue, hangano Ongkuemo uemiu! Aku umalakomiu, asa mia inso a sompo kota ka orua mia inso a sompo sombori, ka Aku wawakomiu i Sioni.

¹⁵ Aku mompotoroakomiu puu pompakambi anu menunu saru aroa-Ku. Ira mempakambiakomiu pande ka ponto'ori.

¹⁶ Tewala lembuino ntetiangi komiu hadio ka mpe'ana'ue i wita andio, kanandiomo pau-Do i Ue, asalakono mia nahi ta mepau mbo'u mongkona Burua Pedandia-Do i Ue. Burua atuu nahi ta hawe mbo'u a laro mpinewowolo ka nahi ta rinambe mbo'u, nahi ta inungke ke wineweu mbo'u.

¹⁷ I tempo atuu Yerusale ta pinau kadera poparentaa-Do i Ue, ka luwuno tongku ira mpepumpu i ra'ai, i Yerusale a nee-Do i Ue, ka nahi ira mpelelu tumondao aroado anu motea ka mosa'o.

¹⁸ I tempo atuu suku Yehuda ira mpelempa ntepo'umpeda saru suku Isaraeli. Ira mehawe mperonga-ronga inso i wita utara lumako a wita anu Kutia-tiaako iramo a uempu'umiu gagi tia pusaka.

¹⁹ Kupewowoloo, ”Mentee ntu'u Aku pakosiko gagi nana'ote-Ku ka moweeakomu wita anu tekosi, tia pusaka anu lalu tekosi inso a luwuno tongku. Kupewowoloo, omue komoboi Aku: Amaku, ka nahi komewolili mebinta Aku.

²⁰ Kahinaano, kana asa beine anu nahi petenunu a ntamano, kanatuu koa mbo'u omiu nahi mpetenunu ndi Ongkue, hei suku Isaraeli, kanandiomo pau-Do i Ue.

²¹ Rongeo! A wawo luwuno pongku londa teronge pengesedo nana'ote Isaraeli anu mpo'ema ntu'u, hangano mpobiniki iramo sala anu tesaa, ka kumolupe Ira i Ue, Ue Alado.

²² Pepokulemo, hei nana'ote anu mehapuakono pompe'ala-alano! Aku mokotompa komiu inso a mpehapuamiu.” ”Ndio kamimo, me'aiwa kami ndi Omiu, hangano Omiumo Ue, Ue Alamami.

²³ Menteano, luwuno po'ianga pesombaa onaemo megaupi; tedoa maroa a luwuno pongku atuu! Menteeano, butu ndi Ondae i Ue, Ue Alato, hinao tekaduduiano Isaraeli!

²⁴ Sine, lahumoa anu mompokoko'ii tumeleo ka ipingko luwuno hasilino pe'iseido uempu'uto mompu'u tempo tomemongura; bawaano bembe bimba ka sapido, ana ntama ka ana beinedo.

²⁵ Aiwamo tompepombole saru memokoko'ii, ka po'ineeomo titito tumutuwi kita, hangano mentehala kitamo ndi Ondae i Ue, Ue Alato, ontae ka uempu'uto mompu'u tempo tomemongura hawe oleo andio. Nahi to mperorongeakono pau-Do i Ue, Ue Alato.”