Yeremia 28 - Wunta Mempori

Teposisalado Nabi Yeremia ka Nabi Hanania

¹ A nta'u atuu, a pompu'uano poparentaano i Sedekia, mokoledo to Yehuda, a wula ko'olima ta'u ko'opaa, nabi Hanania anano i Asuri anu inso i Gibeoni motae ndi ongkue a Raha-Do i Ue, i arono matado sando mpesomba ka luwuno palili,

² ”Kanandiomo pau-Do Ueno luwuakoano, Ue Alado to Isaraeli: Kupuduomo pasangano mokole i Babeli.

³ I larono orua nta'u andio Aku mokuleo a mpo'ianga andio luwuno parewano Raha-Do i Ue anu inalano i Nebukanesa, mokole i Babeli inso a mpo'ianga andio ka winawa i Babeli.

⁴ I Yekonia mbo'u anano i Yoyakimi, mokoledo to Yehuda, ka luwuno mia mentinadi inso i Yehuda anu winawa i Babeli Aku wawa ira mpekule a mpo'ianga andio, kanandiomo pau-Do i Ue! Mentee ntu'u, Aku puduo pasangano mokole i Babeli atuu!”

⁵ Ka i'amba Nabi Yeremia motae ndi Nabi Hanania i arono matado sando mpesomba ka i arodo luwuno palili anu mpentade i Raha-Do i Ue,

⁶ motae nabi Yeremia, ”Ami! Po'ineeomo Ondae i Ue weweuo kanandio! Po'ineeomo Do'ihiio i Ue luwuno pau anu pinaumu ta gagi atuu ka ipinokule luwuno parewano Raha-Do i Ue ka luwuno mia mentinadi inso i Babeli a mpo'ianga andio.

⁷ Polomo koa perorongeakonomo pau anu aku pauo a birimu ka birido luwuno palili:

⁸ Luwuno nabi se'eluno ongkue ka se'eluno omue, inso i ndi'ipua mpopau iramo anu ta gagi a hadio wita po'ianga ka a luwuno poparentaa anu langkai mongkona peteaa, masolaa, ka haki lele.

⁹ Ka mongkona asa mia nabi anu mompau anu ta gagi mongkona rodoa, tewala anu ta gagi pinauno nabi atuu inihii, ka i'amba pinokonto'ori, nine nabi atuu mentee ntu'u tinena-Do i Ue.”

¹⁰ Ka i'amba Nabi Hanania umalao keu ponsela atuu inso a banga we'uno i Nabi Yeremia, ka mepuduakono.

¹¹ Motaeomo i Hanania i arono matado luwuno palili, ”Kanandiomo pau-Do i Ue: Kanandiomo Aku puduo pasangano i Nebukanesa, mokole i Babeli, inso a banga we'uno luwuno tongku i larono orua nta'u andio!” Sine Nabi Yeremia lumako inso i ra'ai.

¹² Umarino Nabi Hanania puduo keu ponsela inso a banga we'uno Nabi Yeremia, haweomo pau-Do i Ue ndi Yeremia,

¹³ ”Lakomo ka pauo ndi Hanania: Kanandiomo pau-Do i Ue: Upuduomo keu ponsela, sine Aku moweweu labu ponsela gagi euno!

¹⁴ Hangano, kanandiomo pau-Do Ueno luwuakoano, Ue Alado to Isaraeli: Pasanga labu Aku numaao a wawo banga we'uno luwuno tongku andio, ranta ka dompetuundu ndi Nebukanesa, mokole i Babeli. Mentee ntu'u, ira mpetuundu ndi onae! Tendeano maupo anano wula mo'ila Kupeweengakonomo ndi onae.”

¹⁵ Ka i'amba motae Nabi Yeremia ndi Nabi Hanania, ”Rongeomo, hei Hanania! Ondae i Ue nahi Dotenako, sine uweweu iramo tongku andio mpompe'ala-ala pegaupi.

¹⁶ Onaemo pu'uno, kanandiomo pau-Do i Ue: Menteeano, Aku sumaariko inso i wawontolino. Ta'u koa mbo'u andio omue komate, hangano upaleleomo pe'ewa ndi Ondae i Ue.”

¹⁷ Mateomo Nabi Hanania a nta'u koa mbo'u atuu, a wula ko'opitu.