Yeremia 27 - Wunta Mempori

Tinena tumembio pasangano Babeli

¹ A pompu'uano poparentaano i Sedekia, ana ntamano i Yosia mokoledo to Yehuda, haweomo pau andio inso ndi Ondae i Ue ndi Yeremia.

² Kanandiomo pau-Do i Ue ndi ongkue, ”Weweuomo koloro ka keu ponsela, ka i'amba naaomo atuu a banga we'umu!

³ Ka i'amba oliwiomo pe'oliwi ndi mokoledo to Edomi, mokoledo to Moabi, mokoledo inuleno i Amoni, mokoledo to Tirusi ka mokoledo to Sidoni, telalo a mia mentinena anu mehawe iramo i Yerusale mpe'aro ndi Sedekia, mokoledo to Yehuda.

⁴ Parenta iramo ka domempauako ira uedo pau-Do Ueno luwuakoano, Ue Alado to Isaraeli: kanandiomo asalakono imempauako ira uemiu:

⁵ Ongkuemo saru roso-Ku anu langkai ka tokiaku anu tetasiako mokogagio tolino, mia ka pinotuwu anu kongko i wawontolino, ka Kupeweengakono a mia anu mentee a pongkita-Ku.

⁶ Kanandio-andio, Kupeweengakono luwuno wita andio a ngkaeno tetenaa-Ku, i Nebukanesa, mokole i Babeli. Maupo kondehora mo'ila Kupeweengakonomo ka dompetuundu ndi onae.

⁷ Luwuno tongku ira mpetuundu ndi onae, ka a ana'ueno, ranta ka ihawe tempono witano onaeno mbo'u dompongko'alao hadio tongku ka mokole langkai.

⁸ Sine tongku ka poparentaa anu nahi behe metuudu ndi Nebukanesa, mokole i Babeli, ka anu nahi behe numaao banga we'uno a ntoto pasangano mokole Babeli, tongku atuu Aku humukuakono ponai, mokoninggoa ka haki lele, kanandiomo pau-Do i Ue, ranta ka Kupokotampulaako ira kaedo.

⁹ Gagi, siimo imperorongeako ira nabimiu, anu hadio tino'orino, puu mpo'ipi, anu mompau nahi manasa ta gagi, puu ponsihirimiu anu mpotae ndi omiu, ’Si mebehe mpetuundu ndi mokole i Babeli!’

¹⁰ Hangano ondae mpompau anu ta gagi nahi mentee ndi omiu ka imempinoko'olai inso i witamiu ka Kusiarawo komiu ka i'amba memate.

¹¹ Sine tongku anu behe numaao banga we'uno a ntoto pasangano mokole i Babeli ka metuundu ndi onae, Aku mo'ineeo kongko i witano, kanandiomo pau-Do i Ue, ira me'anggao ka mpo'ia i ra'ai.”

¹² Ndi Sedekia, mokoledo to Yehuda, kupohaweomo pau mengkena, ”Naaomo banga we'umu a ntoto pasangano mokole i Babeli. Petuundumo ndi onae ka a mpalilino, asalakono komiu mentuwu.

¹³ Tembio omue ka palilimu asalakono memateako ponai, mokoninggoa ka haki lele kana anu pinau-Do i Ue mongkona tongku anu nahi behe metuundu ndi mokole i Babeli atuu?

¹⁴ Si mperorongeakono pinaudo nabi anu mpotae ndi omiu, ’Si mebehe mpetuundu ndi mokole i Babeli!’ Menteeano, ondae mpompau anu ta gagi nahi mentee ndi omiu.

¹⁵ Hangano, nahi Kutena ira, kanandiomo pau-Do i Ue. Ondae mpompau anu ta gagi nahi mentee a nee-Ku, onaemo ka Kusiarawo komiu ka memate mperonga saru luwuno nabi anu mpompau anu ta gagi ndi omiu.”

¹⁶ A luwuno sando mpesomba ka luwuno palili andio mbo'u ongkue mepau, ”Kanandiomo pau-Do i Ue: Si mperorongeakono pinaudo nabimiu anu mpompau ndi omiu: ’Menteeano, nahi tehine mbo'u parewano Raha-Do i Ue ta winawa mekule inso i Babeli!’ Hangano ondae mpompau anu ta gagi nahi mentee ndi omiu.

¹⁷ Siimo imperorongeako ira! Impetuundumo ndi mokole i Babeli, ka komiu mentuwu. Tembio kota andio asalakono ka igagi terawo-rawo?

¹⁸ Tewala ondae atuu lano nabi ka pau-Do i Ue kongko ndi ondae, moikoomo dodadai Ira Ueno luwuakoano, ka si winawa i Babeli luwuno parewa anu da tebinta a Raha-Do i Ue, a langkanaeno mokoledo to Yehuda, ka i Yerusale.

¹⁹ Hangano kanandiomo pau-Do Ueno luwuakoano mongkona luwuno karuno, bolusano ’Tahi’ ka luwuno pontumbono, saru luwuno parewa anu da tebinta i kota andio,

²⁰ anu nahi alao i Nebukanesa, mokole i Babeli, tempono iwawao i Yekonia anano i Yoyakimi, mokoledo to Yehuda, a pontadia meronga luwuno mia pinemota'u i Yehuda ka i Yerusale, inso i Yerusale lumako i Babeli.

²¹ Mentee ntu'u, kanandiomo pau-Do Ueno luwuakoano, Ue Alado to Isaraeli, mongkona luwuno parewa anu da tebinta a Raha-Do i Ue, a langkanaeno mokoledo to Yehuda, ka i Yerusale:

²² Luwuno ta winawa i Babeli ka kongko mpiha i ra'ai hawe oleo ka Ku'aiwa mbo'u, kanandiomo pau-Do i Ue, ka i'amba winawa mbo'u i ndi'ai.”