Yeremia 25 - Wunta Mempori

Pinau mongkona tadiado to Yehuda i Babeli 25:1-14

¹ Pau anu hawe ndi Yeremia mongkona luwuno to Yehuda a nta'u ko'opaa poparentaano i Yoyakimi ana ntamano i Yosia, mokoledo to Yehuda, onaemo a nta'u amba-ambano poparentaano i Nebukanesa, mokole i Babeli.

² Pau atuu ipohaweo i Yeremia a luwuno suku Yehuda ka a luwuno palilino Yerusale, ipotae,

³ ”Mompu'u ta'u kohopulu ka otolu poparentaano i Yosia anano i Amoni, mokoledo to Yehuda, hawe oleo andio, gagi rua pulu ka otolu nta'umo tehineno, pau-Do i Ue hawe ndi ongkue ka kongkoku mpiha mohaweo ndi omiu, sine omiu nahi mebehe mperorongeakono.

⁴ Ondae i Ue kongko-Do mpiha tumena ira ndi omiu luwuno tetenaa-Do, luwuno nabi, sine omiu nahi mebehe mperorongeakono ka mpekokoongakono.

⁵ Dompotae: Intepidimo singge mia inso a mpelelumiu anu mosa'o ka inso a luwuno wineweumiu anu mosa'o, ka impo'ia mpiha i wita anu Doweeakomiumo i Ue ka a uempu'umiu inso i ndi'ipua hawe nahina tampulaano.

⁶ Si mpetonda a mpinesombai susua saru mpesomba ka mpenggolontu mpesombaio. Si mpokontesingkaakono wineweuno kaemiu tekuda-Ku, ka si Kupompotiiakomiu masolaa.

⁷ Sine nahi imperorongea-Kune, kanadiomo pau-Do i Ue, ranta ka impokotesingkaakono wineweuno kaemiu tekuda-Ku gagi urasa'omiu.

⁸ Onaemo pu'uno kanandiomo pau-Do Ueno luwuakoano: Hangano nahi imperorongeakono luwuno pau-Ku,

⁹ menteeano, Aku tumena ira luwu suku tongku i utara, kanandiomo pau-Do i Ue, ka lumeluo mbo'u i Nebukanesa, mokole i Babeli, tetenaa-Ku atuu; Aku wawa ira me'ewaio wita andio, palilino ka umewai ira tongku petengi-tengino andio, anu Aku rumopuo ka weweuo gagi asa anu mompokodoito, pomansu pasinggiri ka terawono anu nahina tampulaano.

¹⁰ Aku mokotampulao inso i olodo suara mawongkoa ka po'undea, suarano umbungkoroi tama ka umbungkoroi beine, unino watu pogili saru mbo'u wantano pelita.

¹¹ Luwuno wita andio ta gagi rawono ka boni-boni. Luwuno tongku andio ira megagi atano mokole i Babeli pitu pulu nta'u tehineno.

¹² Umarino sompo pitu pulu nta'u atuu, kanandiomo pau-Do i Ue, Aku moweweu pombaloa ndi mokole i Babeli ka tongku atuu hangano salado, saru mbo'u witado to Kasidimi, saru weweuo gagi po'ianga anu boni-boni anu nahina tampulaano.

¹³ Aku motiiakono wita andio luwuno anu pinau-Ku mongkona onae, luwuno anu teburi a wunta andio kana'umpe anu ipauomo i Yeremia mongkona luwuno tongku atuu

¹⁴ Hangano, ondae mbo'u ira megagi atado hadio tongku ka luwuno mokole anu langkai. Aku humuku ira menunu saru poweweudo ka wineweuno kaedo.”

Piala tekuda-Do i Ue a luwuno tongku 25:15-38

¹⁵ Kanandiomo pau-Do i Ue, Ue Alado to Isaraeli, ndi ongkue, ”Alaomo inso a ngkae-Ku piala me'ihi anggoro mokulano tekuda andio ka ihino popo'inuako iramo luwuno tongku anu kutenaakomu ndi ondae.

¹⁶ Ira me'inuo ka do'amba kobangku-bangku ka nami domponto'ori hangano ponai anu Aku motiio i olodo.

¹⁷ Ku'alaomo piala atuu inso a ngkae-Do i Ue, ka i'amba ihino kupopo'inuako ira luwuno tongku anu Dotena aku i Ue ndi ondae:

¹⁸ ndi Yerusale ka luwuno kotano Yehuda, saru luwuno mokole ka luwuno mia pinemota'u, ka ipinokogagi luwuno atuu terawo-rawo, boni-boni ka pomansu pasinggiri, saru totonaa ka teweweuno a oleo andio;

¹⁹ ndi Pirao, mokole i Masiri, saru luwuno pegawai ka mia pinemota'uno, saru luwuno palilino,

²⁰ ka luwuno mia hawe inso a mperupa-rupa tongku; a luwuno mokole i wita Usi; a luwuno mokole i wita Pelisiti, onaemo Asikeloni, Gasa, Ekeroni ka ondae anu da mentuwu i Asidodi;

²¹ ndi Edomi, Moabi ka inuleno i Amoni;

²² a luwuno mokole i Tirusi, luwuno mokole i Sidoni ka a luwuno mokole i wita i wiwi ntahi i asatowano tahi;

²³ ndi Dedani, Tema, Busi ka luwuno mia anu kumeruo wuu a wiwi uluno;

²⁴ a luwuno mokoledo to Ara ka luwuno mokole anu mehawe inso a mperupa-rupa tongku anu mpo'ia i pada one;

²⁵ a luwuno mokole i Simiri, luwuno mokole i Elami, ka luwuno mokole i Madai;

²⁶ a luwuno mokole i utara, anu umpeda ka olai, nte'o'asa, ka a luwuno poparentaa ntolino anu kongko i wawontolino. Mokole Sesaki mbo'u ta uminuo umarino ondae.

²⁷ Umarino atuu asalakono ka upauako ira: Kanandiomo pau-Do Ueno luwuakoano, Ue Alado to Isaraeli: Impo'inumo ranta molangu ka mengkolua-lua! Tebangkumo ka si pewangu mbo'u, hangano ponai anu Aku motiio i olomiu!

²⁸ Sine tewala nahi domebehe mentarimao piala atuu inso a ngkaemu ka dome'inuo ihino, asalakono ka upauako ira: Kanandiomo pau-Do Ueno luwuakoano: Asalakono ime'inuo!

²⁹ Hangano menteeano a ngkota anu nineeako montonda nee-Ku, Aku mompu'u motiio masolaa. Nde komiu mentolake inso a mpohuku? Nahi komiu mentola inso a mpohuku, hangano Aku mompotii ponai a luwuno palilino tolino, kanandiomo pau-Do Ueno luwuakoano.

³⁰ Omuemu isa'a, pauomo luwuno pau anu ta gagi andio ndi ondae. Pauako iramo: Ondae i Ue Ira mengaoli kana singa inso a mantandeano ka moporongeo suara-Do inso a mpo'ianga-Do anu mempori; Ira mengaoli meroku a mpo'ianga pompakambia-Do, asa pohio, kana pohiodo anu mposesa wua anggoro, a luwuno palilino tolino.

³¹ Suara magaga ta hawe i tompano tolino, hangano Ondae i Ue hinao tinuntu-Do a luwuno tongku. Dopekara-karakono luwuno anu tuwu; Mia mosa'o gauno Ira meweengakono a mponai, kanandiomo pau-Do i Ue.

³² Kanandiomo pau-Do Ueno luwuakoano: Menteeano, masolaa ta lumele inso a tongku hawe a tongku, asa angi mokora anu mongkokongiri ta me'a'e inso a luwuno tompano tolino.

³³ A oleo atuu mia anu mempinepate hangano Ondae i Ue ta matumbole inso i tompano tolino hawe i tompano susuano. Nahi ira mensinabangi, ke mepinumpu ke kinaburu. Ondae ira megagi kana ta'i a wita.

³⁴ Ponsabangimo ka peboolimo, hei luwuno puu mpopakambi! Pelundi-lundimo a laro pampawu, hei luwuno petewawa bawaano bembe bimba! Hangano haweakoomo tempomiu ka imensinumbele ka mensiniarawo, ka komiu mentedonta ntesiarawo kana bolusa masuli olino.

³⁵ A luwuno puu mpopakambi nahi ta hina mbo'u tolaa, ka a luwuno petewawa bawaano bembe bimba nahi ta hina mbo'u tolaa.

³⁶ Rongeo! Luwuno puu mpopakambi mpebooli, luwuno petewawa bawaano bembe bimba mposabangi! Hangano Dopokotampulao i Ue pada pakambiado.

³⁷ Boni-boniomo tonga mpada anu manangai, hangano tekuda-Do i Ue anu tensila atuu.

³⁸ Kana singa Ondae bintao tonga ewo-Do, hangano witado gagiomo boni-boni, hangano ponai anu mompokonsii, hangano tekuda-Do anu tensila atuu.”