Yeremia 24 - Wunta Mempori

Pongkita mongkona orua karandi wua ara

¹ Ondae i Ue mopokitao ndi ongkue, mentee ntu'u, orua karandi wua ara ninaa i arono Raha-Do i Ue. Mongkona atuu gagi umarino i Nebukanesa, mokole i Babeli, wawa ira a pontadia i Yekonia ana ntamano i Yoyakimi, mokoledo to Yehuda, saru luwuno mia pinemota'udo to Yehuda, puu mpo'angga, saru anu pande mo'angga labu inso i Yerusale ka wawa ira i Babeli.

² Karandi anu asa me'ihi wua ara anu moiko ntu'u kana wua ara amba wuano, sine karandi anu susua me'ihi wua ara anu mosa'o, anu nahi pinokongkaa hangano mosa'o.

³ Ka i'amba mepau Iramo i Ue ndi ongkue, ”Hapake anu kinitamu, Yeremia?” Sangkiku, ”Wua ara! Wua ara anu moiko tedoa moiko, ka wua ara anu mosa'o tedoa mosa'o, anu nahi pinokongkaa hangano mosa'o.”

⁴ Ka i'amba haweomo pau-Do i Ue ndi ongkue,

⁵ ”Kanandiomo pau-Do i Ue, Ue Alado to Isaraeli: Mengkena kana wua ara anu moiko andio, kanatuumo a moikoado to Yehuda anu Kutadi ira inso a mpo'ianga andio a pontadia, i witado to Kasidimi.

⁶ Aku mo'aroo mata-Ku ndi ondae a moikoado, ka Aku wawa ira mpekule i wita andio. Aku wangu ira, komba kumale-kale ira. Aku paho ira, komba buta ira.

⁷ Aku moweeako ira aroa ka domento'ori Aku, nine Ongkuemo Ue. Ondae ira megagi bawaa-Ku ka Ongkue gagi Ue Alado, hangano ira mpepokule ndi Ongkue a tompaano aroado.

⁸ Sine, kanandiomo pau-Do i Ue: Mentee ntu'u, kana wua ara mosa'o atuu anu nahi pinokongkaa hangano mosa'o, kanatuumo Aku weweuo i Sedekia, mokoledo to Yehuda, saru luwuno mia pinemota'uno, ka luwuno toreano palilino Yerusale anu da mpo'ia i wita andio ka anu rodo i wita Masiri.

⁹ Aku weweu ira gagi asa anu mongkokongirido luwuno poparentaa i tolino, gagi mokoko'iia ka pasinggiria, gagi tetewehia ka totonaa a luwuno po'ianga ba isua Kusiarawo ira.

¹⁰ Aku mompotii ponai, mokoninggoa ka haki lele i olodo, ranta ka domepingko pinokotampula inso i wita anu Kuweeako iramo ndi ondae ka uempu'udo.”