Yeremia 23 - Wunta Mempori

Dandi mongkona Tumba Moleo tiano i Daudi 23:1-8

¹ ”Memasola ira ntu'u puu mpompakambi anu mpo'inee ira bawaano bembe bimba pinakambi-Ku ntetadi ka ntesiarawo!” kanandiomo pau-Do i Ue.

² Onaemo pu'uno kanandiomo pau-Do i Ue, Ue Alado to Isaraeli, a luwuno puu mpompakambi anu mempakambio tongku-Ku, ”Impo'inee iramo bawaano bembe bimba-Ku ntesiarawo ka ntepoponsia, ka nahi imedagai ira. To'oriomo, Aku mombalo ndi omiu luwuno wineweumiu anu mosa'o, kanandiomo pau-Do i Ue.

³ Ongkue isa'a pumpu ira anu ntebinta inso a bawaano bembe bimba-Ku inso a luwuno wita ba isua Kusiarawo ira. Aku wawa ira mpekule a mpada pakambiado. Ka do'amba mpo'ule ka ntetiangi hadio.

⁴ Aku mompotoroako ira puu mpompakambi anu ta pakambi ira, onaemo ka nahi ira medoito mbo'u ke ntededengke, ka nahi ta hina maupo te'asa anu ta tetadi, kanandiomo pau-Do i Ue.

⁵ Menteeano, ta hawe tempono, kanandiomo pau-Do i Ue, nine Aku motuwuo Tumba Moleo tiano i Daudi. Onae ta moparenta gagi mokole pande mosongka ka ta weweuo moleoa ka menteea i wita atuu.

⁶ A tempo poparentaano Yehuda ta pinotola ka Isaraeli ta tuwu rodo. Ndiomo nee anu iwineeako: Ondae i Ue Moleoato.

⁷ Onaemo pu'uno, kanandiomo pau-Do i Ue, menteeano, tempono ta hawe, mia nahi ta motae mbo'u: Hangano Ondae i Ue anu tuwu anu tumaate ira to Isaraeli mpeluarako inso i wita Masiri!,

⁸ tendeano: Hangano Ondae i Ue anu tuwu anu montaate ka wawa ira inuledo suku Isaraeli mpeluarako inso i wita utara ka inso a luwuno wita ba isua Dosiarawo iramo! Ka do'amba mpo'ia i witado ondaedo.”

Ondae i Ue umewai ira nabi mpompau nahi mentee 23:9-40

⁹ Mongkona luwuno nabi. Aroaku tedoa mompemasusa a laro ngkoroiku, luwuno wukuku nahi moroso. Ongkue kana mia molangu, kana tama anu hadio lahi ipo'inu anggoro, hangano Ondae i Ue ka hangano pau-Do anu mempori.

¹⁰ Wita bukeako anu mponsosabo; mentee ntu'u, hangano pontotonaa londaomo wita ka memoleu iramo pada ewo i pada one; anu inungkedo onaemo poweweu anu mosa'o, ka rosodo komba moleoa.

¹¹ ”Mentee ntu'u, moiko nabi maupo sando mpesomba mpoweweu gau mosa'o; maupo a raha-Ku Kuhaweo wineweudo anu mosa'o, kanandiomo pau-Do i Ue.

¹² Onaemo pu'uno pesalaado ta kana luwuno po'ianga molore a laro wongi-wongido; a laro wongi-wongi ira ntelendo ka ntebangku i ra'ai. Hangano Aku mompotii masolaa ndi ondae a nta'u hukuado, kanandiomo pau-Do i Ue.

¹³ I olodo nabido to Samaria Kukitao mongkona anu nahi tekona: ondae mpompau anu ta gagi a neeno Baala ka mpokontesaao bawaa-Ku Isaraeli.

¹⁴ Maupo i olodo nabi i Yerusale Kukitao mongkona anu mongkokongiri: ondae mponsosabo ka mentuwu mpelelu nahi moleo; ondae menteahako ira mia anu mpoweweu mosa'o, ranta nahina maupo te'asa mia anu tepidi inso a wineweuno anu mosa'o. Luwudo megagi kana Sodomo ndi Ongkue ka palilino kana Gumora.”

¹⁵ Onaemo pu'uno kanandiomo pau-Do Ueno luwuakoano mongkona luwuno nabi atuu, ”Menteeano, Aku weweu ira mpongkaa rasu mopa'i ka mpo'inu uwoi merasu, hangano inso a luwuno nabi i Yerusale pinogau mosa'o lumeleomo a luwuno wita.”

¹⁶ Kanandiomo pau-Do Ueno luwuakoano, ”Siimo perorongeakono pinaudo luwuno nabi anu mpompau anu ta gagi ndi omue! Ondae butu mpoweeakomu pomperorohia anu nahina pengkonaano, ka mpohaweo pongkita pohaweno aroado ondaedo, komba hapa anu meluarako inso a nganga-Do i Ue.

¹⁷ Ondae wela mpotae a luwuno mia anu mentetewehi Aku: ’Ondae i Ue mepau Komiu ntekadudui!’ ka a sompo mia anu mentondao moteano aroado dompotae: Masolaa nahi ta umalu komiu!”

¹⁸ Hangano isemake anu hawe a laro nterisoa-Do i Ue, ranta ka ipekokoongakono ka rumongeo pau-Do? Isemake anu mekokoongakono pau-Do ka rumongeo?

¹⁹ Kitaomo, angi mokora-Do i Ue, tensilano tekuda-Do, meluarakoomo, pewolilino lompiu umaluo uludo mia mosa'o gaudo.

²⁰ Tekuda-Do i Ue nahi ta temonto, ranta ka Doweweuo ka mokogagio tinoono aroa-Do; A oleo pokotompa ka i'amba mento'orio ntu'u mongkona atuu.

²¹ ”Nahi Kutena ira nabi atuu, sine ondae mansa melako; nahi Kupepau ndi ondae, sine mpompau ira anu ta gagi.

²² Ande-andeno mehawe ira a nterisoa-Ku, ira mempaleleo pau-Ku a bawaa-Ku, mewawa ira mpepokule inso a mpeleludo anu mosa'o ka inso a wineweudo anu mosa'o.

²³ Nde Ongkue andioke Ue Ala butu a mpo'ianga anu umpeda, kanandiomo pau-Do i Ue, ka komba Ue Ala a mpo'ianga anu olai mbo'u?

²⁴ Ande-andeno asa mia mewuni a mpo'ianga tewuni, nde nahi Aku kumitaoke? kanandiomo pau-Do i Ue. Kombake Kubuketio langi ka tolino? kanandiomo pau-Do i Ue.

²⁵ Kurongeomo hapa anu mempinaudo nabi, anu mpompau nahi mentee a nee-Ku saru mpotae: Mo'ipi akumo, mo'ipi akumo!

²⁶ Hawe te'ipiake mongkona atuu kongko i laro aroado nabi anu mpompau nahi mentee ka mpompau pompopo'oono aroado ondaedo,

²⁷ anu mpontooako luwuno mo'ipido anu domentutuluo a asa mia ka anu susua, weweu ira bawaa-Ku mengkolupeo nee-Ku, mengkena kana uempu'udo mengkolupeo nee-Ku hangano Baala?

²⁸ Nabi anu mohawe mo'ipi, po'ineeomo itutuluo mo'ipi atuu, ka nabi anu mohawe pau-Ku, po'ineeomo ipohaweo pau-Ku atuu a menteeano! Hapa penggoeno olono seami ka gandu? Kanandiomo pau-Do i Ue.

²⁹ Kombake pau-Ku kana api, kanandiomo pau-Do i Ue ka kana palu-palu anu morawo pongku watu?

³⁰ Onaemo pu'uno, menteeano, kanandiomo pau-Do i Ue, Aku umewai ira nabi, anu mponako pau-Ku asa mia inso a walino.

³¹ Menteeano, kanandiomo pau-Do i Ue, Aku umewai ira nabi anu mensala pakeo elodo mpo'onde-onde mpompohawe pau-Do anu pabawa.

³² Menteeano, Aku umewai ira anu mpompau luwuno mo'ipi pegaupi, kanandiomo pau-Do i Ue ka anu tumutuluo ranta bawaa-Ku ntesaaako pegaupido ka mpompaudo anu nahi mentee. Nahi Kuhori tumena ira ka nahi Kuhori parenta ira. Ondae nahina ntu'u tududo a tongku andio, kanandiomo pau-Do i Ue.

³³ Tewala tongku andio, ke nabi, ke sando mpesomba mpesikeno ndi omue: Hapake pinau-Do anu pabawa anu pinopotembi-Do i Ue? sangki iramo: Omiumo tinembi atuu! Onaemo pu'uno Aku tumadi komiu inso i aro-Ku, kanandiomo pau-Do i Ue.

³⁴ Te'aro a nabi ke sando mpesomba, ke a mpalili anu mpepau mongkona ”pinauno pinesombai anu pinopotembi-Do i Ue”, Aku weweuo pombaloa a mia atuu ka somborino.

³⁵ Kanandiomo anu asalakono imempauo, singge mia a walino ka singge mia a mpepaekomono: Hapa sangki-Do i Ue? Hapa anu pinau-Do i Ue?

³⁶ Sine, siimo impopopau-pauo mbo'u ”pinauno pinesombai anu pinopotembi-Do i Ue”, hangano anu gagi tembiano sompo mia onaemo pauno onaeno. Omiumo anu mewowaliteo luwuno pau-Do Ue Ala anu tuwu, Ueno luwuakoano, Ue Alato.

³⁷ Kanandiomo asalakono upauakono nabi: Hapa sangki-Do i Ue ndi omue? Hapa anu pinau-Do i Ue?

³⁸ Sine tewala da mpepau komiu mongkona ’pinauno pinesombai anu pinopotembi-Do i Ue’, asalakono kanandiomo pau-Do i Ue: Omiu da mpopake pau ’pinauno pinesombau anu pinopotembiako-Do i Ue’, maupo montena Aku mia pauakomiu: Siimo impepau mongkona ’pinauno pinesombai anu pinopotembiako-Do i Ue’.

³⁹ Onaemo pu'uno, nahi Aku merio komiu ka mepasiakomiu inso i aro-Ku, omiu saru kota anu Kuweeakomiumo ka a uempu'umiu.

⁴⁰ Aku humukuakomiu mokoko'iia ka pontetewehi anu nahina tampulaano, anu nahi ta kinolupe.”