Yeremia 22 - Wunta Mempori

¹ Kanandiomo pau-Do i Ue, ”Lakomo a langkanaeno mokoledo to Yehuda ka pohaweomo pau andio i ra'ai.

² Pauomo: Rongeomo pau-Do i Ue, hei mokoledo to Yehuda anu mentoro a wawo ngkadera poparentaano i Daudi, omue, luwuno pegawaimu ka palilimu anu mewinso telalo a mpewowa langkai andiodo!

³ Kanandiomo pau-Do i Ue: Weweuomo moleoa ka menteea, potolaomo anu rinontu inso a ngkaeno anu bobarasaio. Si pompokonsii ka si bobarasai ira mia mehawe, nana'ote nahina amano ka tuwu beine, ka si mbo'u po'uwu reano mia nahina salano a mpo'ianga andio.

⁴ Hangano tewala mentee ntu'u impeleluakono pau andio, ka telalo a luwuno mpewowa langkaino langkanae andio ira mpewinso mokole anu mpentoro a wawo ngkadera poparentaano i Daudi. Ondae mpe'ula a ngkareta ka ngara, domentonda ira luwuno pegawai ka palilido.

⁵ Sine tewala nahi mperorongeakono luwuno pau andio, asalakono Aku mesumpa a ngkoroi-Ku, kanandiomo pau-Do i Ue, nine langkanae andio ta gagi terawo-rawo.

⁶ Hangano kanandiomo pau-Do i Ue mongkona somborino mokoledo to Yehuda: Omue kana Gileadi ndi Ongkue, kana punsuno Libano! Sine manasa Aku weweuko gagi pada one, gagi kota nahina mo'iangario.

⁷ Aku pakosio anu ira meropuko, singge mia saru parewa mpeteano; ira mentuehio keu arasi bininikimu ka mpetadiakono a laro api.

⁸ Hadio tongku ira ntelaloio kota andio ka asa mia ta motaeakono anu susua: Tembio Ondae i Ue ka Doweweuo mongkona atuu a ngkota anu langkai andio?

⁹ Mia ta sumangki: Hangano, domengkolupeomo pedandia-Do i Ue, Ue Alado, ka do'amba mpenggolontu mpesombai ira pinesombai susua ka mpesomba ndi onae.”

Pinau anu ta gagi ndi Mokole Salumu

¹⁰ Si mpengesieo mia mate ka si mpompemasusa hangano onae. Sine pengeseiomo onae anu lumakoomo, hangano nahi ta mekule mbo'u, ka nahi ta kumitao mbo'u wita hinaano.

¹¹ Hangano kanandiomo pau-Do i Ue mongkona i Salumu anano i Yosia, mokoledo to Yehuda, anu gagi mokole umeuo i Yosia, amano, ka bintao po'ianga andio, ”Onae nahi ta mekule mbo'u i ndi'ai,

¹² sine onae ta mate a mpo'ianga pontadia, ka nahi ta kumitao mbo'u wita andio.”

Pinau anu ta gagi ndi Mokole Yoyakimi

¹³ Masola ntu'u onae anu mowangu langkanae nahi pe'empehiako menteea ka luwuno bolongko i wawono nahi pe'empehiako moleoa, anu mompake pe'asa miano mo'angga tumena mpenao ka nahi poweeakono tambono;

¹⁴ anu motae, ”Aku mowangu langkanaeku anu langkai ka luwuno bolongko i wawono anu malua!”, ka i'amba betao ta moweweu pentangoa, umapiiakono keu arasi ka paradao motaha.

¹⁵ Nde potaemu omue gagi mokole, tewala omue metandi a pompakea keu arasi? Kombake amamu mongkaa ka mo'inu moweweu moleoa ka menteea, ranta moikoomo atuu ndi onae.

¹⁶ Onae umalaakono kara-karano mia marasai ka mia mongkokolaro, ranta luwuno atuu moiko. Kombake atuu pengkonaano tumo'ori Aku? kanandiomo pau-Do i Ue.

¹⁷ Sine matamu ka aroamu butu te'aro a po'ungkea me'uraa, a mpo'uwua reano mia anu nahina salano, a porontua ka pobobarasaia!

¹⁸ Onaemo pu'uno kanandiomo pau-Do i Ue mongkona i Yoyakimi anano i Yosia, mokoledo to Yehuda, ”Onae nahi ira mensabangio mia: Wainto pepaekompoku, wainto pepaekompoku beine! Onae nahi ira mensabangio mia: Wainto ue, wainto Tua Langkai!

¹⁹ Onae ta kinaburu kana pongkaburua kalide, rinende ka pinetadiako i bungkuno pewowa langkaino Yerusale.”

Pinau anu ta gagi ndi Mokole Konia 22:20-30

²⁰ Pewuatakomo i Libano ka peboolimo! Poporongeomo suaramu i Basani! Peboolimo inso i Abarimi, hangano luwuno pinehohawamu tampulaomo!

²¹ Mepau Akumo ndi omue tempono da sosanaamu, sine upotae, ”Nahi kubehe merorongeakono!” Onaemo atuu pelelumu mompu'u da umongura, hangano nahi ubehe merorongeakono pau-Ku!

²² Luwuno puu mpopakambimu ta sumaari ira angi mokora, ka luwuno pinehohawamu ira mewinawa gagi mia tinawa. I tempo atuu omue komokoko'ii ka tinetewehi hangano luwuno wineweumu anu mosa'o.

²³ Hei omue anu mo'ia i Libano, ka anu mpeseno a ngkeu arasi! Kotedoa meraipi tempono i'aluko pompemahaki, pompemahaki kana beine anu me'ana!

²⁴ ”Hangano Ongkue anu tuwu, kanandiomo pau-Do i Ue, maupo i Konia anano i Yotakimi, mokoledo to Yehuda, onaemo sinsi pontondoni a ngkae koana-Ku, Aku butako!

²⁵ Aku meweengakomu a ngkaedo mia momporaakono penaamu, a ngkaedo mia anu dinoitoakomu, a ngkaeno i Nebukanesa, mokole i Babeli, ka a ngkaedo to Kasidimi.

²⁶ Aku metadiakomu ka inemu anu me'anaakomu i wita susua, anu komba wita hinaamu; i ra'aimo komiu mate.

²⁷ Maupo domentekewoi ira mpekule i witado, nahi ira mpekule!”

²⁸ Nde mia Konia andioke kusi nahina tuduno, anu ira mempehao mia, ke parewa anu nahi ineheno? Tembio onae ka inuleno mempinepasiako, mempinetadiako i wita anu nahi domento'orio?

²⁹ Hei wita, wita, wita! Rongeomo pau-Do i Ue!

³⁰ Kanandiomo pau-Do i Ue, ”Buriomo mia andio gagi mia anu nahina anano, gagi tama anu nahi hori mehasili a laro ntumuwuno; hangano maupo te'asa mia inso a inuleno nahi ta mokompentoro a wawo ngkadera poparentaano i Daudi ka wali mokopoparenta i Yehuda.”