Yeremia 21 - Wunta Mempori

Tedontaano Yerusale pinauako Mokole Sedekia 21:1-10

¹ Pau inso ndi Ondae i Ue anu hawe ndi Yeremia, tempono Mokole Sedekia tumenao i Pasihuri anano i Malakia ka sando mpesomba Sepana anano i Ma'asea ndi onae saru pe'oliwi,

² ”Pesikenoakamimo pontiso-Do i Ue, hangano i Nebukanesa, mokole i Babeli, meteaa kami! Bara'ura Ondae i Ue Ira weweua kami mengkena kana luwuno wineweu-Do anu kinohali-haliako, ka ibinta kami i Nebukanesa.”

³ Motae i Yeremia ndi ondae, ”Kanandiomo imempauakono i Sedekia:

⁴ Kanandiomo pau-Do i Ue, Ue Alado to Isaraeli: Menteeano, Aku mosuleo parewa mpetea a ngkaemiu, anu pinakemiu mpetea umewaio mokole i Babeli ka luwuno to Kasidimi anu mengkadu komiu i bungkuno rere watu. Aku pumpuo i tonga-tongano kota andio.

⁵ Ongkue isa'a metea umewaiakomiu kae tetande ka tokia anu moroso, saru tekuda, langano tekuda ka bamburu anu langkai.

⁶ Aku tumunduhi ira palilino kota andio, moiko mia maupo kondehora; ira memateako haki lele anu mongkokongiri.

⁷ Umarino atuu, i Sedekia, mokoledo to Yehuda, ka luwuno pegawaino saru palilino kota andio, anu tola inso a haki lele, ponai ka mokoninggoa, Aku meweengako ira a ngkaeno i Nebukanesa, mokole i Babeli, kanandiomo pau-Do i Ue, a ngkaeno iwalido anu momporaakono penaado. Mia ta mepateako ira mata mponai nahina pompehohawa, nahina mokoko'undu ka nahina ampu.

⁸ Sine a tongku andio asalakono ka upauo: Kanandiomo pau-Do i Ue, menteeano, Kupo'aro komiu a nsala ntuwua ka sala matea.

⁹ Isema anu mo'ia a ngkota andio ta mate hangano ponai, mokoninggoa ka haki lele; sine isema anu meluarako inso i ndi'ai ka meweengakono koroino a nto Kasidimi anu kumadu komiu, onae kongko tuwu; penaano onaeno anu gagi rontuano.

¹⁰ Hangano Ku'aropiakonomo mosa'oa kota andio ka komba moikoa, kanandiomo pau-Do i Ue. Kota andio ta pineweengako a ngkaeno mokole i Babeli ka ta sumongkoo.”

Ondae i Ue motuntu moleoa 21:11–22:9

¹¹ Hawe a nsomborino mokoledo to Yehuda. Rongeomo pau-Do i Ue,

¹² ”Kanandiomo pau-Do i Ue, hei inuleno i Daudi: Putusiomo songka anu moleo sompo mo'oru, potolaomo anu rinontu inso a ngkaeno anu bobarasaio, ka si tensilano tekuda-Ku montiu kana api ka tensila nahi pinokompepate, hangano luwuno wineweumiu anu mosa'o!

¹³ Menteeano, Aku gagi ewaimu, hei omiu anu i lembono, torukuno watu a mantandeano, kanandiomo pau-Do i Ue, hei omiu anu mpotae: Isema anu ta metii umewai kami, isema anu ta mewinso a mpo'iangamami?

¹⁴ Aku humuku komiu menunu saru hasilino wineweumiu, kanandiomo pau-Do i Ue. Aku molangao api a ntobuno ka api atuu ta kumaano ka ipingko luwuakoano i horino.”