Yeremia 20 - Wunta Mempori

Totonaano Pasihuri hangano ipangao i Yeremia 20:1-6

¹ Sando mpesomba i Pasihuri anano i Imere, petewawado anu mpodagai Raha-Do i Ue, rumongeo i Yeremia pauo luwuno pau atuu.

² Ka i'amba i Pasihuri tumunduhio i Nabi Yeremia ka ipinanga i wawono Pewowa Langkai Benami a raha-Do i Ue.

³ Tisomono, tempono i Pasihuri motolao i Yeremia inso a mpangano atuu i Yeremia motae ndi onae, ”Ondae i Ue, nahi Ira numeeakomu mbo'u i Pasihuri, tendeano Doitoa inso a luwuno siuno.

⁴ Hangano kanandiomo pau-Do i Ue: Menteeano, Aku weweuko gagi doitoamu omuemu ka a luwuno sambe'emu; ondae ira ntebangkuako ponaino iwalido ka kokumitaakono matamu. Luwuno Yehuda Aku meweengako ira a ngkaeno mokole i Babeli anu ta wawa ira a pontadia i Babeli ka mepateako ira ponai.

⁵ Luwuno arataano kota andio, luwuno hasili pe'iseino, luwuno parewano anu masuli olino ka arataado luwuno mokole i Yehuda Aku meweengakono a ngkaeno iwalido, anu ira me'alao gagi pinomuru ka i'amba luwuno atuu winawa i Babeli.

⁶ Ka omue, Pasuri, ka luwuno mia anu mpo'ia i rahamu, komiu mewinawa gagi mia mentinawa hawe i Babeli. Omue komate ka kinaburu i ra'ai, omue ka luwuno sambe'emu anu upompauako iramo anu ta gagi nahi mentee.”

Pompete'osano i Yeremia 20:7-18

⁷ Ipopandei akumo, oo Ue, ka ongkue tepopandei; Tedoa kupemoroso Komiu ka mehasili Komiu. Ongkue gagi mia tinawa te'asa oleo, luwudo mempasinggiri aku.

⁸ Hangano, sompo kupepau, asalakono aku kumora ka mebooli, ”Nahina moleoa! Pobobarasaia!” Hangano pau-Do i Ue gagiomo pontetewehi ka pasinggiri ndi ongkue, te'asa oleo.

⁹ Tewala mompewowolo aku, ”Nahi kubehe mewowolo Ira ka nahi kubehe mbo'u mepau a nee-Do,” onaemo pu'uno i laro aroaku hinao asa kana api anu tensila, te'uko a laro wukuku. Kuperokuhiakono meteao, sine nahi kupolio.

¹⁰ Mentee ntu'u, Kurongeomo petanga-tangado hadio mia, ”Doitoa inso a luwuno lakoa! Kalakio! Tomengkalakio!” Luwuno sambe'e morosoku mposikori tedontaaku, ”Bara'ura ta koa tepopandei, ka tompokonangio saru mpombalo ndi onae!”

¹¹ Sine Ondae i Ue kumongkomi aku kana puu mpetea anu moroso, onaemo pu'uno anu melampui aku ira ntetidu ntebangku ka nahi domehawe aku. Ondae gagi tedoa memokoko'ii, hangano nahi domehawe aku, asa mokoko'iia anu nahi ta kinolupe ranta nahina tampulaano!

¹² Oo Ueno luwuakoano, anu umarahako ira mia mentee, anu kumitao laro aroa ka aroa, po'ineeomo ka kukitao pombaloa-Miu ndi ondae, hangano kupohaweomo ndi Omiu kara-karaku.

¹³ Penanimo tia-Do i Ue, unde-unde Iramo i Ue! Hangano Dopotolaomo penaano mia mongkokolaro inso a ngkaedo mia anu mpoweweu mosa'o.

¹⁴ Tetotonaaomo oleo tempono kupine'anaako! Po'ineeomo ka si rinonso oleo tempono dope'anaakune ineku!

¹⁵ Tetotonaaomo mia anu mowawa lele ndi ondae amaku, motae, ”Asa nana'ote tama anamiu pine'anaakoomo!” anu weweu ira tedoa mo'unde.

¹⁶ Po'ineeomo mia atuu gagi kana luwuno kota anu winowangunsule-Do i Ue nahina pompehohawa! Po'ineeomo ka irongeo pebooli tempono mo'oru ka pohio mpetea tempono ntonga oleo!

¹⁷ Hangano nahi kupinepate a laro mpe'anakaa, onaemo ondae ineku gagi kaburuku, ka pe'anakaado mentia ranta nahina tampulaano!

¹⁸ Tembioke ka kupeluarako inso a mpe'anakaa, ka kukitao masusaa ka pompemasusa, ranta luwuno oleo ntumuwuku metompaako a laro mokoko'ii?