Yeremia 2 - Wunta Mempori

To Isaraeli binta Ira i Ue

¹ Pau-Do i Ue hawe ndi ongkue, kanandio,

² ”Lako ka pebooliakonomo andio ka domerongeo palilino Yerusale: Kanandiomo pau-Do i Ue: Kurambeo petenunumu i tempono umongura, pongkekewoimu i tempono ugagi umbungkoroi, kana'umpe utondari Aku i pada one, a wita anu nahi rinawohi.

³ I tempo atuu to Isaraeli mempori ndi Ondae i Ue, gagi wua amba-ambano inso a lere-Do. Luwuno anu mengkaano gagi sala, masolaa umalu ira, kanandiomo pau-Do i Ue.

⁴ Rongeomo pau-Do i Ue, hei inuleno i Yako, hei luwuno pe'etu inuledo to Isaraeli.

⁵ Kanandiomo pau-Do i Ue: Hapa anu nahi moleo hinawedo uempu'umiu ndi Ongkue, ranta ka dome'olaia-Kune, tumonda ira pinesombai susua anu nahina tuduno, ka ondaedo gagi nahina tuduno?

⁶ Nahi dompesikeno mbo'u: Isua Irake i Ue, anu tumaate kita mpeluarako inso i wita Masiri, anu wawa kita i pada one, a wita anu londa ka mpebobanga, a wita anu tedoa mokari ka wongi-wongi, a wita anu nahi dontelaloio mia ka nahi dompo'iangario mia?

⁷ Kuwawa komiu a wita anu mewalo ka imperapio wuano ka luwuno anu moiko inso ndi onae. Sine mansamiu mpewinso, imengkokoburutio wita-Ku; wita-Ku imeweweuomo gagi mokoburua.

⁸ Luwuno sando mpesomba nahi dompesikeno mbo'u: Isua Irake i Ue? Mia anu mpompolempa songka nahi domento'ori Aku mbo'u, ka luwuno puu mpompakambi me'ewa ndi Ongkue. Luwuno nabi mpompau anu ta gagi a neeno Baala, ondae mpetonda a lahumoa anu nahi mentudu.

⁹ Onaemo pu'uno Aku mekara-kara mbo'u saru omiu, kanandiomo pau-Do i Ue, ka saru ana'uemiu Aku mekara-karaako ira mbo'u.

¹⁰ Impesakiakomo koa a luwuno togodo to Kitimi ka kitaomo; pontenamo mia lumako i Kedari ka penootio temente ntu'u! Kitaomo horioke gagi anu kanandio:

¹¹ horioke asa tongku tumobosio pinesombaino kahinaano luwuno pinesombai atuu komba Ondae Ue Ala? Sine bawaa-Ku, Ue Alado anu maramba domentobosiakono luwuno pinesombai anu nahi mentudu.

¹² Kokodohoakonomo atuu, hei langi, pondidi-ndidimo ka kohali-haliakonomo ntu'u, kanandiomo pau-Do i Ue.

¹³ Hangano bawaa-Ku mpoweweu orua rupa wineweu mosa'o: domebinta Aku, insoano uwoi tuwua, ka mpokeke ponaapado uwoi, ponaapa anu telompa, anu nahi pokomponaa uwoi.

¹⁴ Nde i Isaraeli atuuke asa mia tinena ke ata mompu'u ihina? Tembio ka igagi rontua?

¹⁵ Ndi onae luwuno singa mongura mpengaoli, mpokomerokuo unino, witano pinokolonda, luwuno kotano tinunu, nahina mbo'u palilino.

¹⁶ Luwuno to Mempisi ka Tahapanahesi mengkeru londao ulumu.

¹⁷ Komba omuemuke anu mokohinao andio a ngkoroimu, hangano ubinta Ira Ue Alamu, tempono Dotaateko a nsala?

¹⁸ Kanandio-andio, hapa uramu lumako i Masiri, komo'inu uwoi koro Nili? Ka hapa uramu lumako i Asuri, komo'inu uwoi koro Eparata?

¹⁹ Pelelumu anu mosa'o ta humukuko, ka ipehapuakono pompe'ala-alano ta bongoko! To'oriomo ka kitaomo, tedoa mosa'o ka mopa'ino tempono ubinta Ira i Ue, Ue Alamu; ka nahi udoito ndi Ongkue, kanandiomo pau-Do i Ue Alano luwuakoano.

²⁰ Hangano mompu'u i ndi'ipua upuduomo pasangamu, ka biteo koloro tanggomu. Upotae: Nahi kubehe mbo'u pine'ata. Mentee ntu'u i wawono sompo pongku anu kontasi-tasi ka i totono sompo keu anu marombo omue mepombole ka mebelesu.

²¹ Kupahokomo gagi anggoro bininiki, gagi wuku mpinopaho anu moiko ntu'u. Nde kana'umpe kau bali gagi pinopaho moboo!

²² Maupo uwo'ohiakono uwoi awu koroimu, mompake hadio sabo, titino salamu kongko mpiha i arono mata-Ku, kanandiomo pau-Do Ue Ala.

²³ Nde kana'umpe ka upotae: Nahi kuhori mokoburutio koroiku, nahi kuhori tumonda ira Baala? Kitaomo pelelumu i lembono, to'oriomo hapa anu umari wineweumu: hei unta waino anu melulu-lulu ngkoraane ngkoramai,

²⁴ kalide mo'ila anu tepaguru i pada one ineheno mompae penaano! Isema ta moko'ontoo po'eheno? Luwuno anu umungkeo siimo ipe'i'isei; ira mehaweo tempono kompemaliiano.

²⁵ Petangkoro, ka si mansa upu sandalamu ka burokomu motu'i! Sine, upotae: Penaa-naamo, nahina tuduno! Hangano kukekewoi ira pinesombai susua, ka ineheku tumonda ira.

²⁶ Kana mia monako anu mokoko'ii hangano kona hawe, kanatuumo to Isaraeli domempinokoko'ii, moiko luwuno mokoledo, mia pinemota'udo, sando mpesombado maupo nabido.

²⁷ Dompotae a asa mpole keu: Omuemo amaku! ka a watu: Omuemo anu me'anaakune! Mentee ntu'u, dompebungkui Aku ka nahi dompewolili ndi Ongkue. Sine, mansano umalu ira masolaa mpotae ira: Oo, Ikadudui kamimo!

²⁸ Isua iramoke pinesombai anu wineweumu tiano koroimu? Po'ineeomo dome'aiwa, tewala dompokokaduduiko tempono i'aluko masolaa! Mentee ntu'u kana hadiono kotamu kanatuumo hadiono pinesombaimu, hei Yehuda!

²⁹ Tembioke ka komiu mpekara-kara saru Ongkue? Me'ewa komiumo luwu ndi Ongkue, kanandiomo pau-Do i Ue.

³⁰ Nahina pengkonaano Kutunduhi ira anamu, pontunduhi nahi domperioo; ponaimu isa'a pingko ira nabimu kana singa mongura anu mongkaa rinakono.

³¹ Hei, omiu anu mentuwu kanandio-andio, ipekokoongakonomo pau-Do i Ue! Nde gagiomo pada onedo to Isaraelike Ongkue ke wita anu wongi mpusu? Tembio bawaa-Ku ka dompotae, ’Tepotola kamimo, nami kimebehe mbo'u me'aiwa ndi Omiu?’

³² Polioke asa ana beine kumolupeo peramba-rambano, ke asa umbungkoroi beine kumolupeo peboo ntongano? Sine bawaa-Ku domengkolupe Akumo, nahi pinokodoa mbo'u tehineno.

³³ Pandeko ntu'u umatorao pesalaamu molulu kinekewoi! Onaemo pu'uno omue mompaguruako luwuno pesalaamu saru mbo'u a luwuno beine belesu.

³⁴ A lembamu hinawe mbo'u reado mia mongkokolaro anu nahina salado; Uhawe ira komba a tempo tekonai mponako! Maupo luwuno atuu anu gagi,

³⁵ upotae: Nahina salaku! Manasaomo, ibinta akumo tekuda-Do! Menteeano anu Aku wawako a mpekara-karaa, hangano upotae: Nahi kutehala!

³⁶ Tedoa upemoruanao a pongkitamu kobalio pelelumu! Maupo inso i Masiri komohawe mokoko'ii, kana ipokoko'iikomo i Asuri.

³⁷ Inso i ra'ai mbo'u komeluarako saru tumandeo kaemu, hangano anu pine'ala-alamu nahi Dotarima ira i Ue ka omue nahi komehasili saru ondae.”