Yeremia 19 - Wunta Mempori

Pido-pido anu rinawo-rawo 19:1-15

¹ Kanandiomo pau-Do i Ue ndi ongkue, ”Lakomo po'oli pido-pido anu wineweu inso a wita pulu, ka i'amba saru ba'opia mia pinemota'udo tongku ka mia pinemota'udo sando mpesomba,

² pelungkamo lumako i Lembono Beni-Hinomi, a Mpewowa Langkai Parewa inso a wita pulu! Pebooliakonomo i ra'ai luwuno pau anu Aku mohaweo ndi omue!

³ Pauomo: Rongeomo pau-Do i Ue, hei luwuno mokoledo to Yehuda ka palilino Yerusale! Kanandiomo pau-Do i Ue asa wawontolino, Uedo to Isaraeli: Menteeano, Aku mompotii masolaa a mpo'ianga andio, ranta birino mia anu rumongeo, ngingii!

⁴ Hangano, dompebungkui Akumo, mensosa'aio po'ianga andio, ka mpotunu pesomba i tu'ai a luwuno pinesombai susua anu nahi tino'ori moiko ondaedo maupo uempu'udo ka luwuno mokoledo to Yehuda. Domeweweuomo po'ianga andio bukeako reado mia anu nahina salano.

⁵ Dompontade iramo pompesombaiado Baala pontunuado anado gagi pesomba tinunu a Baala, asa anu nahi Kuhori meparentaako ke pauo ka anu nahi hori hina i laro aroa-Ku.

⁶ Onaemo pu'uno, menteeano, tempono ta hawe, kanandiomo pau-Do i Ue, po'ianga andio nahi ta pinau mbo'u Topeti ke Lembono Beni-Hinomi, tendeano Lembono Ponsumbelea.

⁷ Nahi Aku mokogagio tinoono Yehuda ka Yerusale a mpo'ianga andio. Aku weweu ira ntebangkuako ponai i arono luwuno iwalido ka a ngkaedo mia anu mpomporaakono penaado. Aku meweengakono wata ngkoroido gagi kaangado manu-manu i laro meene ka a luwuno ngkondehora i tolino.

⁸ Aku weweuo kota andio gagi asa anu mongkokongiri ka pasinggiria. Sompo mia anu telaloio ta tekokodoho ka momansu hangano luwuno petunduhi anu pinemarasaino.

⁹ Aku weweu ira mpongkaa bauno anado tama ka bauno anado beine. Sompo mia mongkaa bauno walino, a laro ntekaduado ka tepakada hangano luwuno iwalido ka hangano mia anu momporaakono penaado.

¹⁰ Ka i'amba puro iramo pido-pido atuu i arono matado mia anu perongamu lumako.

¹¹ Pauako iramo: Kanandiomo pau-Do Ueno luwuakoano: Kanandiomo Aku merawo-rawoo tongku andio ka kota andio, kana mia morawo parewa inso a wita pulu puu mpoweweu kuro, ranta nahi pinokomoiko mbo'u. I Topeti mia ira mpongkaburu wata ngkoroi, hangano nahina mbo'u po'ianga pongkaburua.

¹² Kanatuumo Aku weweuo a mpo'ianga andio, kanandiomo pau-Do i Ue, ka a mpalilino. Aku weweuo kota andio kana Topeti.

¹³ Luwuno raha i Yerusale ka luwuno rahado mokoledo to Yehuda ta gagi po'ianga mokoburu kana Topeti, onaemo luwuno raha anu i wawo atono mia mpotunu pesomba tiano luwuno sorodadu langi ka mpompesombaako pesomba tinawa a luwuno pinesombai susua.”

¹⁴ I Yeremia mekule inso i Topeti, po'ianga Dotenao i Ue ka ipompau anu ta gagi. Onae mentade a kintalano raha-Do i Ue ka ipepau a luwuno palili,

¹⁵ ”Kanandiomo pau-Do Ueno luwuakoano, Ue Alado to Isaraeli: Menteeano, Aku motiio a ngkota andio ka luwuno kota kodeino, luwuno masolaa anu Kupauomo ta umalu ira. Hangano, ondae memotea ulu ka nahi domperorongeakono luwuno pau-Ku.”