Yeremia 18 - Wunta Mempori

Pepaguru mongkona petenunu inso a puu mpoweweu kuro

¹ Pau inso ndi Ondae i Ue anu hawe ndi Yeremia, kanandio,

² ”Pontuturakomo lako a rahano puu mpoweweu kuro! I ra'ai Aku mohaweo luwuno pau-Ku ndi omue.”

³ Ka ku'amba lumako a rahano puu mpoweweu kuro, ka tengkitaomo onae kontongaano mo'anggaako parewa powolili.

⁴ Tewala bolusa, anu kontongaano iweweuo inso a wita pulu a ngkaeno atuu, masola, asalakono puu mpoweweu atuu wali weweu gagi bolusa susua montonda hapa anu ikitao moiko.

⁵ Ka i'amba haweomo pau-Do i Ue ndi ongkue, kanandio,

⁶ ”Nde nahi Kupolioke weweuo ndi omiu kana puu mpoweweu kuro andio, hei suku Isaraeli? kanandiomo pau-Do i Ue. Mentee ntu'u, kana wita pulu a ngkaeno puu mpoweweu kuro, kanatuumo omiu a ngkae-Ku, hei suku Isaraeli.

⁷ Hinao tempono Ongkue mepau mongkona asa tongku ka mongkona asa poparentaa nine Aku butao, mobangkuo ka mepateo.

⁸ Sine, tewala tongku anu pinau-Ku atuu tepidi inso a wineweuno mosa'o, asalakono Aku me'o'ole hangano mingki modontaiakono masolaa anu Kupontooakono ndi onae.

⁹ Hinao tempono Ongkue mepau mongkona asa tongku ka mongkona asa poparentaa nine Aku wanguo ka pahoo.

¹⁰ Sine tewala mpoweweu ira anu mosa'o i arono mata-Ku ka nahi domperorongeakono pau-Ku, asalakono me'o'ole Akumo hangano moikoa anu dinandi-Ku ka ipetii ndi ondae.

¹¹ Onaemo pu'uno, pauako iramo to Yehuda ka palilino Yerusale: Kanandiomo pau-Do i Ue: Menteeano, Ongkue tekonai mompatinda masolaamiu ka motudaakomiu tinoo. Asalakono omiu singge mia ka itepidi inso a mpeleluno anu mosa'o, impokomoikoomo pelelumiu ka poweweumiu!

¹² Sine dompotae: Siimo nahina tuduno! Hangano omami kami mentuwu montonda tinoomami ka singge mia ta moweweu montonda aroano anu motea ka mosa'o.”

¹³ Onaemo pu'uno kanandiomo pau-Do i Ue, ”pesikenoakonomo i olodo tongku: isemake anu rumongeomo mongkona anu kanandio? Luwuno mongkona anu tedoa mongkokongiri domeweweuomo Ana Beinedo to Isaraeli!

¹⁴ Nde ta loonoke seru baku i Libano bintao laano anu mewatu? Nde ta mo'areke uwoino torukuno anu morini-rini?

¹⁵ Sine bawaa-Ku domengkolupe Akumo. Ondae mpotunu pesomba a mpinesombai nahina pengkonaano, ondae ntetidu ntebangku a luwuno pesalaado, a luwuno pesalaa inso a tempo i ndi'ipua, ka mpo'ala pesalaa metosi, pesalaa anu nahi wineweu,

¹⁶ ranta ka domeweweuo witado gagi asa anu mongkokongiri gagi pompopodeu-deu ranta nahina tampulaano. Sompo mia anu lumaloo ta mokokongiriakono, ka bitu-bituo uluno.

¹⁷ Kana angi i sabaano oleo Aku sumiarawo ira i arono iwali. Aku mopokitao bungku-Ku ndi ondae, komba rupa-Ku, a oleo masolaado.”

Pekakaino i Yeremia mo'ema pombaloa a iwalino 18:18-23

¹⁸ Dompotae, ”Aiwamo tompotudao tinooto umewaio i Yeremia, hangano pompaguru nahi ta pingko inso a nsando mpesomba, patudu inso a mia pande monsongka, ka pau inso a nabi. Aiwa tomentunduhiakono pau ka si pinekokoongako sompo pinauno!”

¹⁹ Iperio akumo, oo Ue, ka Irongeomo paudo iwaliku!

²⁰ Ta gagike moikoa sinuloako mosa'oa? Sine mpokeke iramo aa patamboku! Irambeomo nine mentade akumo i aro-Miu, ka mepau umalaako ira, ka itemonto tekuda-Miu inso ndi ondae.

²¹ Onaemo pu'uno, Ipeweengako iramo anado a mokoninggoa, ka Ipetadiako iramo a mata mponai! Po'ineeomo beinedo ntetadi anado ka mentuwu beine; po'ineeomo tamado memate tinunduhi, ka mangalitaudo mempinepateako ponai a mpeteaa!

²² Po'ineeomo peraaliki teronge inso a luwuno rahado, tempono Omiu nahi kinookoo mompotii gerombola mporontu ndi ondae! Hangano mpokeke iramo aa pompatambo ira merako aku, ka mponta'oakono oho karuku.

²³ Sine Omiu, oo Ue, Omiu tumo'orio luwuno tinoodo mingki mpepate aku. Siimo I'oniniako ira salado, ka siimo Ipahihio halado inso i aro-Miu, sine po'ineeomo dontetidu i aro-Miu; a oleo tekuda-Miu Iweweuo ndi ondae!