Yeremia 17 - Wunta Mempori

I Yeremia ka hala tongkuno anu motea aroa 17:1-18

¹ ”Halano Yehuda teburiako pena labu memata inta, tenggori a laro aroano ka a ntandu-tanduno meda pontunuado pesomba

² gagi pepopoto'ori ndi ondae! Luwuno meda pontunua pesomba ka luwuno karuno pelahumoaado lano kongko i horino keu anu marombo leweno i wawono luwuno pongku anu mantande,

³ a luwuno torukuno-Ku a mpada. Arataa kaeamu ka luwuno ponaapamu arataa Aku meweengakono gagi rontua, gagi hukuno halamu a luwuno witamu.

⁴ Tia pusakamu anu Kuweeakomumo ta tepotola inso ndi omue, ka Aku mokogagiko atado iwalimu i wita anu nahi uto'orio, hangano upolangaomo api a laro ntekuda-Ku anu ta melanga nahina tampulaano.”

⁵ Kanandiomo pau-Do i Ue, ”Tetotonaaomo mia anu momperorohi mia, anu mehonda a rosono koroino, ka anu aroano olai inso ndi Ondae i Ue!

⁶ Onae ta kana tonga ewo londa a mpada malua, onae nahi ta kumitao haweno teweweu moiko; onae ta mo'ia a wita londa i pada one, a mpada ohia anu nahina miano.

⁷ Rinonsoomo mia anu momperorohi ndi Ondae i Ue, anu me'ala-alaakono koroino ndi Ondae i Ue!

⁸ Onae ta kana keu anu pinaho a wiwi uwoi, anu lumele hakano a wiwi ngkorono, ka nahi ta membasaio haweno mokula oleo, anu leweno kongko molowulu, anu nahi danggara i larono ta'u motu'i-tu'i, ka anu nahi penaa-naa moluarako wuano.

⁹ Aroa atuu hadio akalano lumaloio luwuakoano, ka nahi tepomule; isema anu mokonto'orio?

¹⁰ Ongkuemo, Ue, anu mepenteeo aroa, ka umarahakono laro aroa, ka mombalo a sompo mia menunu saru peleluno, menunu saru hasilino wineweuno.”

¹¹ Kana torato anu mo'opoti nahi pesu'uluiakono, kanatuumo mia anu mopumpu kaea anu komba tiano. A entongano tinuwuno onae ta tetadi luwu, ka a tompaano tinuwuno onae butumo koa asa mia nahi montaso pinewowolono.

¹² Kadera marambaa, maramba inso a pompu'uano, po'iangano raha memporito!

¹³ Oo Ue, pomperorohiado to Isaraeli, luwuno mia anu mpebungkui Komiu ira mpohawe mokoko'ii; mia anu mepansia inso ndi Omiu ira mebinuri a awu wita, hangano dompebungkui Komiumo Ue, insoano uwoi anu tuwu.

¹⁴ Ipokotompa akumo, oo Ue, asalakono aku tompa; Ikadudui akumo, asalakono aku tekadudui, hangano Omiumo inunde-undeku!

¹⁵ Menteeano, dompotae ndi ongkue, ”Isuake pau-Do i Ue atuu? Po'ineeomo ka ihawe!”

¹⁶ Ongkue isa'a nahi kuhori medada gagi puu mpompakambi tumonda Komiu komba ineheku oleo masolaa! Omiumo anu tumo'orio hapa anu meluarako inso a wiwiku, luwuno mengkaa i aro-Miu.

¹⁷ Siimo Igagi anu mongkokongiri ndi ongkue, Omiumo pepekaduduiaku a oleo masolaa.

¹⁸ Po'ineeomo mia anu melampui aku mpohawe mokoko'ii, sine siimo kupinokoko'ii; po'ineeomo ka domedoito, sine siimo kupinokodoito! Ipotiiomo oleo masolaa ndi ondae, ka Irawo-rawoako iramo porawo-rawo meluka.

Parenta ka ipinokomempori Oleo Saba 17:19-27

¹⁹ Kanandiomo pau-Do i Ue, ”Lakomo ka pentademo a Mpewowa Langkai Anano Palili, telaloado luwuno mokoledo to Yehuda tempono dompeluarako ka mpewinso, saru mbo'u a luwuno pewowa langkaino Yerusale.

²⁰ Pauako iramo: Rongeomo pau-Do i Ue, hei luwuno mokoledo to Yehuda, hei luwuno to Yehuda ka luwuno palilino Yerusale anu mentelaloio luwuno pewowa langkai andio!

²¹ Kanandiomo pau-Do i Ue: Tangkoroomo penaamu! Si mponteo parewa a oleo Saba ke mewawao telalo a luwuno pewowa langkaino Yerusale!

²² Si mpowawa parewa mpeluarako inso a rahamiu a oleo Saba ka si mpo'angga maupo hapa. Sine pokomemporiomo oleo Saba kana anu Kuparentaako iramo uempu'umiu.

²³ Sine nahi domebehe mperorongeakono ka nahi domebehe menta'oo birido, memotea ulu ira, nahi domebehe merongeo ka nahi domebehe mpontarima pongkuahako.

²⁴ Tewala mentee ntu'u imperorongea-Kune, kanandiomo pau-Do i Ue, ka nahi mpowawa parewa telalo a luwuno pewowa langkaino kota andio a oleo Saba, sine mpokomemporio oleo Saba ka nahi mpo'angga maupo hapa a oleo atuu,

²⁵ asalakono telalo a luwuno pewowa langkaino kota andio ira mpewinso mokole ka mia mempinemota'u, anu ira mpentoro a ngkadera poparentaano i Daudi, saru mpe'ula a ngkareta ka ngara: ondae ka luwumo mia pinemota'udo, to Yehuda ka palilino Yerusale. Kota andio ira mpo'iangario mia ranta nahina tampulaano.

²⁶ Mia ira me'aiwa inso a luwuno kotano Yehuda ka inso a luwuno po'ianga i horino Yerusale, inso i wita Benami ka Daera Pongku, inso i mentorukuno ka wita Nege, saru mpowawa pesomba tinunu, pesomba sinumbele, pesomba kaanga ka dupa, saru mpowawa pesomba po'unde-unde a laro Raha-Do i Ue.

²⁷ Sine tewala nahi mperorongea-Kune ka impokomemporio oleo Saba ka nahi mpowawa parewa telalo a luwuno pewowa langkaino Yerusale a oleo Saba, asalakono a luwuno mpewowa langkaino Aku molangao api, anu ta kumaano ka ipingko luwuno benteno Yerusale, ka anu nahi pinokompepate.”