Yeremia 16 - Wunta Mempori

Pohuku a nto Isaraeli anu mpopesombai lahumoa

¹ Pau-Do i Ue hawe ndi ongkue, kanandio,

² ”Si po'ala kombiamu ka si hina anamu tama ka beine a mpo'ianga andio.

³ Hangano kanandiomo pau-Do i Ue mongkona ana ntama ka beine anu hina a mpo'ianga andio, mongkona inedo anu mpe'anaako ira ka mongkona amado anu mpe'anaako ira i wita andio:

⁴ Ondae ira memate hangano luwuno haki anu mompepate; ondae nahi ira mensinabangi ka nahi ira mengkinaburu; ondae ira megagi kana ta'i a wita; ondae ira mepiningkoako ponai ka mokoninggoa; wata ngkoroido ta gagi kaangado manu-manu i laro meene ka kondehora i tolino.

⁵ Mentee ntu'u, kanandiomo pau-Do i Ue; Si pewinso a raha po'inomboa, si lako ponsabangi ka tetonda mompemasusa saru ondae, hangano Aku wali mokuleo rodoa pompowee-Ku inso a tongku andio, kanandiomo pau-Do i Ue, kanatuu koa mbo'u pe'aroa ka pompehohawa-Ku

⁶ Moiko anu langkai maupo anu kodei ta mate i wita andio. Ondae nahi ira mengkinaburu, ka nahina mia anu ta sumabangi ira; nahi ta hina mia anu ta sumosorekio koroino ka lumondahio uluno hangano ondae.

⁷ Nahina mia anu monsiba-sibaakono roti mia anu mo'inombo ka tumareroo hangano matea atuu. Tendeano nahina mia anu ta moweeakono mo'inu inso a mpiala pontareroa hangano mateano ama ke ineno.

⁸ Si pewinso a rahano mia anu moweweu pelimbua komentoro mongkaa ka mo'inu saru ondae.

⁹ Hangano kanandiomo pau-Do Ueno luwuakoano, Ue Alado to Isaraeli: Menteeano, a mpo'ianga andio, i arono matamu ka a tempomu, Aku mokompenaa-naao suara mawongkoa ka po'undea, suarano umbungkoroi tama ka umbungkoroi beine.

¹⁰ Tewala upohaweako ira tongku andio luwuno pau atuu ka dompotae ndi omue, ’Tembio ka Dopopoto'orio i Ue luwuno masolaa anu langkai andio ndi omami? Hapake salamami ka hapake hala anu kimeweweuomo ndi Ondae i Ue, Ue Alamami?’,

¹¹ ka pauako iramo, ’Hangano dompebungkui Akumo uempu'umiu, kanandiomo pau-Do i Ue, ondae mbo'u mpontonda iramo pinesombai susua, mpesomba ka mpenggolontu mpesomba ndi onae. Dompebungkui Aku ka nahi dompe'ini a songka-Ku.

¹² Omiu isa'a mpoweweu laluaopo mosa'o sekonopo uempu'umiu! Kitao, omiu singge mia montonda aroano anu motea ka mosa'o sekonopo merorongea-Kune.

¹³ Onaemo pu'uno, Aku metadiakomiu inso i wita andio lumako i wita anu nahi imento'orio maupo uempu'umiu. I ra'ai komiu mpesomba a mpinesombai susua meene ka wongi, hangano nahi Aku mehohawa komiu mbo'u.’

¹⁴ Onaemo pu'uno, menteeano tempono ta hawe, kanandiomo pau-Do i Ue, nine mia nahi ira mpotae mbo'u, ’A nee-Do i Ue anu tuwu anu tumaate ira to Isaraeli mpeluarako inso i wita Masiri’,

¹⁵ tendeano, A nee-Do i Ue anu tuwu anu tumaate ira to Isaraeli mpeluarako inso i wita utara ka inso a luwuno wita ba isua Dosiarawo ira! Hangano Aku wawa ira mpepokule i wita anu Kuweeako iramo uempu'udo.

¹⁶ Menteeano, Aku montena hadio puu mporako bou, kanandiomo pau-Do i Ue, anu ta rumako ira, umarino atuu Aku montena puu mpowemba anu ta wemba ira inso a wawo luwuno torukuno ka luwuno pongku ka inso a olo-olono pongku watu.

¹⁷ Hangano mata-Ku te'aro a luwuno peleludo. Luwuno atuu nahi tewuni inso a pongkita-Ku, ka sala mpoweweudo mbo'u nahi tererei inso a pongkita-Ku.

¹⁸ Amba-ambano Aku humukuo sala mpoweweu ka halado meluka mpendua hangano wita-Ku domengkokoburutiakonomo wata ngkoroino lahumoado anu mokoburu ka mebuketiakono wita-Ku wineweudo anu mokoburu.”

¹⁹ Oo Ue, rosoku ka benteku, polaiaku a oleo pompema'isoku! Ndi Omiu ira me'aiwa tongku inso i tompano tolino saru mpotae, ”Mentee ntu'u, uempu'umami butu mpope'ue pinesombai nahi mentee, pinesombai nahina pengkonaano anu nahina tuduno.

²⁰ Polioke mia moweweuakono koroino onaeno luwuno pinesombai? Anu wineweuno atuu komba Ondae Ue Ala!”

²¹ ”Onaemo pu'uno, to'oriomo, Aku pauako ira, pohona andio Aku pauako ira pabawa-Ku ka roso-Ku, ka domento'orio nine nee-Ku onaemo Ue.”