Yeremia 15 - Wunta Mempori

¹ Mepau Iramo i Ue ndi ongkue, ”Maupo i Musa ka i Semueli mentade i aro-Ku, aroa-Ku nahi ta mepokule a tongku andio. Saari iramo inso i aro-Ku ka domelako!

² Tewala mpesikeno ira ndi omue, ’Isuake asalakono kami melako?’ Pauako iramo, ’Kanandiomo pau-Do i Ue: Anu tinantui tiano matea, lakomo a matea! Anu tiano ponai, lakomo a mponai! Anu tiano mokoninggoa, lakomo a mokoninggoa! Ka anu tiano gagi tinawa, lakomo a pontawaa!’

³ Aku mompotiiako ira opaa rupa pohuku, kanandiomo pau-Do i Ue, ponai pompepate, dahu mporende, manu-manu i laro meene ka luwuno kondehora i tolino ka dompongkaa ka mepingkoo.

⁴ Aku mokogagi ira mongkokongiria a luwuno poparentaa i tolino, hangano i Manase anano i Hisikia, mokole i Yehuda, hangano luwuno anu wineweuno i Yerusale.”

Ondae Ue Ala te'osa mehohawa ira bawaa-Do

⁵ ”Isemake anu ta mehohawako, hei Yerusale, ka isema anu ta metonda mompemasusa saru omue? Isemake anu ta tetoro mesikenoakono teweweumu?

⁶ Omue isa'a nahi utarima Aku, kanandiomo pau-Do i Ue, upebungkui Akumo. Onaemo ka Kutandeo kae-Ku ka mepateko; te'osa Akumo mehohawako.

⁷ Kudukuako ira poduku a luwuno pewowa langkaino wita. Bawaa-Ku Kuweweu ira tetadi anado ka Kuweweu ira memate, hangano nahi dompepokule inso a mpeleludo.

⁸ Kupokogagi ira tuwu beine hadioopo sekono one a ntahi. Kupotiio a ine ka mia mongura asa puu pompepate tempono ntonga oleo. Nahi kinookoo Kupotiiako ira danggara ka doitoa.

⁹ Beine anu pepintumo ipe'ana ta me'i'isei, ka penaano kongasa-ngasa. Ndi onae mata'oleo sumoomo tekonai da meene, onae gagi mokoko'ii ka ipemoteweomo koroino. Anu da tebinta inso ndi ondae Aku meweengako ira a mponai i arono luwuno iwalido, kanandiomo pau-Do i Ue.”

Pompemasusano i Yeremia ka sangki-Do i Ue 15:10-21

¹⁰ Masola aku, oo ineku, nine omiu me'anaakune, asa mia anu gagi pontiiano pegagaa ka pe'u'uaado luwuno wita. Nahina kupokompepasuao ke mepasua ndi semamo koa, sine luwudo mentotonaa aku.

¹¹ Ondae i Ue mepau Iramo: Mentee ntu'u, omue Kupotolako hangano moikoa; mentee ntu'u Aku weweuo iwali mepepehohawa ndi omue i tempo urasa'o ka ma'isoa!

¹² Polioke mia mompudu labu, labu inso i utara ka mala?

¹³ ”Arataa kaeamu ka luwuno sangka pinekariamu Aku meweengakono gagi rontua nahina sulono hangano luwuno halamu a luwuno wita pinabawaimu.

¹⁴ Aku weweuko gagi atado iwalimu i wita anu nahi uto'orio, hangano a laro ntekuda-Ku api melanga, langano tumunuko.”

¹⁵ Omiu tumo'orio, oo Ue. Irambeomo ka Iperio akumo; Ipombaloakunemo a luwuno mia anu lumampui aku. Si po'inee aku inala, hangano melai sabara-Miu; Ito'oriomo mobeano kutembio pontetewehi hangano Omiu!

¹⁶ Mansano hinawe luwuno pau-Miu, kumawongkoakono. Pau-Miu atuu gagi ineheku, ka mawongkono aroaku, hangano ongkue wawao nee-Miu, oo Ue, Ue Alano luwuakoano.

¹⁷ Nahi kupentoro saru mia mpompemaroa a laro ntepotowoado mia anu mpepau mpemae-mae. Podansono kae-Miu weweu aku mentoro asa-asaku, hangano Ibuketiakunemo bamburu-Miu.

¹⁸ Tembioke marasaiku nahina tompaano, ka mobelaku tedoa mahaki, nahi tepakuli? Mentee ntu'u, Omiu kana korono anu wela motu'i ndi ongkue, uwoi anu nahi pinokomperorohi.

¹⁹ Onaemo pu'uno kanandiomo pau-Do i Ue, ”Tewala inehemu mepokule, Aku mokuleko gagi puu pompekakaako-Ku, ka tewala mompauko hapa anu mentudu ka komba anu mokoburu, asalakono omue kogagi ponsombu elo ndi Ongkue. Maupo ira mpepokule ndi omue, omue siimo pepokule ndi ondae.

²⁰ A tongku andio Aku weweuko gagi rere watu anu mebente inso a mala. Ira mpeteaakomu, sine nahi ira menangiko, hangano Ongkue kumongkomiko ka utekadudui ka motolako, kanandiomo pau-Do i Ue.

²¹ Aku motolako inso a ngkaedo mia mpoweweu mosa'o ka motolako inso a pokungkudo mia melambaha.”