Yeremia 14 - Wunta Mempori

Pohuku motu'i-tu'i anu mongkokongiri 14:1–15:4

¹ Umarino atuu pau-Do i Ue ndi Yeremia mongkona tempo motu'i-tu'i.

² Yehuda mompemasusa, luwuno pewowa langkai memarasai ka saru mpompemasusa tewilei a wita; peraalino Yerusale mewuatako i wawono.

³ Anu langkai potorodo mentena ira puu pompekakaakodo mpo'ungke uwoi. Mansado mehawe a nsumuru, nahi dompohawe uwoi, onaemo ka dompekule saru ponaapado anu mooa. Memokoko'ii ka mengkurama, onaemo ka domensoumbuo uludo.

⁴ Anggaa a lere pinenaa-naaako, hangano nahina usa i wita atuu. Puu mpelere mpe'o'ole ka mensoumbuo uludo.

⁵ Maupo rusa waino a mpada bintao anano anu da sarai ihina, hangano ewo mongura nahina mbo'u.

⁶ Luwuno kalide tobu mentade a wawo pongku londa, ngaasa kana serigala, matado gagi moleu hangano nahina mbo'u ewo.

⁷ ”Maupo luwuno salamami mpesakosii umewai kami, Itulungi kamimo, oo Ue, a nee-Miu! Tedoa hadio pehapumami, ndi Omiumo kimentehala.

⁸ Oo Pomperorohiano i Isaraeli, Anu tumulungio tempono ipompema'iso! Tembio ka Ikana mia hawe i wita andio, kana mia a laro pelempaa anu butu tetoro merato?

⁹ Tembio ka Ikana mia bulalingo, kana puu mpetea anu nahi polio montulungi? Sine, Omiu kongko i olomami, oo Ue, ka omami pinau montonda nee-Miu. Si binta kami!”

¹⁰ Kanandiomo pau-Do i Ue mongkona tongku andio, ”Ondae tedoa mensanaa mpelakopi ka nahina umontoo karudo. Onaemo pu'uno nahi Dopemoiko ira i Ue. Kanandio-andio Ira rumambeo salado ka humuku ira hangano halado.”

¹¹ Ondae i Ue mepau ndi ongkue, ”Omue siimo pekakai tiano moikoado tongku andio!

¹² Maupo domempuasa, nahi Aku merorongeakono peboolido. Maupo dompopesombaako pesomba tinunu ka pesomba kaanga, nahi Aku memoiko ira. Tendeano Aku mokopingkoako ira ponai, saru mokoninggoa ka haki lele.”

¹³ Ka ku'amba motae, ”Adoo, Omiu Ue Ala! Kombake domempauomo nabi ndi ondae: Omiu nahi komiu mpongkita ponai, ka mokoninggoa nahi ta umalukomiu, sine Aku moweeakomiu rodoa anu moroso a mpo'ianga andio!”

¹⁴ Sumangki Ira i Ue ndi ongkue, ”Nabi atuudo mpompau anu nahi mentee ta gagi a nee-Ku! Nahi Kutena ira, nahi Kuparenta ira, ka nahi Kupepau ndi ondae. Ondae mpompau anu ta gagi ndi omiu pongkita nahi mentee, mpompau mooa ka pompopo'oono aroano onaeno.

¹⁵ Onaemo pu'uno, kanandiomo pau-Do i Ue mongkona nabi anu mpompau anu ta gagi a nee-Ku, kahinaano nahi Kutena ira. Ondae atuu mpotae, ’Peteaa ka mokoninggoa nahi ta umaluo wita andio.’ Nabi atuudo ira memateako ponai ka mokoninggoa!

¹⁶ Tongku anu dompompauako ira anu ta gagi ira mempinetadiako a luwuno sala i Yerusale hangano mokoninggoa ka ponai. Nahina mia anu ta kumaburu ira, moiko ondaedo, kombiado maupo luwuno anado anu tama ka beine. Kanatuumo Aku umuwuako ira poweweudo anu mosa'o ndi ondae.”

¹⁷ Pauako iramo pau andio, ”Uwoi mataku nte'i'iti meene ka wongi nahi penaa-naa, hangano ana beine, ana beineno tongkuku, mobela langkai, mobela anu nahi ta tepakuli.

¹⁸ Tewala meluarako aku a mpada, i ra'ai hinao mia anu mempinepateako ponai! Tewala mewinso aku a laro ngkota, i ra'ai hinao mia anu mahaki hangano mokoninggo! Tendeano, moiko nabi maupo sando mpesomba mpelakopi a wita anu nahi domento'orio.”

¹⁹ Nde Yehuda nami Itarima ira ntu'uke? Nde Ite'osaakonomoke Sioni? Tembio ka Itunduhi kami kanandio, ranta nahina mbo'u mokotompao hakimami? Omami mpomperorohi rodoa, sine nahina hawe maupo te'asa anu moiko; momperorohi tempo tompaano, sine anu hina butu mongkokongiria!

²⁰ Oo Ue, omami mpokonto'orio gaumami anu mosa'o ka salado uempu'umami; mentee ntu'u, mentehala kamimo ndi Omiu.

²¹ Itarima kamimo, a nee-Miu, ka siimo Ipokomoteweo kadera maramba-Miu! Irambeomo pedandia-Miu saru omami ka siimo Ibalio!

²² Hinaoke i olono pinesombai anu nahina pengkonaano inso a tongku atuu polio mompotii usa? Ke langi polioke onaeno mompotii usa marombo? Kombake butu koa Omiu, oo Ue Alamami? Ndi Omiumo pomperorohiamami, hangano Omiumo anu weweuo luwuno atuu?