Yeremia 13 - Wunta Mempori

Peboo ntonga anu mowuru 13:1-11

¹ Kanandiomo pau-Do i Ue ndi ongkue, ”Lakomo po'oli peboo ntonga lena, pokonaomo atuu a ntongamu, sine si emoo a uwoi!”

² Ka ku'amba mo'oli peboo ntonga kana anu pinau-Do i Ue, ka metanggoakono a ntongaku.

³ Umarino atuu haweomo pau-Do i Ue ndi ongkue anu kompenduano, kanandio,

⁴ ”Alaomo peboo ntonga anu inolimu ka pokonaomo a ntongamu atuu! Pontuturakomo lako a ngkoro Eparata ka uwunio i olo-olono pongku watu i ra'ai!”

⁵ Ka ku'amba lumako wunio i wiwi ngkoro Eparata kana anu Doparentaakune i Ue.

⁶ Ba opia tempo lembuino, mepau Iramo i Ue ndi ongkue, ”Pontuturakomo lako a ngkoro Eparata ka alaomo inso i ra'ai peboo ntonga anu Kuparentaakomu ka uwunio i ra'ai!”

⁷ Lumako akumo a ngkoro Eparata, ka ku'amba kumekeo ka umalao peboo ntonga atuu inso a mpo'iangano kuwunio. Mengkaa, peboo ntonga atuu mowuruomo namihina ntu'u tuduno.

⁸ Ka i'amba haweomo pau-Do i Ue ndi ongkue,

⁹ ”Kanandiomo pau-Do i Ue: Kanatuumo Aku mokotampulao pompelangka-langkaino Yehuda ka tedoa pompelangka-langkaino Yerusale.

¹⁰ Tongku anu mosa'o wineweuno andio, anu nahi behe momperorongeako pau-Ku, anu tumondao moteano aroado ka tumonda ira pinesombai susua saru mesomba ka menggolontu mesomba ndi ondae, ira megagi kana peboo ntonga andio anu namihina ntu'u tuduno.

¹¹ Hangano mengkena kana peboo ntonga metako a ntongano asa mia, kanatuumo hieno luwuno suku Isaraeli ka suku Yehuda Kupotako ira ndi Ongkue, kanandiomo pau-Do i Ue, ka domegagi bawaa, gagi tenee, inunde-unde ka gagi pinelangkai ndi Ongkue. Sine nahi domebehe mpomperorongeako.”

Gambarano kusi anggoro 13:12-14

¹² ”Pohaweako iramo pau andio: Kanandiomo pau-Do i Ue, Ue Alado to Isaraeli: Sompo kusi asalakono pinokobukeako anggoro! Tewala dompotaeakomu: Kombake kimento'oriomo nine sompo kusi asalakono pinokobukeako anggoro?

¹³ asalakono pauako ira: Kanandiomo pau-Do i Ue: Menteeano, luwuno palilino wita andio Aku mokobukeako ira molangua, moiko luwuno mokole anu mpentoro a ngkadera poparentaano i Daudi, luwuno sando mpesomba, luwuno nabi, maupo luwuno palilino Yerusale.

¹⁴ Aku weweu ira mambe ropu, ama saru anano, kanandiomo pau-Do i Ue. Aku mepate ira nahina pompehohawa, ka nahina ampu.”

Pohuku a bawaa anu mebungkui Ira i Ue 13:15-27

¹⁵ Rongeomo, ta'oomo birimiu, si mpompelangka-langkai, hangano Ondae i Ue mepau Iramo.

¹⁶ Pelangkai Iramo i Ue, Ue Alamiu, se'eluno napi Dopompotii wongi-wongia, se'eluno napi tetidu karumu a luwuno pongku anu itutuwio tekamburi; kontongaamiu mposisikori mewine, Ondae mokogagio oleo wongi mpusu ka weweuo worikidi.

¹⁷ Tewala nahi mebehe mperorongeakono, aku mengese a ntewuniano hangano pompelangka-langkaimiu. Uwoi mataku ta melolonto, tendeano nte'i'iti, hangano bawaano bimba-Do i Ue winawa mentinawa.

¹⁸ Pauako iramo mokole ka inedo mokole, ”Ipentoromo a po'ianga anu tetotoako, hangano songko mokole metiiomo inso a ulumiu!”

¹⁹ Luwuno kota i wita Nege tinondoomo, ka nahina maupo te'asa mia umungkahio. Luwuno to Yehuda mewinawa a pontadia, luwuno mewinawa a pontadia.

²⁰ Pengkitamo ngkoraane ka kitaomo, hinao mia me'aiwa inso i utara! Isuaomoke bawaano pinotuwu anu uwineeako, bawaano bembe bimba anu gagi marambamu?

²¹ Hapa anu pinaumu, tewala mia anu upewali-waliako ira gagi sambe'e, pinotoro gagi petewawamu? Kombake mahakia ta sumapoiko mengkena kana beine anu me'ana?

²² Tewala omue mesikeno i laro aroamu, ”Tembio luwuno andio ka i'alu aku?” Hangano hadiono halamu onaemo ka isinungke untu hawumu kau dinadai!

²³ Poli irake to Etiopia me'euo kulido ke nggapu langkai meboti-boti balio lobano? Nde kana'umpe komiu mempolio mpoweweu moiko, hei mia anu meleleo mpoweweu mosa'o?

²⁴ Aku rumawo ira kana ota anu pinaneeno angi i pada one.

²⁵ Onaemo tiamu anu Kusa'uakomu, kanandiomo pau-Do i Ue, hangano ukolupe Aku, ka me'ala-alao pegaupi.

²⁶ Ongkue isa'a Aku tumandeo tompa hawumu hawe a rupamu, ranta ka itengkita anumu.

²⁷ Ponsosabomu ka pekiilimu, mokoburuno pebelesumu i wawono pongku ka pada, luwuno wineweumu anu mokoburu atuu Kukitaomo. Masola komo ntu'u, hei Yerusale, hawe opiapo mbo'uke tempono ka u'amba gagi morina?