Yeremia 12 - Wunta Mempori

Po'emano i Yeremia ka sangki-Do Ue Ala 12:1-17

¹ Omiu mentee mpiha, oo Ue, tewala ongkue mekara-kara saru Omiu! Sine aku mepau ndi Omiu mongkona moleoa: Tembio ka ime'ura tuwuno mia mosa'o gauno, manangai luwu anu mpoweweu molengku?

² Omiu weweu ira tuwu ka dompehaka, ondae mentuwu mewalo ka mehasiliako wua. Omiu mpiha a wiwido, sine olai inso i aroado.

³ Oo Ue, Omiu tumo'ori aku ka kumita aku. Omiu umarahakono ihino aroaku ndi Omiu. Pae iramo mpeluarako kana bawaano bembe bimba sumbelea, ka pesusua iramo tiano oleo ponsumbelea.

⁴ Opiapo mbo'u tempono itedoa mokari wita andio, ka ewo a luwuno pada moleu? Hangano mosa'o poweweudo palilino kondehora ka manu-manu pingko tampula, hangano mpotaedo, ”Nahi Ira kumita kita poko'ariano anu umalu kita!”

⁵ ”Tewala omue melulu saru mia anu melulu, ka ipokomokendoko, kana'umpeke kometandiakono ngara? Tewala a wita anu manangai nahi urodo, hapake anu koweweuo a ntobu mongurano koro Yarade?

⁶ Hangano luwuno pepaekompomu ka pe'etumu tendeano mempopo'ooko koa mbo'u; ondae mbo'u nahi domenanta-nata mpebooli i bungkumu. Si pe'ala-ala ira, maupo mo'ahi-ahi dompepauakomu!

⁷ Kubintaomo raha-Ku, ka metadiakono tia pusaka-Ku; Kupeweengakono ana pinehohawa-Ku a ngkaedo iwalino.

⁸ Tia pusaka-Ku gagiomo kana singa a ntobu ndi Ongkue. Ipengaolia-Kune; onaemo pu'uno ka Ku'o'aliaakono.

⁹ Tia pusaka-Ku gagiomo kana manu-manu mpongkaa kosume ndi Ongkue. Manu-manu mpongkaa bau menggowoo. Hio, pumpu iramo luwuno kondehora mo'ila, wawa iramo ka domepingkoo!

¹⁰ Hadio puu mpopakambi anu mensolangiomo lere anggoro-Ku, ka melolandao wita-Ku. Ondae meweweuo wita-Ku anu tekosi gagi pada one anu boni-boni.

¹¹ Oo, domeweweuomo boni-boni, boni-boni ka po'inombo i aro-Ku! Boni-boni luwuno wita atuu, sine nahina maupo te'asa mia anu merioo.

¹² Anu mponsolangi mehawe iramo ntelaloio luwuno pongku londa i pada one, hangano ponai-Do i Ue mompepate inso i tompano wita anu asa hawe a tompano susuano; nahina rodoa a luwuno anu mentuwu.

¹³ Ondae mporawo gandu, sine anu sinowi ewo rui; ondae mperokuhi, sine usahado nahina tuduno; mokoko'iido a hasili anu hinawedo, hangano tekuda-Do i Ue anu tensila.”

¹⁴ Kanandiomo pau-Do i Ue, ”Mongkona luwuno pehori raha-Ku anu mosa'o wineweudo, luwuno tongku anu monsosanggoli wita anu Kuweeako iramo bawaa-Ku Isaraeli gagi tia pusakado, menteeano Aku buta ira inso i witado ka Aku buta ira suku Yehuda inso i tonga-tongado.

¹⁵ Sine, mansano Kubuta ira, Aku wali mehohawa ira. Aku mokule ira singge mia a ntia pusakano ka witano.

¹⁶ Tewala mentee ntu'u dompepaguruakono sala ntumuwudo bawaa-Ku ka dompesumpa a nee-Ku, ’A nee-Do i Ue anu tuwu,’ kana'umpe domempaguru ira bawaa-Ku ka dompesumpa a neeno Baala, asalakono ira wali mewinangu i tonga-tongado bawaa-Ku.

¹⁷ Sine, tewala nahi domebehe mperorongeakono, Aku butao luwu ka mepateo tongku atuu, kanandiomo pau-Do i Ue.”