Yeremia 11 - Wunta Mempori

Pepopoto'ori a mpolaloa pedandia-Do Ue Ala 11:1-17

¹ Pau-Do Ue Ala anu hawe ndi Yeremia, kanandio,

² ”Rongeomo pauno pedandia andio ka pohaweomo atuu a nto Yehuda, palilino Yerusale!

³ Pauako iramo: Kanandiomo pau-Do i Ue, Ue Alado to isaraeli: Tetotonaaomo mia anu nahi perorongeakono luwuno pau pedandia andio

⁴ anu Kuparentaako iramo uempu'umiu i tempono Kuwawa ira mpeluarako inso i wita Masiri, inso a awu pompokolonoa labu. Pau-Ku: Rongeomo pinau-Ku ka weweuomo luwuno anu Kuparentaakomu, asalakono kogagi bawaa-Ku ka Ongkue gagi Ue Alamu.

⁵ Ba kanandio Aku umihiio sumpa anu Kupedandiakonomo a uempu'umiu Aku weeako ira wita anu hadio ntu'u susu ka siu hoanino, kana teweweuno a tempo andio.” Ka ku'amba sumangki, ”Ami, oo Ue!”

⁶ Mepau Iramo i Ue ndi ongkue, ”Pebooliakonomo luwuno pau andio a luwuno kotano Yehuda ka a luwuno sala i Yerusale: Rongeomo ka weweuomo luwuno pau pedandia andio!

⁷ Mentee ntu'u Kupopoto'oriako iramo uempu'umiu, i tempono Kutaate ira mpeluarako inso i wita Masiri. Maupo hawe tempo andio Kupopoto'oriako ira mpiha: Rongeomo pau-Ku!

⁸ Sine, nahi dobehe mperorongeakono ke mpo'aroo birido. Ondae singge mentondao moteano aroado anu mosa'o ranta ka Kupotiiako ira luwuno pau pedandia, anu umariomo Kupeparentaako ka i wineweu, sine nahi domeweweuo.”

⁹ Mepau Iramo i Ue ndi ongkue, ”Hinaweomo tepo'asaa i olodo to Yehuda ka i olodo palilino Yerusale.

¹⁰ Ondae wali meweweuo sala mpeleludo uempu'udo anu i ndi'ipua nahi dobehe mperorongeakono pau-Ku. Ondae mpetonda a mpinesombai susua ka mpesomba ndi onae. Suku Isaraeli ka suku Yehuda domehapuomo pedandia-Ku anu Kuwutuo saru uempu'udo.

¹¹ Onaemo pu'uno kanandiomo pau-Do i Ue: Menteeano, Aku mompotiiako ira masolaa anu nahi dompokompeliahako. Tewala mpeboo-booli ira ndi Ongkue, nahi Aku merorongeako ira.

¹² Ka i'amba luwuno kotano Yehuda ka palilino Yerusale melako mpeboo-booli a luwuno pinesombai anu inunde-undedo saru mpotunu pesomba. Sine, luwuno pinesombai atuu nahi pokontulungi ira ntu'u i tempono i'alu ira masolaa.

¹³ Hangano kana hadiono kotamu kanandiomo hadiono pinesombaimu, hei Yehuda. Kana hadiono sala i Yerusale kanandiomo hadiono meda pontunua pesomba anu pinontademiu pontunua pesomba tiano Baala.

¹⁴ Ka omue, siimo pekakaiako ira tongku andio. Siimo powuatako po'ema ka pekakai tiado, hangano nahi Aku merorongeakono i tempono dompebooli ndi Ongkue hangano masolaado.

¹⁵ Hapa mbo'u orusuano pinehohawa-Ku a laro raha-Ku, kombake onae iweweuomo luwuno tinoono anu mosa'o? Polioke luwuno pontanga ka bau mempori lumiahakomu inso a masolaa, ranta lembuino omue mokompo'unde?

¹⁶ Keu saitu anu marombo, tekosi ikitao mata, kanatuumo hori Ira i Ue moponeeko. Sine saru unino pohohoi anu meroku ntu'u Ondae molangao api a luwuno leweno, ranta luwuno sampa motutuno mo'ai.

¹⁷ Ondae Ueno luwuakoano, anu weweuko ka utuwu, tumantuiomo masolaa ndi omue hangano poweweu mosa'o anu wineweudo suku Isaraeli ka suku Yehuda. Ondae mpokotesingkao tekuda-Ku hangano mpontunu pesomba a Baala.”

Penaano i Yeremia pinontooako i Anatoti 11:18-23

¹⁸ Ondae i Ue pauo mongkona atuu ndi ongkue, onaemo ka kuto'orio. I tempo atuu, Ondae i Ue, mopokitaakune hapa anu wineweudo.

¹⁹ Se'eluno ongkue kana ana bimba monea anu winawa ta sinumbele, nahi kuto'orio nine ondae mpoweweu tinoo mosa'o ndi ongkue, ”Aiwamo tomeropuo keu andio saru luwuno wuano! Aiwamo to mpokotampulao inso a witado mia tuwu, ranta nami rinambe mbo'u neeno!”

²⁰ Sine, oo Ueno luwuakoano, anu mobitara moleo, mo'arahako laro aroa ka aroa, po'ineeomo kukitao pombalo-Miu ndi ondae, hangano ndi Omiumo kuwawao kara-karaku.

²¹ Onaemo pu'uno kanandiomo pau-Do i Ue mongkona luwuno to Anatoti anu inehedo mpepate aku saru mpotae, ”Si pompau anu ta gagi a nee-Do i Ue, ka si umate a ngkaemami!”

²² Onaemo pu'uno kanandiomo pau-Do Ueno luwuakoano, ”Menteeano, Aku humuku ira. Luwuno mia mongurado ira memateako ponai, luwuno anado tama ka beine ira memate mokoninggo.

²³ Nahina anu torea inso i olodo, hangano Aku mompotii masolaa a nto Anatoti a nta'u hukuado.”