Yeremia 10 - Wunta Mempori

Ondae Ue Ala anu tuwu ka lahumoa nahina pengkonaano 10:1-16

¹ Rongeomo pau anu pinohawe-Do i Ue ndi omue, hei suku Isaraeli!

² Kanandiomo pau-Do i Ue, ”Siimo imempandirio peleludo luwuno tongku, siimo imedoitoakono luwuno petondoni i langi, maupo luwuno tongku medoitoakono.

³ Hangano, gaudo tongku atuu nahina pengkonaano. Kombake lahumoa atuu keu anu tinuehi inso a ntobu, anu inanggano asa mia puu mpo'angga keu mompake pa'o?

⁴ mia mompokotekosiako wulaa saru salaka, ka mokorosoakono palu-palu saru paso, ka si telelu.

⁵ Luwuno lahumoa mengkena kana mia-mia a lere suai, nahi dompokompepau ka asalakono tinande hangano nahi pokompelempa. Si doitoakono, hangano nahi dompokompoweweu anu mosa'o, ka nahi dompokompoweweu mbo'u anu moiko.”

⁶ Nahina kana Omiu, oo Ue! Omiu tedoa langkai ka langkai nee-Miu hangano tedoa moroso.

⁷ Isemake anu nahi doito ndi Omiu, oo Mokoledo luwuno tongku? Mentee ntu'u, kanandiomo pelelu anu tekona ndi Omiu; hangano i olodo mia pande mposongka inso a luwuno tongku ka i olono luwuno mokoledo nahina anu kana Omiu!

⁸ Lahumoa atuu luwuno benge-benge ka monge-monge; pontisodo nahina tuduno; onae butu koa keu.

⁹ Salaka pinalu winawa inso i Tarasisi, ka wulaa inso i Upasi; lahumoa atuu wineweuno puu mpo'angga ka wineweuno kaeno mia pande mo'angga wulaa. Sangkano inso a nsawu wungo motu'a ka sawu wungo mongura, luwuno wineweuno kaeno mia anu pande mo'angga.

¹⁰ Sine Ondae i Ue ondaemo Ue Ala anu mentee, Ondaemo Ue Ala anu tuwu ka Mokole anu nahina tampulaano. Tolino lelu hangano tekuda-Do, ka luwuno tongku nahi domempolio a bamburu-Do.

¹¹ Kanandiomo asalakono imempauakono, ”Luwuno pinesombai andio, anu nahi pompokogagi langi ka tolino ta moliu inso i tolino ka inso i totono langi.”

¹² Ondaemo i Ue saru roso-Do mokogagio tolino, saru ponto'ori-Do wanguakono wawontolino, ka saru pande-Do langi Dowileo.

¹³ Tewala Dopoporongeo suara-Do, u'uruomo uwoi i langi. Dowuatakono gawu nseru inso i tompano tolino, mepansariako koliki tumondao usa, ka wawao angi meluarako inso a mponaapa-Do.

¹⁴ Sompo mia mengkaa benge-benge, nahina tino'orino, ka sompo mia anu pande mo'angga wulaa gagi mokoko'ii hangano tinaha wineweuno. Hangano tinaha tinawano butu pompopo'oo, nahina penaa i larono,

¹⁵ Luwuno atuu nahina tuduno, inangga anu gagi pompasinggiri, ka ta moliu i tempono ihinuku.

¹⁶ Komba kanatuu Ondae anu gagi Tiano i Yako, hangano Ondaemo anu weweuo luwuakoano, ka Isaraeli onaemo suku pine'ue-Do; Ueno luwuakoano, onaemo nee-Do!

Yehuda gagi boni-boni 10:17-25

¹⁷ Pumpu iramo sangkamu ka ulako inso i wita andio, hei luwuno mia anu kongko a laro pongkadua!

¹⁸ Hangano, kanandiomo pau-Do i Ue, ”Menteeano, pohona andio Aku metadiako ira palilino wita andio, ka Aku mokomarasai ira, ka dompembasaio.”

¹⁹ Masola akumo, hangano mobelaku langkai; mobelaku nahi hori toompa! Kupewowoloo, ”mentee ntu'u, onaemo andio pobobarasaia ka asalakono aku tumembio!”

²⁰ Kemaku tebangkuomo, ka luwuno tanggono tebiteomo. Luwuno anaku melako iramo inso ndi ongkue ka nami hina mbo'u; nahina mbo'u anu montadeo kemaku ka wireio tendaku.

²¹ Mentee ntu'u, luwuno puu mpopakambi gagi mebenge-benge; nahi dompo'ema pontiso-Do i Ue. Onaemo pu'uno nahi dompehasili; luwuno pinotuwu pinakambido ntesiarawo.

²² Terongeomo lele: Kitao, tewukaa langkai ta hawe inso i wita utara, anu ta weweuo luwuno kotano Yehuda boni-boni, gagi pewuniado serigala.

²³ Kuto'orio, oo Ue, nine mia nahina pabawano tumantuio sala ntumuwuno, ka mia anu melempa nahina pabawano ka ipatotoo pelempano.

²⁴ Itunduhi akumo, oo Ue, sine anu koa pototono, ka si saru tekuda-Miu, ka si Ipokotampula aku!

²⁵ Ipotiiomo tekuda-Miu a luwuno tongku anu nahi to'ori Komiu, a luwuno pe'etu anu nahi dompebooliako nee-Miu, hangano domengkaanomo i Yako, mengkaano ka mepingkoo; po'iangano domeweweuo gagi terawo-rawo.