Yehesikieli 9 - Wunta Mempori

Mia mosa'o gaudo i Yerusale pinepate

¹ Ka ku'amba rumonge Ira mebooli suara-Do meroku, ”Asalakono mia anu ta molempao pohuku a ngkota andio aiwa me'umpedaako, singge mia saru parewa poropu a ngkaeno!”

² Kitao, onoo mia tama aiwa inso te'aro a Mpewowa Langkai Wawono, anu me'aro i utara, singge mia saru parewa pontunduhi a ngkaeno. Asa mia i olodo mesangka lena ka a ntongano hinao parewa poburi. Ondae mpewinso ka mpentade i horino meda pontunua pesomba mala.

³ I tempo atuu maramba-Do Ue Alado to Isaraeli tetandeomo inso a wawo kerubi, po'iangano amba-ambano, a wawo montoweano pewowano Raha Mempori ka Dopoboio mia anu mesangka lena ka hinao parewa mpoburi a ntongano.

⁴ Pau-Do i Ue ndi onae, ”Pelempamo inso i tonga-tongano kota Yerusale ka buriomo aasa petondoni a ra'ido mia anu pompemasusa hangano luwuno wineweu mokoburu anu wineweu i ra'ai.”

⁵ A anu susua kuronge Ira mepau, ”Tondaomo inso i bungkuno telalo a ngkota atuu ka weweuomo pompepatea siimo pompehohawa ka nahina mokoko'undua.

⁶ Pompepate ka ropu ira mia anu mota'u, ana ntama kontuwuado, ka ana beine kontuwuado, nana'ote kodei ka luwuno beine! Sine, luwuno mia anu tinondoniomo, si danggi ira! Pompu'umo inso a mpo'ianga mempori-Ku!” Ka do'amba mpompu'u inso a mia memota'u anu mekongko i arono Raha Mempori.

⁷ Ka Do'amba mepau ndi ondae, ”Kokoburutiomo Raha Mempori atuu ka kintalano buketiakonomo mia anu mempinepate. Lakomo!” Lumako iramo meluarako ka weweuo pompepatea a laro ngkota.

⁸ Kontongaado pompepate, tempo atuu bininta aku asa-asaku, ongkue menggolontu mesomba ka mebooli, kupotae, ”Oo, Ue Ala, nde Iropu ira luwuke to Isaraeli anu da tebinta a laro te'uwuno tekuda-Miu i Yerusale?”

⁹ Dosangki aku, ”Salado suku Isaraeli ka Yehuda tedoa langkai, ranta wita andio bukeako rea ka kota andio bukeako poweweu nahina moleoa. Hangano, dompotae, ’Wita andio Dobintaomo i Ue ka nahi Dokitao i Ue.’

¹⁰ Onaemo pu'uno Ongkue mbo'u nahi Kupompehohawa ka nahi Kumokoko'unduakono. Aku dumunsiako ira peleludo a uludo.”

¹¹ Kitao, mia anu mesangka lena saru parewa poburi a ntongano pauo ndi Ongkue, ipotae, ”Kuweweuomo kana anu Ipeparentaako ndi ongkue.”