Yehesikieli 8 - Wunta Mempori

Lahumoa anu mokoburu a Raha-Do Ue Ala 8:1-18

¹ A nta'u ko'onoo, a wula ko'onoo, tanggala olima wula atuu, tempono kupentoro a rahaku tepo'aro saru luwuno mia memota'udo to Yehuda, pabawa-Do Ue Ala pabawai aku i ra'ai.

² Kukitao, menteeano tengkita asa anu kana tadeno asa mia tama. Inso a hapa anu kana tadeno tongano hawe i totono tengkita kana api ka inso a ntongano kontahane i wawono tengkita kana wanta, kana suasa mangkilo.

³ Ondae tumasiakono asa anu tadeno kana kae ka Do'inio wuu a uluku. Ka i'amba Penaa-Do i Ue atuu tumande aku i olono langi ka tolino saru wawa aku a laro luwuno pongkita-Do Anu Pabawa i Yerusale umpeda pewowa langkaino kintala i larono anu me'aro i utara, i ra'ai po'iangano lahumoa, anu mokomahaki aroa.

⁴ Kitao, i ra'ai tengkita maramba-Do Ue Alado to Isaraeli, kana pongkita anu kinitaku i lembono atuu.

⁵ Pau-Do ndi ongkue, ”Hei anano mia, po'aroomo matamu i utara!” Ongkue mengkita i utara, mentee ntu'u, i utarano pewowa langkai pontunua pesomba, umpeda a nsala mewinso, hinao lahumoa atuu.

⁶ Pau-Do ndi ongkue, ”Hei anano mia, nde ukitaoke hapa anu wineweudo, luwuno wineweu tedoa mokoburu anu wineweudo suku Isaraeli i ndi'ai, ranta Ongkue asalakono me'olaiako inso a mpo'ianga mempori-Ku? Tendeano kokumitao luwuno wineweu mokoburu anu lalu langkai mbo'u.”

⁷ Ka Do'amba wawa aku a mpewowano kintala, ka kukitao, mentee ntu'u, hinao asa bolo a rere watu.

⁸ Pau-Do ndi ongkue, ”Hei anano mia, pokolangkaiomo bolo a rere watu atuu!” Umarino kupokolangkaio bolo atuu, kitao, hinao asa pewowa.

⁹ Pau-Do ndi ongkue, ”Pewinsomo ka kitaomo luwuno wineweu mokoburu ka mosa'o, anu wineweudo i ndi'ai.”

¹⁰ Ka ku'amba mewinso ka kumitao, mentee ntu'u, luwuno gambarano kondehora melele, kondehora susua anu mokoburu, ka luwuno lahumoado suku Isaraeli tenggori a rere watu limbu-limbu.

¹¹ I arono mpentade pitu pulu mia memota'udo suku Isaraeli, saru i Ya'asana anano i Sapani i tonga-tongado. Singge mia mo'ini pontunua dupa a ngkaeno, ka ahuno dupa anu mana mo'ahi atuu mewuatako i wawono.

¹² Pau-Do ndi ongkue, ”Nde ukitaoke, hei anano mia, hapa anu wineweudo mia memota'udo suku Isaraeli a laro wongi-wongi, singge mia a laro bolongko po'iangano luwuno ngginorido? Hangano, dompotae: Ondae i Ue nahi Dokita kita; Wita andio Dobintaomo i Ue.”

¹³ Mepau Ira mbo'u, ”Omue tendeano kokumitao luwuno wineweu mokoburu anu wineweudo lalu langkai mbo'u.”

¹⁴ Ka Do'amba wawa aku a mpewowa langkai Raha-Do i Ue anu te'alaako i utara. Mentee ntu'u, i ra'ai mpentoro ira beine anu mpengeseio Pinesombai Tamusu.

¹⁵ Pau-Do ndi ongkue, ”Hei anano mia, Nde ukitaoke atuu? Omue tendeano kokumitao luwuno wineweu mokoburu anu lalu langkai mbo'u sekonopo atuu.”

¹⁶ Ka Do'amba wawa aku a kintala i larono Raha-Do i Ue. Mentee ntu'u, umpeda a nsala mewinso a Raha-Do i Ue, i olono holoi ka meda pontunua pesomba, hinao bara'ura rua pulu ka olima mia tama, anu mpebungkuio Raha-Do i Ue ka mpe'aro i sabaano oleo saru mpenggolontu mpesombaio mata'oleo i sabaano oleo.

¹⁷ Ka Do'amba mepau ndi ongkue, ”Nde ukitaoke atuu, hei anano mia? Kara-kara kodeike atuu a nsuku Yehuda meweweu ira wineweu mokoburu anu domeweweuo i ndi'ai? Hangano, wita andio domebuketiakono pobobarasaia ka mokontesingkao mpiha tekuda-Ku. Mentee ntu'u, ondae mpelelu nahi penunu i aro-Ku.

¹⁸ Onaemo pu'uno Aku moweweu a laro ntekuda; Nahi Aku mompehohawa ka nahi Kumokoko'unduakono. Maupo dompeboo-booli ndi Ongkue suarado meroku, nahi Aku merorongeako ira.”