Yehesikieli 7 - Wunta Mempori

Tampulaano Yerusale hawe 7:1-27

¹ Ka i'amba haweomo pau-Do i Ue ndi ongkue,

² ”Omue, anano mia, pauomo: Kanandiomo pau-Do Ue Ala a wita Isaraeli: Poko'ariano! Poko'arianomo opaa siuno wita atuu.

³ Kanandio-andio umariamu hawe ka Aku umuwuo tekuda-Ku ndi omue. Aku bitarako menunu saru pelelumu ka mombalo ndi omue luwuno wineweumu anu mokoburu.

⁴ Nahi Aku mehohawako ka nahi ta hina pompehohawa. Sine, Aku mombalo ndi omue menunu saru pelelumu ka luwuno wineweumu anu mokoburu ta umaluko. Ka komiu mento'orio nine Ongkuemo Ue.

⁵ Kanandiomo pau-Do Ue Ala: Kitao, masolaa metuda-tuda ta hawe!

⁶ Tampulaano aiwa, tampulaamu hawe. Onae mewangu umewaiko; kitao, onae haweomo!

⁷ Masolaa hawe ndi omue, hei palilino wita! Tempono haweomo, tempono umpedaomo! Oleo marisua, komba pebooli mawongko a luwuno torukuno.

⁸ Kanandio-andio Aku ronga umuwuo mosa'ono aroa-Ku ndi omue ka motiio tekuda-Ku ndi omue. Aku bitarako menunu saru pelelumu ka mombalo ndi omue luwuno wineweumu anu mokoburu.

⁹ Nahi Aku mompehohawa ka nahi ta hina pompehohawa; Aku mombalo ndi omue menunu saru pelelumu, ka luwuno wineweumu anu mokoburu ta umaluko. Ka komiu mento'orio nine Ongkuemo Ue, anu montunduhi.

¹⁰ Kitao, oleono hawe koa ntu'u. Masolaa mewurosi; pompokonsiia mentumba, pompelangka-langkai te'ili.

¹¹ Pobobarasaia lumele gagi pontumbo mebungkui Ira i Ue. Nahina anu tebinta inso ndi ondae, moiko inso a ngkaeaa maupo mare'eano; tekosino mbo'u ta tepahihi.

¹² Hawe tempono, oleono umpedaomo! Po'ineeomo anu mo'oli ka si mawongko ka anu mo'asa ka si pompemasusa, hangano mokulano tekuda umaluo luwuno kaeado.

¹³ Hangano, anu mo'asa nahi ta mekule a inasano, maupo ondae da i tonga-tongano mia mentuwu. Menteeano mokulano tekuda umaluo luwuno kaeado ka nahi pinoko'onto mbo'u. Nahina maupo te'asa mia mokompeteahakono tuwuno hangano salano.

¹⁴ Ondae pompuuri tawuwua ka luwuakoano tepatinda, sine nahina maupo te'asa mia lumako metea, hangano tekuda-Ku umaluo luwuno kaeado.

¹⁵ Ponai kongko i bungkuno kota, haki lele ka mokoninggoa kongko i larono. Ba isema i bungkuno kota ta mateako ponai, ka ba isema i laro kota ta mate hangano mokoninggoa ka haki lele.

¹⁶ Maupo tewala inso ndi ondae hinao anu tola, ira mpo'ia a luwuno torukuno kana marapatii a luwuno lembono; luwuno mperaali, singge mia hangano salano.

¹⁷ Luwuno kae telupe ka luwuno mia pasi'eme doito.

¹⁸ Ira mpopokona sawu po'inombo, doitoa pabawai ira. Luwudo ira ntekoko'ii ka luwuno ulu ta kineru londa.

¹⁹ Salakado ta pinetadiako i bungkuno ka wulaado ta rineke tesosa'ai. Wulaa ka salakado nahi ta mokokadudui ira a oleo tekuda-Do i Ue. Nahi ira memowohiako onae ka kompodo nahi ta te'ihiiako onae. Hangano mongkona atuu gagi watu tetidua anu dumontai ira a laro salado.

²⁰ Peramba-ramba tekosi dompokonao gagi pompelangka-langkai. Inso a mperamba-ramba atuu domeweweuo luwuno tinaha anu mokoburu ka luwuno lahumoado. Onaemo pu'uno, Aku weweuo tesosa'ai ndi ondae.

²¹ Aku meweengakono gagi rinontu a ngkaedo mia hawe ka gagi pinomuru a mia mosa'o gauno i tolino ka ondae andio ira mengkokoburutio.

²² Aku wolilio rupa-Ku inso ndi ondae. Luwuno anu pompomuru atuu ira mengkokoburutio raha-Ku anu masuli olino; ira mpewinso i larono ka mengkokoburutio.

²³ Patindao pompongu, hangano wita atuu bukeako pasua rea ka kota atuu buke pobobarasaia.

²⁴ Aku tumena ira tongku anu lalu lambaha ka luwuno tongku andio ira me'alao luwuno rahado gagi tiado. Aku mokompenaa-naao pompelangka-langkaido mia moroso, ka luwuno po'ianga memporido mbo'u ta kinokoburuti.

²⁵ Doitoa hawe; ondae mpo'ungke sintuwua, sine nahina.

²⁶ Masolaa metuda-tuda ta hawe, lele metuda-tuda ta telele. Ondae mpo'ungke-ungke pongkita inso a nabi; pompaguru moliu inso a nsando mpesomba, ka patudu inso a mia memota'u.

²⁷ Mokole ta mo'inombo, ka petewawa ta pabawaio doitoa ka kaedo luwuno palilino wita atuu gagi telusa tedoa doito. Aku weweu ira menunu saru peleludo ka bitara ira menunu saru gaudo mpobitara. Ka iramo mento'orio nine Ongkuemo Ue.”