Yehesikieli 6 - Wunta Mempori

Pinau anu ta gagi a luwuno torukuno Isaraeli 6:1-14

¹ Ka i'amba haweomo pau-Do i Ue ndi ongkue,

² ”Hei anano mia, po'aroomo rupamu a luwuno torukuno Isaraeli ka pauomo anu ta gagi umewai ira!

³ Pauomo: Hei luwuno torukuno Isaraeli, rongeomo pau-Do Ue Ala! Kanandiomo pau-Do Ue Ala a luwuno torukuno ka pongku, a luwuno waaano korono ka lembono: Mentee ntu'u, Aku mompotiiakomu ponai ka Aku merawo-rawoo luwuno po'ianga pesombaamu.

⁴ Luwuno meda pontunuamu pesomba ta gagi boni-boni ka luwuno pontunuamu dupa ta pinuro. Aku mobangku ira miamu anu mempinepate i arodo lahumoamu.

⁵ Aku metadiakono wata ngkoroido to Isaraeli i arono luwuno lahumoado ka sumiarawo ira wukumu lumimbu ira meda pontunua pesombamu.

⁶ Isuamo koa impo'ia, luwuno kotamiu ta gagi tekale-kale ka luwuno po'ianga pesombaamiu ta gagi boni-boni, ka irinawo-rawo luwu meda pontunuamiu pesomba ka bininta boni-boni, luwuno lahumoamiu pinuro ka nami hina, luwuno pontunuamiu dupa rinawo-rawo ka luwuno wineweuno kaemiu pinokotampula.

⁷ Luwuno miamiu anu pinepate ta tebangku i tonga-tongamiu ka komiu mento'orio nine Ongkuemo Ue.

⁸ Sine, asa ntia inso ndi omiu anu tola inso a mponai, Aku mo'ineeo tuwu i olodo luwuno tongku, tempono imensiniarawo a luwuno wita atuu.

⁹ I ra'ai, i tonga-tongano luwuno tongku, ba isua domewinawa gagi mia tinawa, luwuno mia anu tola inso i olomiu ira merambe Aku, tempono Kupokomahakiako ira ntu'u aroado anu mponsosabo atuu, anu me'olai iramo inso ndi Ongkue ka melimbao matado anu wela mponsosabo saru mentonda ira lahumoado. Ondae isa'a mekokowuereakono mengkitao mosa'oa anu wineweudo ka kumitao luwuno wineweudo anu mokoburu.

¹⁰ Ira mento'orio nine Ongkuemo Ue ka komba kopau-pau mpena tewala mepau Aku ka domempinoweeako masolaa andio ndi ondae.”

¹¹ Kanandiomo pau-Do Ue Ala, ”Pontopamo, petundoakono karumu, ka pebooliakonomo: Petangkoro! Hangano luwuno wineweudo suku Isaraeli anu mokoburu ka mosa'o, ira memate tebangkuako ponai, mokoninggoa, ka haki lele.

¹² Mia anu olai ta mate hangano haki lele, anu umpeda ta tebangkuako ponai, ka mia anu tola saru tepekaria ta mate hangano mokoninggoa. Kanatuumo Aku motiio mosa'ono aroa-Ku ndi ondae.

¹³ Komiu mento'orio nine Ongkuemo Ue, tempono luwuno miado anu mempinepate ntebangku i tonga-tongano luwuno lahumoado lumimbuo luwuno meda pontunua pesomba, i wawono sompo pongku anu mantande ka i wawono luwuno punsuno torukuno, i totono sompo keu anu marombo ka sompo keu tarabanti anu hadio leweno, luwuno po'iangado mpowawa pesomba anu mana mo'ahi tiado luwuno lahumoado.

¹⁴ Aku tumandeo kae-Ku ndi ondae, ka wita, isuamo koa dompo'ia, Aku weweuo gagi ropu ka boni-boni mompu'u inso i pada one hawe i Ribela. Ka ira mento'orio nine Ongkuemo Ue.”