Yehesikieli 5 - Wunta Mempori

¹ Omue, anano mia, alaomo asa ponai anu montaso ka pakeomo atuu gagi piso pongkeruno puu mpogonti. Keruakonomo atuu wuumu ka danggomu. Ka i'amba alaomo asa pontimba ka tiaomo wuumu.

² Asa ntia otolu asalakono ka utunuo a api i tonga-tongano kota atuu umarino tampulaomo tempo pongkadua; asa ntia otoluno mbo'u asalakono alao ka utotopiakono ponai atuu lumimbuo kota; ka asa ntia otoluno mbo'u rawoomo a angi ka Aku butao ponai i bungkudo.

³ Omue asalakono mo'ala tedei inso a wuu atuu ka tumongoo a tompa hawumu.

⁴ Pohona mbo'u omue asalakono umalao asa ntia inso ndi onae, petadiakono a laro api ka tunuomo atuu. Inso i ra'ai ta meluarako api ka ikaano luwuno suku Isaraeli. Ka i'amba potaemo ndi ondae,

⁵ Kanandiomo pau-Do Ue Ala: Ndiomo Yerusale! Onae Kunaao i tonga-tongado tongku ka hinao luwuno wita lumimbuo.

⁶ Onae umewaomo a luwuno atora-Ku mosa'oopo wineweuno sekonopo luwuno tongku ka a luwuno pompakosi-Ku mosa'oopo wineweuno sekonopo luwuno wita pehori-horino. Menteeano, nahi domentarimao luwuno atora-Ku ka peleludo nahi penunu saru luwuno pompakosi-Ku.

⁷ Onaemo pu'uno, kanandiomo pau-Do Ue Ala: Omue mosa'oopo wineweumu sekonopo luwuno tongku pehori-horimu ka pelelumu nahi penunu saru luwuno pompakosi-Ku, ka mbo'u nahi uweweuo luwuno atora-Ku, tendeano luwuno atorado tongku pehori-horimu nahi uweweuo.

⁸ Onaemo pu'uno, kanandiomo pau-Do Ue Ala: Kitao, Ongkue, oo Ongkue isa'a gagi ewaimu ka Aku modontaiakomu pohuku i arodo luwuno tongku.

⁹ Hangano luwuno wineweumu anu mokoburu atuu, Aku weweuo ndi omue hapa anu napi Kuhori weweuo ka nahi Aku weweuo mbo'u.

¹⁰ Onaemo pu'uno, i olomiu ama ta kumaano anano ka ana ta kumaano amano. Aku modontaiakomu pohuku ka sumiarawoo luwuno anu tebinta inso ndi omue a luwuno siuno angi.

¹¹ Onaemo pu'uno, a nee-Ku anu tuwu, kanandiomo pau-Do Ue Ala, menteeano, hangano po'ianga mempori-Ku omue kumokoburutiakono luwuno pinesombai ka wineweuno kaemu anu mokoburu, Ongkue isa'a sumesewoko; nahi Aku mompehohawa ka mokoko'unduakomu.

¹² Asa ntia otolu inso ndi omue ta mate kona haki lele ka mate mokoninggo i tonga-tongamu; asa ntia otolu mbo'u ta mate ikaano ponai a mpehori-horimu; ka asa ntia otolu mbo'u Aku sumiarawoo a luwuno siuno angi ka Aku butao ponai i bungkudo.

¹³ Aku motiio tekuda-Ku ndi ondae, ranta ka imorini mokulano aroa-Ku ka teende Akumo. Ira mento'orio nine Ongkuemo Ue anu pauo a laro pompemasusa-Ku, tempono Kupotiio mosa'ono aroa-Ku ndi ondae.

¹⁴ Aku weweuko gagi tekale-kale ka tetewehia i olodo luwuno tongku a mpehori-horimu i arodo luwuno mia anu ntelalo.

¹⁵ Omue kogagi tetewehia ka pepaukia, gagi pepopoto'ori ka pu'uno mongkokongiriado luwuno tongku a mpehori-horimu, tempono Kupoweeakomu pohuku a laro ntekuda ka mokulano aroa a laro pontunduhino a mosa'o aroa. Ongkue, Ue, anu pauo,

¹⁶ tempono Kupotiiakomu mokoninggoa anu mongkokongiri, anu mompepate. Kupotiio ka ipepate komiu, tempono Kutiangio mongkokongirino mokoninggoa ndi omue ka rumopuo pepatinda kaangamu.

¹⁷ Aku mompotiiakomu mokoninggoa ka luwuno kondehora lambaha i tonga-tongamu, anu ta rumopu ira anamu. Haki lele ta lumele ka rea ta waa i tonga-tongamu ka Aku mompotiiakomu ponai, Ongkue, Ue, anu pauo.”