Yehesikieli 47 - Wunta Mempori

Korono anu meluarako inso a Raha Mempori

¹ Ka i'amba wawa aku mekule a mpewowano Raha Mempori, ka mentee ntu'u, hinao uwoi meluarako inso i totono montoweano pewowa a Raha Mempori atuu ka waa te'aro i sabaano oleo, hangano Raha Mempori mbo'u me'aro i sabaano oleo. Uwoi atuu waa inso i totono koanano Raha Mempori i selatano meda pontunua pesomba.

² Ka i'amba wawa aku meluarako telalo a mpewowa langkai utara ka wawa aku mebolili i bungkuno te'aro a mpewowa langkai i bungkuno anu me'aro i sabaano oleo, mentee ntu'u, uwoi atuu mebula-bulangga inso i selatano.

³ Tempono mia atuu lumako te'aro i sabaano oleo saru mo'ini koloro posongka a ngkaeno, onae mosongka asa nsowu hiku ka tumena aku telaloio uwoi atuu; uwoino hawe a lodi-lodino karu.

⁴ Onae mosongka asa nsowu hiku mbo'u ka tumena aku telaloio uwoi atuu pohona mbo'u, kanandio-andio haweomo a olontuu. Ka i'amba mosongka asa nsowu hiku mbo'u ka tumena aku kopentoluno mewinso a laro uwoi atuu; kanandio-andio haweomo a ntonga.

⁵ Onae mosongka asa nsowu hiku mbo'u, kanandio-andio uwoi atuu gagiomo korono anu nahi kupokosakio. Hangano, uwoi atuu ko'onda-ondalono ranta ka dompokomensowe mia, aasa korono anu nahi pinokosaki.

⁶ Ka i'amba mepau ndi ongkue, ”Ukitaomoke, hei anano mia?” Ka i'amba wawa aku mekule a wiwi ngkorono.

⁷ A laro pelempaa mekule, mentee ntu'u, tumondao ondauno wiwi ngkorono atuu hadio ntu'u keu, i asambalino i ndi'ai ka i asambalino raane.

⁸ Onae mepau ndi ongkue, ”Korono andio waa i wita sabaano oleo, metii i Araba-Yarade, ka menganga i Tahi Mopa'i, uwoi anu me'ohia hadio ka uwoi atuu gagi motewe.

⁹ Isuamo koa waaano uwoi atuu, luwuno anu tuwu mpenggowo i ra'ai ta tuwu. Luwuno bou ta gagi hadio ntu'u, hangano isuamo koa haweano uwoi atuu, uwoi mopa'i i tu'ai gagi motewe; isuamo koa uwoi atuu iwaa, luwuno anu i ra'ai tuwu.

¹⁰ Tumondao ondauno wiwino, mompu'u inso i Eni-Gedi hawe i Eni-Egilaimi, bukeako anu mporako bou. Wita atuu gagi pompuaia buani ka a ngkorono atuu hinao mperupa-rupa bou, tedoa hadio, kana luwuno bou a ntahi langkai.

¹¹ Sine, luwuno epeno ka limbono nahi gagi motewe; luwuno gagi po'alaa ohia.

¹² A orua wiwino korono atuu tuwu mperupa-rupa keuno wua kaanga anu leweno nahi moleu ka wuano nahi hori pingko. Sompo wula keu atuudo mehasiliako wua anu wo'ohu, hangano mohawe uwoi inso a mpo'ianga mempori atuu. Wuano gagi kaanga ka leweno gagi pakuli.”

Luwuno tida witano Isaraeli 47:13-20

¹³ Kanandiomo pau-Do Ue Ala, ”Ndiomo luwuno tidano wita anu asalakono komiu mpetia-tiao gagi tia pusakamiu i olono hopulu ka orua suku Isaraeli. I Yusupu mohawe orua ntia.

¹⁴ Wita atuu asalakono impetiao mengkena onaemo wita anu saru sumpa Kudandio meweengakono a uempu'umiu ka kanatuumo wita andio gagi tia pusakamiu.

¹⁵ Ndiomo tidano wita atuu. I utarano: inso a Ntahi Langkai motilalo i Hetiloni hawe i Lebo-Hamati, motilalo i Sedadi,

¹⁶ i Berota, i Siberaimi, anu mo'ia i olono witano kota Damasi ka witano kota Hamati, hawe i Hasari-Enoni anu i witano kota Haurani.

¹⁷ Kanandiomo petidaano atuu mompu'u inso a ntahi hawe i Hasari-Enoni. Witano kota Damasi ka witano kota Hamati mo'ia i utarano. Onaemo atuu i utara.

¹⁸ I sabaano oleo: mompu'u inso i Hasari-Enoni anu mo'ia i olono Haurani ka Damasi, Koro Yarade gagi petidaa i olono Gileadi ka wita Isaraeli, motilalo i Tahi Sabaano oleo hawe i Tamari. Onaemo atuu i sabaano oleo.

¹⁹ I selatano: petidaa mompu'u inso i Tamari hawe a uwoi Meriba umpeda i Kadesi, motilalo a ngkoro Masiri te'aro a Ntahi Langkai. Onaemo atuu petidaa i selata.

²⁰ I sumooano oleo, tahi langkai onaemo petidaa hawe i asa towano Lebo-Hamati. Onaemo petidaa i sumooano oleo.”

Petiaa wita Isaraeli

²¹ ”Wita andio asalakono impetia-tiao i olomiu montonda luwuno suku Isaraeli.

²² Ka asalakono impetia-tiao gagi tia pusaka i olomiu ka i olodo mia mehawe anu mpo'ia i olomiu, anu mpe'ana i tonga-tongamiu. Ka ondae asalakono imengkita ira kana to Isaraeli ntu'u; mperonga-ronga saru omiu ondae asalakono mpohawe tia pusaka i tonga-tongado suku Isaraeli.

²³ Gagi, i tonga-tongano suku isuamo koa dompo'ia mpiha mia mehawe atuu, i tu'aimo imeweeako ira tia pusakado, kanandiomo pau-Do Ue Ala.