Yehesikieli 46 - Wunta Mempori

¹ Kanandiomo pau-Do Ue Ala: Pewowa langkaino kintala i larono anu me'aro i sabaano oleo asalakono tetondo i larono onoo oleo mpo'anggaa, sine inungkahi a oleo Saba, ka inungkahi mbo'u a oleo wula wo'ohu.

² Mokole ta mewinso inso i bungkuno telalo a bansalano pewowa langkai ka mentade umpeda karuno pewowa langkai. Kontongaano atuu luwuno sando mpesomba mpopesombaako pesomba tinunu ka pesomba tekaduduiano mokole ka onae ta menggolontu mesomba a montoweano pewowa langkai atuu, ka i'amba meluarako mbo'u. Pewowa langkai atuu nahi moiko itinondo hawe ngkiniwia.

³ Palilino wita mbo'u asalakono mpetonda mpenggolontu mpesomba i aro-Do i Ue a mpewowa langkai atuu a oleo Saba ka wula wo'ohu.

⁴ Pesomba tinunu anu asalakono ipesombaakono mokole ndi Ondae i Ue a oleo Saba onaemo onoo bimba nahina tataano ka asa bimba lakino nahina tataano.

⁵ Pesomba kaanga asalakono asa efa tarigu tewala saru bimba lakino, ka pesomba kaanga saru luwuno bimba susua montonda pompolino, saru lana asa hini tiano asa efa.

⁶ A wula wo'ohu asalakono pinesombaako asa sapi lakino mongura anu nahina tataano, saru onoo bimba ka asa bimba lakino anu nahina tataano.

⁷ Gagi pesomba kaanga onae asalakono mompesombaako asa efa tarigu tewala saru asa sapi ka asa efa tarigu tewala saru asa bimba lakino, sine pesomba kaanga saru luwuno bimba susua montonda pompolino, saru lana asa hini tiano asa efa.

⁸ Tewala mokole ta mewinso i larono, onae asalakono mewinso telalo a bansalano pewowa langkai ka meluarako mbo'u inso i tu'ai.

⁹ Tewala palili me'aiwa i aro-Do i Ue a mporame-ramea anu wela riname-rame mpiha, anu mpewinso telalo a mpewowa langkai utara ira mpetonda mpenggolontu mpesomba asalakono mpeluarako telalo a mpewowa langkai selata, ka anu mpewinso telalo a mpewowa langkai selata, asalakono mpeluarako telalo a mpewowa langkai utara. Nahina maupo te'asa mia mekule telalo a mpewowa langkai pewinsoano, sine singge mia asalakono meluarako inso a mpewowa langkai anu tepobungku pe'aroano.

¹⁰ Mokole merongaako ira; ondae mewinso tempono dompewinso ka meluarako tempono dompeluarako.

¹¹ A luwuno oleo langkai ka porame-ramea anu wela riname-rame mpiha asalakono hinao pesomba kaanga onaemo asa efa tarigu tewala saru asa sapi lakino ka asa efa tarigu saru asa bimba lakino, sine pesomba kaanga saru luwuno bimba susua montonda pompolino, saru asa hini lana tiano asa efa.

¹² Tewala mokole mompesombaako pesomba tinunu montonda ihino aroano ke pesomba tekaduduia montonda ihino aroano tia-Do i Ue, mia asalakono me'ungkahiakono pewowa langkai sabaano oleo ka onae ta mesombaakono pesomba tinunu ka pesomba tekaduduiano atuu kana anu iweweuo a oleo Saba, ka i'amba meluarako. Umarino meluarako, a mpewowa langkai asalakono tinondo.

¹³ Sompo oleo asalakono onae mompatinda bimba anu tinuwuno asa nta'u ka nahina tataano gagi pesomba tinunu tia-Do i Ue. Sompo mo'oru asalakono onae weweuo atuu.

¹⁴ Umarino atuu sompo mo'oru onae asalakono mompatinda pesomba kaanga asa ntia onoo efa tarigu saru asa ntia otolu hini lana ta sinalo saru tarigu moiko. Onaemo pesomba kaanga tia-Do i Ue, ka pompakosi atuu tinonda mpiha ranta nahina tampulaano.

¹⁵ Kanatuumo dompesombaakono bimba ka pesomba kaanga saru lana sompo mo'oru gagi pesomba tinunu anu wineweu mpiha.

¹⁶ Kanandiomo pau-Do Ue Ala: Tewala mokole mompowee asa pompowee inso a ntia pusakano a asa mia anano, ka pompowee atuu gagi tiano anano, ka tia atuu gagi pusakado.

¹⁷ Tewala onae mompowee pompowee inso a ntia pusakano a asa mia atano, ka pompowee atuu gagi tiano hawe ta'u tepotolaano, ka i'amba asalakono pinokule a mokole atuu. Butu luwuno anano mokole atuu anu moiko ipe'ueo tia pusakano.

¹⁸ Mokole nahi moiko ipo'ala maupo hapa inso a ntia pusakado palili, ranta ka donteliahako inso a ntiado. Butu inso a ntiano moiko ipe'ueako ira anano ka si hina maupo te'asa mia inso a bawaa-Ku tesaari inso a ntiano.”

Ponahua luwuno pesomba

¹⁹ Ka i'amba wawa aku telalo a mpewowa pewinsoa i horino pewowa langkai a luwuno bolongko tiado sando mpesomba i utarano po'ianga mempori, ka mentee ntu'u, i ra'ai i tompano sumooano oleo hinao asa po'ianga.

²⁰ Onae mepau ndi ongkue, ”I ndi'aimo po'iangado sando mpesomba menahuo pesomba pontolosi sala ka pesomba po'onini hala saru mentunuo pesomba kaanga ka si domewawao a kintala i bungkuno ka nahi pinokomempori bawaa-Do i Ue.”

²¹ Ka i'amba wawa aku a kintala i bungkuno ka mo'inee aku lumako a opaa siuno kintala atuu, mentee ntu'u, a sompo siuno kintala atuu hinao mbo'u kintala.

²² A opaa siuno kintala atuu hinao kintala-kintala kodei, pato pulu hiku ondauno ka tolu pulu hiku maluano, opaano mengkena songkano.

²³ Lumimbuo opaa kintala kodei atuu hinao rere watu ka i totono rere watu atuu liimbu mewineweu ponahua.

²⁴ Onae mepau ndi ongkue, ”Ndiomo awu ponahua, po'iangado anu mpo'angga a Raha Mempori menahuo pesomba sinumbeledo bawaa.”