Yehesikieli 45 - Wunta Mempori

Pesomba pinesusua, wita tiano kota ka tiano mokole 45:1-8

¹ ”I tempono impetia-tiaoakono undi wita atuu gagi tia pusakamiu, omiu asalakono mpesusuao asa ntia inso a wita atuu gagi pesomba pinesusua anu mempori tia-Do i Ue; ondauno rua pulu ka olima nsowu hiku ka maluano rua pulu nsowu hiku. Luwuno wita a mpo'ianga andio mempori.

² Inso a wita andio asalakono pinatinda tiano po'ianga mempori asa ntia wita mensiu opaa anu ondauno ka maluano lima etu hiku ka lumimbuo hinao kintala anu maluano lima pulu hiku.

³ Inso a mpo'ianga anu sinongkaomo atuu songkaomo asa ntia anu ondauno rua pulu ka olima nsowu hiku ka maluano hopulu nsowu hiku: i tu'aimo te'ingka po'iangano po'ianga mempori, tiano anu tedoa mempori.

⁴ Onaemo tiano anu mempori inso a wita atuu tiado sando mpesomba anu mpoweweu pesomba a mpo'ianga mempori ka me'aiwa umpeda mpekakaako Ira i Ue. Onaemo perahaado ka gagi wita mempori tiano po'ianga mempori.

⁵ Wita anu ondauno rua pulu ka olima nsowu hiku ka maluano hopulu nsowu hiku asalakono gagi tiado to Lewi anu mpo'angga mpoweweu pesomba a Raha Mempori. Onaemo luwuno kotano, po'iangado.

⁶ Wita pusaka tiano kota asalakono omue tumantuio maluano lima nsowu hiku ka ondauno rua pulu ka olima nsowu hiku, metida saru pesomba pinesusua anu mempori atuu. Onaemo wita tiado luwuno suku Isaraeli.

⁷ Wita tiano mokole asalakono po'iangano i sumooano oleo ka isabaano oleo pesomba pinesusua anu mempori ka tiano kota atuu ka asalakono metida saru orua ntia atuu. Anu i sumooano oleo asalakono hawe a ntida i sumooano oleo ka anu i sabaano oleo asalakono hawe a tida i sabaano oleo. Ondauno asalakono mengkena saru ondauno wita tiano asa suku Isaraeli, inso a ntida i sumooano oleo hawe a ntida i sabaano oleo wita atuu.

⁸ Witamo atuu anu gagi tiano mokole i Isaraeli. Luwuno mokoledo to Isaraeli nahi ira mbo'u mpokonsii ira bawaa-Ku. Ira mpeweengakono wita atuu a nsuku Isaraeli montonda luwuno sukudo.”

Anggaado bawaa-Do i Ue ka to'oriano mokole 45:9-17

⁹ Kanandiomo pau-Do Ue Ala, ”Sompoomo, hei luwuno mokoledo to Isaraeli, impoko'olaiomo pobobarasaia ka pompokonsiia, sine weweuomo moleoa ka menteea. Impenaa-naamo mporontu wita tiado bawaa-Ku, kanandiomo pau-Do Ue Ala.

¹⁰ Pontimba anu mentee, efa anu mentee, ka bati anu mentee asalakono hinao ndi omiu.

¹¹ Efa ka bati asalakono mengkena sa'uno, gagi asa bati ihino asa ntia hopulu homeri, ka asa efa mbo'u asa ntia hopulu homeri. Gagi, ponsa'u atuu asalakono tinantui montonda homeri.

¹² Asa sikala asalakono mengkena saru rua pulu gera. Rua pulu sikala tiniangi rua pulu ka olima sikala tiniangi hopulu ka olima sikala onaemo asa mina.

¹³ Ndiomo pesomba pinesusua anu asalakono komiu mpesombaakono: asa ntia opaa efa inso a asa homeri gandu ka asa ntia onoo efa inso a asa homeri jelai;

¹⁴ mongkona lana pompakosino onaemo asa ntia hopulu bati inso a asa koro; asa koro mengkena saru hopulu bati;

¹⁵ asa mbo'u ana bimba inso a sompo bawaano rua etu bimba pine'uedo to Isaraeli mpepe'etu. Luwuno atuu tiano pesomba kaanga, pesomba tinunu ka pesomba tekaduduia weweua pesintuwuado, kanandiomo pau-Do Ue Ala.

¹⁶ Luwuno palilino wita asalakono mpompowee pesomba pinesusua andio a mokoledo to Isaraeli.

¹⁷ Mokolemo anu tumo'orio pesomba tinunu, pesomba kaanga, pesomba tinawa a oleo langkai, wula wo'ohu, ka oleo Saba, a sompo porame-rameado suku Isaraeli. Onaemo anu ta patindao pesomba po'onini hala, pesomba kaanga, pesomba tinunu, ka pesomba tekaduduia moweweu pesintuwuado suku Isaraeli.”

Luwuno pesomba a luwuno oleo langkai 45:18–46:18

¹⁸ Kanandiomo pau-Do Ue Ala, ”A wula ko'asa, tanggala asa wula atuu, alaomo asa sapi lakino mongura anu nahina tataano ka pokomemporiomo po'ianga mempori atuu.

¹⁹ Sando mpesomba asalakono mo'ala tedei inso a reano pesomba po'onini hala ka monaakono a luwuno karuno Raha Mempori ka a opaa siuno asino meda pontunua pesomba ka a luwuno karuno pewowa langkaino kintala i larono.

²⁰ Kanatuumo asalakono uweweuo a oleo amba-ambano wula ko'opitu hangano luwuno mia anu mpoweweu hala nahi pine'inungako ke hangano nahi domento'orio. Kanatuumo omue moweweu pesintuwuano Raha Mempori.

²¹ A wula ko'asa, tanggala hopulu ka opaa wula atuu, asalakono imerame-rameo oleo langkai Pasa, ka i larono opitu oleo mpongkaa roti nahi peragi.

²² A oleo atuu mokole asalakono mompatinda sapi lakino gagi pesomba po'onini hala tiano koroino ka luwuno palili i wita atuu.

²³ I larono opitu oleo a oleo langkai atuu onae asalakono mompatinda pesomba tinunu tia-Do i Ue onaemo opitu sapi lakino ka opitu bimba lakino anu nahina tataano sompo oleo ka pesomba po'onini hala onaemo asa bembe lakino sompo oleo.

²⁴ Gagi pesomba kaanga onae asalakono mompatinda asa efa tarigu saru asa sapi ka asa efa tarigu saru asa bimba lakino saru asa hini lana tiano asa efa.

²⁵ A wula ko'opitu, tanggala hopulu ka olima wula atuu, a oleo langkai, onae asalakono mompatinda pesomba po'onini hala, pesomba tinunu, pesomba kaanga, ka lana i larono opitu oleo.